ପିପିଲି ପଲିଟିକ୍ସ ! ପୁଣି ବିଜୟୀ ହେବାର ଦମ୍ଭୋକ୍ତି ବାଢ଼ିଲେ ମହାରଥୀ, ବିଜେପି ଓ କଂଗ୍ରେସର ଆଶାୟୀ ଅନେକ ।
କନକ ବ୍ୟୁରୋ: ପିପିଲି ବିଧାୟକ ପ୍ରଦୀପ ମହାରଥୀଙ୍କ ଦମ୍ଭୋକ୍ତି ପୁଣି ପିପିଲିରେ ପିନ୍ଧିବେ ବିଜୟ ତିଳକ । ଏପରିକି ମହାରଥୀ କହିଛନ୍ତି ଯେ, ଆଗକୁ ଥିବା ନିର୍ବାଚନରେ ପିପିଲିରେ ତାଙ୍କ ବିପକ୍ଷରେ କେହି ପ୍ରତିନ୍ଦ୍ୱନ୍ଦି ନାହାନ୍ତି । ଏହାସହ ଦଳୀୟ ଟିକେଟ୍ ତାଙ୍କୁ କି ତାଙ୍କ ପରିବାରରେ କାହାକୁ ମିଳିବା ନେଇ ଚାଲୁଥିବା ଚର୍ଚ୍ଚାକୁ ଖଣ୍ଡନ କରିଛନ୍ତି ମହାରଥୀ । କହିଛନ୍ତି, ଗୁଜବକୁ ମୁଁ ବିଶ୍ୱାସ କରେ ନାହିଁ । ପିପିଲିରେ ବିଜେଡିର ବିଜୟ ସୁନିଶ୍ଚିତ ହେବ । ଲୋକମାନେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପ୍ରତି ଆସ୍ଥା ବଜାୟ ରଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସେପଟେ କଂଗ୍ରେସ ପିପିଲରେ କଂଗ୍ରେସ ବିଜେଡିର ପ୍ରମୂଖ ପ୍ରତିଦ୍ୱନ୍ଦୀ ରହିଥଲେ ସୁଦ୍ଧା ଦଳୀୟ ଟିକେଟ୍ କାହାକୁ ମିଳିବ ତାହା ବର୍ତ୍ତମାନ ଦ୍ୱନ୍ଦରେ ରହିଛି । କାରଣ ପିପିଲି କଂଗ୍ରେସ ମଣ୍ଡଳ ସଭାପତି ଅଜିତ ମଙ୍ଗରାଜଙ୍କୁ ଟିକେଟ୍ ମିଳିବ ବୋଲି ବେଶ୍ ଆଶାୟୀ ଅଛନ୍ତି । ଅନ୍ୟପଟେ ପ୍ରଦୀପ ମହାରଥୀଙ୍କୁ କଡ଼ା ଟକ୍କର କେବଳ କଂଗ୍ରେସର ପିପିଲି ନେତା ଯୁଧିଷ୍ଠିର ସାମନ୍ତରାୟ ଦେଇପାରିବେ ବୋଲି ରାଜନୀତି ମହଲରେ ଶୁଣିବାକୁ ମିଳୁଛି । କିନ୍ତୁ ଯୁଧିଷ୍ଠିର ସାମନ୍ତରାୟ ବାରମ୍ବାର ଜେଲ ଯାଇ ଫେରିବା ଘଟଣା ପିପିଲି କଂଗ୍ରେସ ପାଇଁ ପ୍ରଭାବ ପକାଇପାରେ ବୋଲି ବିଭିନ୍ନ ମହଲରେ ଚର୍ଚ୍ଚା ହେଉଛି ।
ଅନ୍ୟପଟେ ବିଜେଡି ଗଡ଼କୁ ଧସେଇ ପସିବା ପାଇଁ ବିଜେପି କ୍ୟାମ୍ପରେ ରଣନୀତି ପ୍ରସ୍ତୁତ ହୋଇଛି । ପିପିଲି ବିଜେପି ନେତା ଆଶ୍ରିତ ପଟ୍ଟନାୟକ ଓ ବିକାଶ ପଟ୍ଟନାୟକ ଉଭୟ ବିଜେଡି ଓ କଂଗ୍ରେସକୁ କଡ଼ା ଟକ୍କର ଦେବାକୁ ସଜବାଜ ହେଉଛନ୍ତି । ଆଶ୍ରିତ ପଟ୍ଟନାୟକ ୨୦୦୭ରୁ ୨୦୧୨ ପର୍ଯ୍ୟନ୍ତ କଂଗ୍ରେସ ସମର୍ଥିତ ପିପିଲି ଚେୟାମ୍ୟାନ୍ ଥିବା ସହ ୨୦୧୨ରୁ ୨୦୧୭ ପର୍ଯ୍ୟନ୍ତ ପିପିଲି କଂଗ୍ରେସର ଜିଲ୍ଲାପରିଷଦ ପ୍ରାର୍ଥୀ ଥିଲେ ଆଶ୍ରିତ । କିନ୍ତୁ ଗତ ଜିଲ୍ଲାପରିଷଦ ନିର୍ବାଚନରେ ଆଶ୍ରିତଙ୍କୁ ଟିକେଟ୍ ମିଳିଲାନି । ତେଣୁ ସେ ସ୍ୱାଧିନ ପ୍ରାର୍ଥୀ ଭାବେ ଛିଡ଼ା ହୋଇଥିଲେ ଏବଂ କଂଗ୍ରେସ ଦୁଇଫାଳ ହୋଇଥିଲା । ଯାହାଫଳରେ ଯୁଧିଷ୍ଠିର ପରାଜୟ ହୋଇଥିଲେ ।
ଏବେ ଆଶ୍ରିତ ପଟ୍ଟନାୟକ ପିପିଲି ବିଜେପି ମଙ୍ଗ ଧରିଛନ୍ତି । କିନ୍ତୁ ତାଙ୍କ ବାଟଓଗାଳୁଛନ୍ତି ଆଉ ଜଣେ ବିଜେପି ଆଶାୟୀ ପ୍ରାର୍ଥୀ ବିକାଶ ପଟ୍ଟନାୟକ ବୋଲି ଚର୍ଚ୍ଚା ହେଉଛି । ଯାହଙ୍କ ଜେଜେ ବାପା ରାମଚନ୍ଦ୍ର ପଟ୍ଟନାୟକ ଦୁଇ ଦୁଇ ଥର ପିପିଲି ବିଧାୟକ ରହି ଆସିଛନ୍ତି । ତେଣୁ ଯଦି ରାଜନୀତି ସମୀକ୍ଷକଙ୍କ ଅଙ୍କକୁ ତର୍ଜମା କରାଯାଏ ଏବେ ପିପିଲିରେ ଉଭୟ କଂଗ୍ରେସ ଓ ବିଜେପିର ଦୁଇ ଦୁଇ ଜଣ ଆଶାୟୀ ପ୍ରାର୍ଥୀ ବାହାରିଲେଣି ଯାହା ଶାସକ ବିଜେଡି ତଥା ପିପିଲି ବିଧାୟକ ପ୍ରଦୀପ ମହାରଥୀଙ୍କୁ ଫାଇଦା ଦେଇପାରେ । କିନ୍ତୁ ନିକଟରେ ମନ୍ତ୍ରୀ ପଦରୁ ଇସ୍ତଫା ଦେଇଥିବା ମହାରଥୀଙ୍କ ବିରୋଧରେ ଉଭୟ ବିରୋଧୀ ପିପିଲି ଗଣଦୁଷ୍କର୍ମ ପ୍ରସଙ୍ଗ ଉଠାଇ ଗର୍ଜିବେ ବୋଲି ଯୋଜନା କରୁଥିବା ଚର୍ଚ୍ଚା ହେଉଛି ।