ପୁରୀ ସତ୍ୟବାଦୀରେ ଓଡ଼ିଆ ବିଶ୍ୱବିଦ୍ୟାଳୟ ସ୍ଥାପନ ପ୍ରସଙ୍ଗ : ନବୀନ ନିବାସରେ ମୁଖ୍ୟମନ୍ତ୍ରୀଙ୍କୁ ଭେଟି କୃତଜ୍ଞତା ଜଣାଇଲେ ସ୍ଥାନୀୟ ଅଂଚଳ ଓ ବିଭିନ୍ନ ସଂଗଠନର ହଜାର ହଜାର ଲୋକ
କନକ ବ୍ୟୁରୋ : ପୁରୀ ସତ୍ୟବାଦୀରେ ଓଡ଼ିଆ ବିଶ୍ୱବିଦ୍ୟାଳୟ ସ୍ଥାପନ ନେଇ ଐତିହ୍ୟ କ୍ୟାବିନେଟରେ ଘୋଷଣା ହେବା ପରେ ଆଜି ବିଭିନ୍ନ ସଂଗଠନ ପକ୍ଷରୁ ମୁଖ୍ୟମନ୍ତ୍ରୀଙ୍କୁ ସମ୍ବର୍ଦ୍ଧିତ କରାଯାଇଛି । ନବୀନ ନିବାସରେ ପାଖାପାଖି ୩ ହଜାରୁ ଅଧିକ ଲୋକ ମୁଖ୍ୟମନ୍ତ୍ରୀଙ୍କୁ ଭେଟି ଧନ୍ୟବାଦ ଦେଇଛନ୍ତି । ବିଭିନ୍ନ ଶିକ୍ଷା ସଂଗଠନ, ଭିନ୍ନକ୍ଷମ ସଂଘ, ବିଜେଡି ମହିଳା ମୋର୍ଚ୍ଚା, ବିଭିନ୍ନ ଛାତ୍ରସଂଗଠନ ନବୀନଙ୍କୁ ଭେଟି ଧନ୍ୟବାଦ ଜଣାଇଛନ୍ତି । ସତ୍ୟବାଦୀରେ ଓଡିଆ ବିଶ୍ୱବିଦ୍ୟାଳୟ ପାଇଁ ରାଜ୍ୟ ସରକାର ୨୫ ଏକର ଜମି ଯୋଗାଇ ଦେବେ । ସତ୍ୟବାଦୀ ବକୁଳବନରୁ ଓଡ଼ିଶାର ଶିକ୍ଷାକ୍ଷେତ୍ରରେ ଏକ ନୂଆ ଅଧ୍ୟାୟ ସୃଷ୍ଟି ହୋଇଥିଲା । ଉତ୍କଳମଣି ଗୋପବନ୍ଧୁ ଏହି ସ୍ଥାନରୁ ଶିକ୍ଷାଦାନ ଆରମ୍ଭ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
ଓଡିଆ ଜାତି ଯେତେବେଳେ ନିଜ ସ୍ଥିତି ନେଇ ସଂଘର୍ଷ କରୁଥିଲା, ସେହି ସମୟରେ ସତ୍ୟବାଦୀରେ ଇଂରେଜ ଶାସନ କାଳରେ ୧୯୦୯ ମସିହାରେ ଗୁରୁକୁଳର ଆଦର୍ଶରେ ଏହି ଶିକ୍ଷାନୁଷ୍ଠାନ ଗଢିଥିଲେ ଉତ୍କଳମଣି ପଣ୍ଡିତ ଗୋପବନ୍ଧୁ ଦାସ । ତାଙ୍କର ଏହି ଆନ୍ଦୋଳନରେ ଯୋଡି ହୋଇଥିଲେ ଅନ୍ୟ ୪ ଜଣ ସହଯୋଗୀ – ଆଚାର୍ଯ୍ୟ ହରିହର, ପଣ୍ଡିତ ନୀଳକଣ୍ଠ ଦାସ, କୃପାସିନ୍ଧୁ ମିଶ୍ର ଓ ଗୋଦାବରୀଶ ମିଶ୍ର । ଏହି ପାଂଚଜଣଙ୍କ ପ୍ରଚେଷ୍ଟାରେ ଚାଲିଥିଲା ଏହି ଆଦର୍ଶ ଶିକ୍ଷାନୁଷ୍ଠାନ । ସତ୍ୟବାଦୀର ସେହି ଐତିହାସିକ ସ୍ଥାନରେ ଓଡିଆ ବିଶ୍ୱବିଦ୍ୟାଳୟ ତିଆରି କରିବା ନିଷ୍ପତ୍ତି ଭାଷା ଓ ସାହିତ୍ୟ ତଥା ପଂଚ ସଖାଙ୍କ ପ୍ରତି ସମ୍ମାନ ବୋଲି କୁହାଯାଉଛି ।