୫ବର୍ଷର ରେକର୍ଡ ଭାଙ୍ଗିଲା ତେଲ ଦର ! ଓଡ଼ିଶାରେ ୭୫ ଟଙ୍କା ଟପିଲା ପେଟ୍ରୋଲ, ୭୨ ଟଙ୍କା ଡେଇଁଲା ଡିଜେଲ

1

କନକ ବ୍ୟୁରୋ : ବଢ଼ିଚାଲିଛି ପେଟ୍ରୋଲ ଦର । କର୍ଣ୍ଣାଟକ ନିର୍ବାଚନ ଦୃଷ୍ଟିରୁ ୧୯ ଦିନ ପର୍ଯ୍ୟନ୍ତ ସ୍ଥିର ଥିବା ତେଲ ଦର ଏବେ ପ୍ରତିଦିନ ବୃଦ୍ଧି ପାଇବାରେ ଲାଗିଛି । ମାତ୍ର ସପ୍ତାହକ ଭିତରେ ପେଟ୍ରୋଲ ଓ ଡିଜେଲ୍ ମୂଲ୍ୟ ପାଖାପାଖି ଦେଢ଼ ଟଙ୍କା ବଢିସାରିଲାଣି । ଏପରି ଦରବୃଦ୍ଧି ନେଇ ଗ୍ରାହକଙ୍କ ମନରେ ଅସନ୍ତୋଷ ବଢୁଥିବା ବେଳେ ଅନ୍ତର୍ଜାତୀୟ ବଜାର ଉପରକୁ ଦୋଷ ଠେଲିଛନ୍ତି ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ।

petrol and diseal
image courtesy – www.loksatta.com

ଗତ ୧୩ ତାରିଖ ଅର୍ଥାତ କର୍ଣ୍ଣାଟକ ନିର୍ବାଚନ ଦିନ ଭୁବନେଶ୍ୱରରେ ପେଟ୍ରୋଲ ଥିଲା ଲିଟର ପିଛା ୭୩ ଟଙ୍କା ୬୪ ପଇସା, ୨୦ ତାରିଖରେ ଏହା ବୃଦ୍ଧି ପାଇ ୭୫ ଟଙ୍କା ୬ ପଇସାରେ ପହଁଚିଛି । ଏହି ସମୟ ମଧ୍ୟରେ ଡିଜେଲ ୭୦ ଟଙ୍କା ୮୮ ପଇସାରୁ ବଢି ୭୨ଟଙ୍କା ୪୩ ପଇସାରେ ପହଁଚିଛି । ସେହିପରି କଟକରେ ପେଟ୍ରାଲ ଲିଟର ପିଛା ରହିଛି ୭୫ ଟଙ୍କା ୨୧ ପଇସା ଓ ଡିଜେଲ୍ ଲିଟର ପିଛା ରହିଛି ୭୨ ଟଙ୍କା ୫୬ । ବ୍ରହ୍ମପୁରରେ ପେଟ୍ରୋଲ ୭୫ ଟଙ୍କା ୯୧ ପଇସା, ଡିଜେଲ୍ ୭୩ ଟଙ୍କା ୨୭ ପଇସା, ସମ୍ବଲପୁରରେ ପେଟ୍ରୋଲ ୭୫ ଟଙ୍କା ୪୫ ପଇସା ଓ ଡିଜେଲ୍ ପହଁଚିଛି ୭୨ ଟଙ୍କା ୮୨ ପଇସାରେ । ରାଉରକେଲାରେ ପେଟ୍ରୋଲ ୭୫ ଟଙ୍କା ୧୬ ପଇସା, ଡିଜେଲ ୭୨ ଟଙ୍କା ୩୬ ପଇସା, ନୟାଗଡ଼ରେ ପେଟ୍ରୋଲ ୭୫ ଟଙ୍କା ୩୨ ପଇସା, ଡିଜେଲ ୭୨ ଟଙ୍କା ୪୫ ପଇସା ରହିଛି । ତେବେ ଜୟପୁରରେ ପେଟ୍ରୋଲ ପହଁଚି ଯାଇଛି ୭୮ ଟଙ୍କା ୪ ପଇସା, ଆଉ ଡିଜେଲ ପହଁଚିଛି ୭୫ ଟଙ୍କା ୪୦ ପଇସାରେ ।

ଦରବୃଦ୍ଧି ନେଇ ଗ୍ରାହକଙ୍କ ମନରେ ଅସନ୍ତୋଷ ସୃଷ୍ଟି ହୋଇଥିବା ବେଳେ ଅନ୍ତର୍ଜାତୀୟ ବଜାର ଉପରକୁ ଦୋଷ ଠେଲିଛନ୍ତି ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଅନ୍ତର୍ଜାତୀୟ ବଜାରରେ ଅଶୋଧିତ ତୈଳର ମୂଲ୍ୟ ବୃଦ୍ଧି ପାଇ ବ୍ୟାରେଲ ପିଛା ୮୦ ଡଲାରରୁ ଅଧିକ ସ୍ତରରେ ରହିଛି । ସେହିପରି ଡଲାର ତୁଳନାରେ ଟଂକାର ବିନିମୟ ମୂଲ୍ୟ ୬୮ ଟଂକା ଉପରେ ପହଁଚିଛି । ଏହି ଦୁଇ କାରଣରୁ ଅଶୋଧିତ ତେଲ ମହଂଗା ହେବାରେ ଲାଗିଛି । ଏହା ସାଂଗକୁ ବିଭିନ୍ନ ଉଭୟ କେନ୍ଦ୍ର ଓ ରାଜ୍ୟ ସରକାରଙ୍କ ଟିକସର ବୋଝ ଯୋଗୁଁ ଆକାଶଛୁଆଁ ହେଉଛି ତେଲ ଦର ।

Comments are closed.