ମୋଦି ଆଣିବେ ‘ସୌଭାଗ୍ୟ’ ! ସବୁ ଗରିବଙ୍କୁ ମାଗଣାରେ ୫ଟି ଏଲଇଡି ବଲ୍ବ ଓ ଗୋଟିଏ ଲେଖାଏଁ ଫ୍ୟାନ୍ ଘୋଷଣା କଲେ ପ୍ରଧାନମନ୍ତ୍ରୀ
କନକ ବ୍ୟୁରୋ : ଦେଶର ପ୍ରତି ପରିବାରକୁ ବିଜୁଳି ଆଲୋକ ପହଁଚାଇବା ପାଇଁ ପ୍ରଧାନମନ୍ତ୍ରୀ ନୂଆ ଯୋଜନା ଘୋଷଣା କରିଛନ୍ତି । ପ୍ରଧାନମନ୍ତ୍ରୀ ସହଜ ବିଜୁଳି ହର ଘର ଯୋଜନା ‘ସୌଭାଗ୍ୟ’ ଦ୍ୱାରା ଦେଶର ସବୁ ପରିବାରକୁ କିପରି ବିଜୁଳି ସଂଯୋଗ ହୋଇପାରିବ ତାହା ହେଉଛି ଏହି ଯୋଜନାର ମୂଳ ଲକ୍ଷ୍ୟ । ୨୦୧୯ ମାର୍ଚ ୩୧ ତାରିଖ ମଧ୍ୟରେ ଏହି ଲକ୍ଷ୍ୟ ପୂରଣ କରାଯିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଲକ୍ଷ୍ୟ ଧାର୍ଯ୍ୟ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପ୍ରଧାନମନ୍ତ୍ରୀ ମୋଦି ପଣ୍ଡିତ ଦୀନଦୟାଲ ଉପାଧ୍ୟାୟଙ୍କ ଜନ୍ମ ଶତାବ୍ଦୀ ପାଳନ ଅବସରରେ ଓଏନଜିସିର ଦୀନଦୟାଲ ଉର୍ଜା ଭବନ ଲୋକାର୍ପଣ କରି ଏହି ବଡ଼ ଯୋଜନା ଘୋଷଣା କରିଛନ୍ତି । ସୌଭାଗ୍ୟ ଯୋଜନା କାର୍ଯ୍ୟକାରୀ କରିବା ପାଇଁ ୨୦୧୧ ଜନଗଣନା ଅନୁସାରେ ଥିବା ପ୍ରତି ଗରିବ ପରିବାରକୁ ମାଗଣାରେ ବିଜୁଳି ଯୋଗାଇ ଦିଆଯିବ । ସାମାଜିକ ଆର୍ଥିକ ଜନଗଣନା ଅନୁସାରେ ଥିବା ଗରିବ ପରିବାରକୁ ମାଗଣା ବିଜୁଳି କନେକସନ ଯୋଗାଇ ଦିଆଯିବ । ଏପିଏଲ ପରିବାରକୁ ୧୦ ଟି କିସ୍ତିରେ ୫୦୦ ଟଙ୍କା ନିଆଯାଇ କନେକସନ ଯୋଗାଇ ଦିଆଯିବ । ଏହା ସହ ଗରିବ ପରିବାରଙ୍କୁ ୫ଟି ଏଲଡି ଲାଇଟ୍ , ଗୋଟିଏ ଡିସି ଫ୍ୟାନ୍ ଏବଂ ଦୁର୍ଗମ ଅଂଚଳକୁ ଏକ ବ୍ୟାଟେରୀ ବ୍ୟାଙ୍କ୍ ମଧ୍ୟ ମାଗଣାରେ ମିଳିବ । ୫ ବର୍ଷ ପାଇଁ ମରାମତି ଖର୍ଚ ମଧ୍ୟ ଏହି ଯୋଜନାରେ ଯୋଗାଇ ଦିଆଯିବ ।
ଏହି ଯୋଜନା ପାଇଁ ପ୍ରତି ଗାଁରେ କ୍ୟାମ୍ପ ଲଗାଯାଇ ବିଦ୍ୟୁତ୍ କନେକ୍ସନ ଯୋଗାଇ ଦିଆଯିବ । ମୋବାଇଲ ଆପ୍ ମାଧ୍ୟମରେ ୫୦ ଟଙ୍କାରେ ବିଜୁଳି ମୋବାଇଲ ଦ୍ୱାରା ମଧ୍ୟ ରିଚାର୍ଜ କରାଯାଇପାରିବ । ଯେଉଁଠାରେ ଲାଇନ ଖରାପ ହେବ ତୁରନ୍ତ ମରାମତି କରିବା ପାଇଁ ସବୁ ପ୍ରକାର ବନ୍ଦୋବସ୍ତ କରାଯିବ । ଏହି ଯୋଜନା ପାଇଁ ୧୬ ହଜାର ୩୨୦ କୋଟି ଟଙ୍କାର ବ୍ୟୟ ବରାଦ ରଖାଯାଇଥିବା କହିଛନ୍ତି ମୋଦି । ଏଥିରେ କେନ୍ଦ୍ର ସରକାର ଖର୍ଚ କରିବେ ୧୨ ହଜାର ୩୨୦ କୋଟି ଟଙ୍କା । ସୌଭାଗ୍ୟ ଯୋଜନାରେ ମୋଟ ଅଟକଳର ୬୦ ପ୍ରତିଶତ ଅନୁଦାନ କେନ୍ଦ୍ର ସରାକର ବହନ କରିବେ ଏବଂ ବିଶେଷ ରାଜ୍ୟ ପାଇଁ ୮୫ ପ୍ରତିଶତ ଅନୁଦାନ ବହନ କରିବେ ।
ରାଜ୍ୟ ସରାକରଗୁଡ଼ିକ ୧୦ ପ୍ରତିଶତ ଅନୁଦାନ ଆକାରରେ ଦେବେ । ଏହି ଯୋଜନା ଦ୍ୱାରା ଦେଶର ବିକାଶ ଗତି ବୃଦ୍ଧି ପାଇବ । ଶିକ୍ଷା, ସ୍ୱାସ୍ଥ୍ୟ ଗମନାଗମନ କ୍ଷେତ୍ରରେ ସୁଧାର ଆସିପାରିବ । ଆର୍ଥିକ ବିକାଶ ହେବା ସହ ସାମାଜିକ ବିକାଶ ମଧ୍ୟ ହେବ । ଗାଁ ଓ ଦୁର୍ଗମ ଅଂଚଳରେ ରହୁଥିବା ମହିଳା, ଶିଶୁ ଏବଂ ଶିକ୍ଷାର୍ଥୀମାନଙ୍କ ଜୀବନର ସ୍ତରରେ ଉନ୍ନତିରେ ସହାୟକ ହୋଇପାରିବ ବୋଲି ମୋଦି କହିଛନ୍ତି । ଏହା ସହିତ କିରାସିନ ପାଇଁ ସବସିଡି ଆକାରରେ ଯେଉଁ ବଡ଼ ପରିମାରଣ ଅର୍ଥ ଖର୍ଚ କରାଯାଉଛି ତାହା ମଧ୍ୟ ସଂଚୟ କରାଯାଇପାରିବ । ଏହି ଯୋଜନାକୁ ଲାଗୁ କରିବା ପାଇଁ ନୋଡାଲ ଏଜେନସି ଭାବେ ରୁରାଲ ଇଲେକ୍ଟ୍ରିଫିକେସନ କରପୋରେସନ ଲିମିଟେଡକୁ ଦାୟିତ୍ୱ ଦିଆଯିବାକୁ ନିଷ୍ପତି ହୋଇଛି ।