ବଣଭୋଜି ପାଇଁ ଯିବା କେନ୍ଦୁଝର । ଗୁଣ୍ଡିଚାଘାଗି ଜଳପ୍ରପାତରେ ଭୋଜି ଓ ସାନଘାଗରା ଓ ବଡଘାଗରାରେ ବୋଟିଂ
ଶୀତ ସାଙ୍ଗକୁ ନୂଆ ପର୍ଯ୍ୟଟନ ସ୍ଥାନ ବୁଲିବାର ନିଆରା ଅନୁଭୁତି । ବୋଟିଂ ସାଙ୍ଗକୁ ପ୍ରାକୃତିକ ସୌନ୍ଦର୍ଯ୍ୟ ପରିବେଶରେ ସାଙ୍ଗସାଥୀଙ୍କ ସହ ବଣଭୋଜିର ମଜ୍ଜା । ଜୀବନର ଭିଡ ଭିତରୁ କିଛି ସମୟ ବାହାର କରି ଖୁସିହେବର ବିଶେଷ ମୁହୁର୍ତ୍ତକୁ ସମସ୍ତେ ଉପଭୋଗ କରିବା ପାଇଁ ଆଗ୍ରହୀ ଥାଆନ୍ତି । ଆଉ ଟିକେ ଫୁରସତ ପାଇଲେ ବାହାରିଯାଆନ୍ତି ପିକନିକ ପାଇଁ । ଆଉ ଏହି ସମୟରେ ଆମେ ଆପଣହ୍କୁ ସାହାଯ୍ୟ କରିବୁ । ଆଜି ଆମେ ଯିବା କେନ୍ଦୁଝର ।
Kanak News is now on WhatsApp
Join and get latest news updates delivered to you via WhatsApp
ଦେଖିବା ଅନେକ ଦର୍ଶନୀୟ ସ୍ଥାନ ଯାହା ନିଆରା ଅନୁଭୁତି ଦେବା ସହ ଏହାର ପ୍ରାକୃତିକ ପରିବେଶରେ ହଜଯିବେ ଆପଣ । ଖଣିଖାଦାନରେ ଭରପୂର କେନ୍ଦୁଝର ଜିଲ୍ଲାରେ ରହିଛି ଅନେକ ମନୋରମ ସ୍ଥାନ । ପ୍ରାକୃତିକ ପରିବେଶ ସାଙ୍ଗକୁ ଜଳପ୍ରପାତ,ଯୁଆଙ୍ଗମାନଙ୍କ ବସତି, ବୈତରଣୀର ଉତ୍ପତ୍ତିସ୍ଥଳ, ସାନଘାଗରା, ବଡଘାଗରା, ଗୁଣ୍ଡିଚାଘାଗି ଝଲପ୍ରପାତ ଭଳି ସ୍ଥାନ ଗୁଡିକ ଆପଣଙ୍କ ହୃଦୟରେ ଆଣିଦେବ ନୂଆ ଶିହରଣ । ଭୁବନେଶ୍ୱର ଠାରୁ ମାତ୍ର ୨୩୫ କିଲୋମିଟର ଦୂର କେନ୍ଦୁଝର । ଏଠାରେ ବଣଭୋଜି ସାଙ୍ଗକୁ ବୁଲାବୁଲି କରିବା ପାଇଁ ରହିଛି ଅନେକ ପର୍ଯ୍ୟଟନସ୍ଥଳୀ ।
କେନ୍ଦୁଝରରେ ଦେଖିବେ କ’ଣ ?
ବଡଘାଗରା: ଦୁଇ ଶହ ଫୁଟର ଉଚ୍ଚରୁ ଖସୁଛି ପାଣି । ଜିଲ୍ଲାର ସବୁଠାରୁ ଭଲ ପିକନିକ ସ୍ପଟ । ଏହାକୁ ଦେଖିବା ପାଇଁ ରାଜ୍ୟର ତଥା ରାଜ୍ୟବାହାରର ବିଭିନ୍ନ ପ୍ରାନ୍ତରୁ ଛୁଟିଆସିଥାଆନ୍ତି ସମସ୍ତେ । ବୋଟିଂର ମଜା ସାଙ୍ଗକୁ ବଣ ଭିତରେ ବୁଲିବାର ନିଆରା ଅନୁଭୁତି ସାଉଁଟିପାରିବେ ଆପଣ । କେନ୍ଦୁଝର ଟାଉନ ଠାରୁ ମାତ୍ର ଦଶକିଲୋମିଟର ଦୂର ।
ସାନଘାଗରା: କେନ୍ଦୁଝରର ଟାଉନ ଠାରୁ ମାତ୍ର ଛଅ କିଲୋମିଟର ଦୂରରେ ରହିଛି ସାନଘାଗରା ଜଳପ୍ରପାତ । ଆଖି ଝଲସିବା ଭଳି ଦୃଶ୍ୟ ଦେଖିବାକୁ ପାଇବେ ଏଠି । ତା ସହ ଏଠାକାର ପ୍ରାକୃତିକ ଦୃଶ୍ୟ ଅତ୍ୟନ୍ତ ଆକର୍ଷଣୀୟ । ପାଖାପାଖି ଶହେ ଫସ୍ୱଙ୍କ ଉଚ୍ଚ ପାହାଡ ଉପରୁ ପାଣି ଖସୁଥିବା ଦେଖିଲେ ଯେକେହି କିଛି ସମୟ ପାଇଁ ଅଟକି ଯିବ ।
ଗୁଣ୍ଡିଚାଘାଗି : ଘଟଗାଁ ଠାରୁ ମାତ୍ର ଅଳ୍ପ ଦୂରରେ ଅବସ୍ଥିତ ଏହି ଛୋଟିଆ ଜଳପ୍ରପାତର । ପିକନିକ ପାଇଁ ଏହି 
ସ୍ଥାନଟି ସମସ୍ତଙ୍କ ପାଇଁ ଭଲ । ସବୁଜ, ଘଂଚ ଜଙ୍ଗଲ ଭିତରେ ୫୦ଫୁଟରୁ ପାଣି ଖସୁଥିବା ଦୃଶ୍ୟ ସାଙ୍ଗକୁ ଥଣ୍ଡାପାଣିରେ ପିଲାଙ୍କ ଗାଧୋଇବାର ମଜ୍ଜା ଆପଣଙ୍କୁ ଦେବ ନୂଆ ଅନୁଭୁତି । ଏଠାକାର ପ୍ରାକୃତିକ ପରିବେଶ ଦେଖିଲେ ଆପଣ ବିଶ୍ୱାସ କରିପାରିବେ ନାହିଁ ଯେ, ଆମ ଓଡିଶାରେ ଏଭଳି କିଛି ସ୍ୱତନ୍ତ୍ର ସ୍ଥାନ ରହିଛି ।
ହଦଗଡ: ବର୍ଷ ସାରା ଚାଲିଥାଏ ଏଠାରେ ବଣଭୋଜି । ଏହା ହେଉଛି ଶାଳନ୍ଦୀ ନଦୀଉପରେ ଏକ ଡ୍ୟାମ । ପର୍ଯ୍ୟଟନମାନଙ୍କ ପାଇଁ ଏଠାରେ ବଙ୍ଗଳାର ବ୍ୟବସ୍ଥା ରହିଛି । ଏହା ଆନନ୍ଦପୁର ଠାରୁ ମାତ୍ର ୩୫ କିଲୋମିଟର ଦୂର । ପ୍ରାକୃତିକ ପରିବେଶ ଦେଖି ଆପଣ ମୁଗ୍ଧ ହୋଇଯବେ ।
ଏହାଛଡା ଆପଣ ଆହୁରି ଅନେକ ସୁନ୍ଦର ସ୍ଥାନ ବୁଲି ଦେଖିପାରିବେ । ଗଡଚଣ୍ଡୀ, ଚକ୍ରତୀର୍ଥ, କାଂଜିପାଣି, ରଘୁନାଥଜୀଉ ମଠ,ଖଣ୍ଡାଧାର, ସୀତାବିଞ୍ଜି, ଘଟଗାଁରେ ମା’ ତାରିଣୀଙ୍କର ପ୍ରସିଦ୍ଧ ମନ୍ଦିର ଦେଖିଲେ ଆପଣ କିଛି ସମୟ ପାଇଁ ହଜିଯିବେ । ତେବେ ଆଉ ଡେରି କାହିଁକି ଜଲଦି ବାହାରନ୍ତୁ ଏହି ପ୍ରାକୃତିକ ପରିବେଶରେ କିଛି ସମୟ ହଜିଯିବା ପାଇଁ ।