ଓଡିଶାରୁ ଗଲା ନିମନ୍ତ୍ରଣ, ଦିଲ୍ଲୀରୁ ଆସିଲା ଶୁଭେଚ୍ଛା । ବାହାଘର ପାଇଁ ନିମନ୍ତ୍ରଣ କରିଥିଲେ କଟକ ଝିଅ, ନିମନ୍ତ୍ରଣ ରକ୍ଷା କରି ନବଦମ୍ପତ୍ତିଙ୍କୁ ଆଗୁଆ ଶୁଭେଚ୍ଛା ଦେଲେ ପ୍ରଧାନମନ୍ତ୍ରୀ
କନକ ବ୍ୟୁରୋ: ଓଡିଆ ଝିଅର ନିମନ୍ତ୍ରଣ ରକ୍ଷା କଲେ ମୋଦି । କଟକ ଝିଅର କଥା ରଖି ନିମନ୍ତ୍ରଣ ପତ୍ରର ଶୁଭେଚ୍ଛା ଜଣାଇଲେ ପ୍ରଧାନମନ୍ତ୍ରୀ । ବାହାଘର ପୂର୍ବରୁ କଟକ ଯୁବତୀ ରଞ୍ଜିତା ନାୟକଙ୍କୁ ମିଳିଛି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଭିନନ୍ଦନ ଭରା ଚିଠି । ନୂଆ ଜୀବନ ଆରମ୍ଭ କରିବା ପୂର୍ବରୁ ରଞ୍ଜିତା ମୋଦିଙ୍କ ଠାରୁ ଏଭଳି ଆର୍ଶୀବାଦ ପାଇ ଖୁସିରେ ଫାଟି ପଡୁଥିବା ବେଳେ ଏହା ତାଙ୍କ ଜୀବନର ବଡ ଉପହାର ବୋଲି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତେବେ ନିକଟରେ ଯୁବ ବ୍ୟବସାୟ ଅରବିନ୍ଦଙ୍କ ସହ ରଞ୍ଜିତାଙ୍କ ବିବାହ ସ୍ଥିର ହେବା ପରେ ସେ ପ୍ରଧାନମନ୍ତ୍ରୀଙ୍କ ପାଖକୁ ନିମନ୍ତ୍ରଣ ପତ୍ର ପଠାଇଥିଲେ । ଗତ ୧୦ ତାରିଖରେ ସେ ନିଜେ ଦିଲ୍ଲୀ ଯାଇ ମୋଦିଙ୍କୁ ଏ ନିମନ୍ତ୍ରଣ କରିଥିଲେ । ଯଦିଓ ସେ ସମୟରେ ମୋଦି ବିଦେଶ ଗସ୍ତରେ ଥିଲେ ମାତ୍ର ତାଙ୍କ କାର୍ଯ୍ୟାଳୟ ପକ୍ଷରୁ ରଞ୍ଜିତାଙ୍କ ନିମନ୍ତ୍ରଣକୁ ଗ୍ରହଣ କରାଯାଇଥିଲା । ଆଉ ଶେଷରେ ମୋଦି ତାଙ୍କ ନିମନ୍ତ୍ରଣ ରକ୍ଷା କରି ତାଙ୍କୁ ଶୁଭେଚ୍ଛା ପତ୍ର ପଠାଇଛନ୍ତି ।
ମୋଦିଙ୍କ ଆଦର୍ଶରେ ଅନୁପ୍ରାଣିତ ହୋଇ ରଞ୍ଜିତା ବିଜେପିରେ ଯୋଗ ଦେଇଥିଲେ । ଆଉ ମୋଦି ୨ୟ ଥର ପ୍ରଧାନମନ୍ତ୍ରୀ ହୋଇ ଆସିବା ପରେ ହିଁ ସେ ବିବାହ କରିବେ ବୋଲି ମଧ୍ୟ ପଣ କରିଥିଲେ । ତେବେ ମୋଦିଙ୍କୁ ସମ୍ମାନ ଦେଉଥିବା ଆଉ ଖୁବ ଭଲପାଉଥିବା ରଞ୍ଜିତା ନିଜ ବିବାହର ପ୍ରଥମ କାର୍ଡ ତାଙ୍କୁ ପଠାଇଥିଲେ । ଆସନ୍ତା ୧୧ ତାରିଖରେ ଅରବିନ୍ଦ ଓ ରଞ୍ଜିତାଙ୍କ ବିବାହ ଥିବାରୁ ତା ଆଗରୁ ନବଦମ୍ପତ୍ତିଙ୍କ ନୂଆ ଜୀବନ ପାଇଁ ଅଭିନନ୍ଦନ ଜଣାଇଛନ୍ତି ପ୍ରଧାନମନ୍ତ୍ରୀ । ତେବେ ମୋଦିଙ୍କ ଆଶିର୍ବାଦ ପାଇ ବେଶ ଖୁସି ଅଛନ୍ତି ରଞ୍ଜିତାଙ୍କୁ ବିବାହ କରୁଥିବା ଯୁବକ ଅରବିନ୍ଦ ।
ସେପଟେ ଖାଲି ମୋଦି ନୁହଁନ୍ତି କେନ୍ଦ୍ରମନ୍ତ୍ରୀ ରାଜନାଥ ସିଂହ, ଏବଂ ବାଚସ୍ପତି ଓମ ବିର୍ଲା ମଧ୍ୟ ରଞ୍ଜିତାଙ୍କୁ ଶୁଭେଚ୍ଛା ଜଣାଇଛନ୍ତି । ବାହାଘର ପାଇଁ ପୂରା ପରିବାର ବ୍ୟସ୍ତ ଥିବା ବେଳେ ମୋଦିଙ୍କ ଶୁଭେଚ୍ଛା ସାରା ପରିବାର ପାଇଁ ଖୁସି ଆଣିଦେଇଛି ।