ଛାଡ଼ିଗଲା ବର୍ଷା ହେଲେ ପ୍ରଭାବ ରହିଗଲା : ପାଣି ଭିତରେ ବୁଡି ରହି ଉଜୁଛି ଯାଇଛି ପନିପରିବା ଚାଷ
କନକ ବ୍ୟୁରୋ : ବର୍ଷା କମିଯିବା ପରେ ଏବେ ବନ୍ୟାର ଆଶଙ୍କା ନାହିଁ । ହେଲେ ବନ୍ୟା ଛାଡି ଯାଇଥିବା ପାଣି, ପ୍ରଭାବିତ ଲୋକଙ୍କ ପାଇଁ ଅଭିଶାପ ପାଲଟି ଯାଇଛି । ରାଜ୍ୟର ବିଭିନ୍ନ ସ୍ଥାନରେ ଏବେ ବି ଲୋକ ପାଣି ଘେରରେ ଥିବା ବେଳେ ଅନେକ ସ୍ଥାନରେ ବର୍ଷା ଯୋଗୁଁ ଚାଷ ଉଜୁଡି ଯାଇଛି । ଶହ ଶହ ଏକର ତଳି ପାଣି ଭିତରେ ବୁଡି ରହିବା ସହ ପନିପରିବା ଚାଷ ଉଜୁଡି ଯାଇଛି । ଏଭଳି ସ୍ଥିତିରେ ପୁଣି ଥରେ ସ୍ୱାଭାବିକ୍ ଅବସ୍ଥା ଫେରିବା ସତେ ଯେମିତି ପ୍ରଭବାତି ଲୋକଙ୍କ ପାଇଁ କଷ୍ଟକର ହୋଇ ପଡ଼ିଛି ।
Kanak News is now on WhatsApp
Join and get latest news updates delivered to you via WhatsApp
ବର୍ଷା ଛାଡିଛି, ବନ୍ୟା ଆଶଙ୍କା ଟଳିଛି, ହେଲେ ଲଗାଣ ବର୍ଷା ଛାଡି ଯାଇଥିବା ପାଣି ଏବେ ଜନଜୀବନକୁ ଅସ୍ତବ୍ୟସ୍ତ କରି ଦେଇଛି । କେଉଁଠି ଏବେ ବି ଲୋକ ପାଣି ଘେରରେ ଅଛନ୍ତି, ତ ଆଉ କେଉଁଠି ଉଜୁଡି ଯାଇଛି ଚାଷୀଙ୍କ ଫସଲ । ବାଙ୍କୀରେ ବ୍ଲକର ୭ଟି ପଂଚାୟତର ପ୍ରାୟ ୨୦ ହଜାର ଲୋକ ଏବେ ବି ପାଣି ଘେରରେ ଦିନ କାଟୁଛନ୍ତି ।
ଏପଟେ ନିଆଳିରେ ବି ସମାନ ଅବସ୍ଥା । ଚାଷ ଜମିରେ ମାଡି ଯାଇଛି ବନ୍ୟା ପାଣି । ତଳି ସଂପୂର୍ଣ୍ଣ ନଷ୍ଟ ହୋଇଯାଇଥିବା ବେଳେ ପନିପରିବା ଚାଷ ମଧ୍ୟ ଉଜୁଡି ଯାଇଛି । ଅସ୍ତରଙ୍ଗ ପାଇଁ ଚିନ୍ତା ବଢ଼ାଇଛି ଦେବୀ ନଦୀର ପାଣି । ଅଧନ୍ତରିଆ ହୋଇପଡ଼ିଥିବା ବନ୍ଧ ଲୋକଙ୍କ ନିଦ ହଜାଇ ଦେଇଛି । ଏସବୁ ଭିତରେ ଆଂଠୁଏ ପାଣି ଭିତରେ ଯାତାୟତ କରୁଛନ୍ତି ଲୋକେ ।
ବଡ କଥା ହେଉଛି, ବନ୍ୟା ସ୍ଥିତି ଯୋଗୁଁ ବ୍ୟାପକ ଭାବରେ ପ୍ରଭାବିତ ହୋଇଛି ଓଡ଼ିଶା । ରାଜ୍ୟରେ ୩ ଲକ୍ଷ ଲୋକ ବନ୍ୟା ଯୋଗୁଁ ପ୍ରଭାବିତ ହୋଇଛନ୍ତି । ୫ ହଜାର ଘର ଆଂଶିକ ଭାବରେ ଭାଙ୍ଗି ଯାଇଛି । ୫୦ଟି ରିଲିଫ୍ କେନ୍ଦ୍ରରେ ୧୨ ହଜାର ଲୋକଙ୍କୁ ଥଇଥାନ କରାଯାଇଛି । ବନ୍ୟା ସମୟରେ ୧୪ ଜଣଙ୍କ ମୃତ୍ୟୁ ହୋଇଛି । ସେଥିରୁ ୬ ଜଣ ବୁଡି, ୨ଜଣ ସାପ କାମୁଡ଼ା, ଆଉ କିଛି ଲୋକ କାନ୍ଥ ପଡ଼ି ମୃତ୍ୟୁବରଣ କରିଛନ୍ତି ।
ଏପଟେ ଚାଷ ନଷ୍ଟ ହେବା ପ୍ରସଙ୍ଗରେ ସମୀକ୍ଷା କରିଛନ୍ତି କୃଷି ମନ୍ତ୍ରୀ ପ୍ରଦୀପ ମହାରଥୀ । ବିଭନ୍ନ ସ୍ଥାନରେ ବର୍ଷା ଯୋଗୁଁ ତଳି ନଷ୍ଟ ହୋଇଯାଇଥିବାରୁ ଚାଷୀଙ୍କ ରିହାତି ଦରରେ ବିହନ ଯୋଗଇ ଦେବା ପାଇଁ ନିର୍ଦ୍ଦେଶ ଦିଆଯାଇଛି । ଏହା ସହ କ୍ଷୟକ୍ଷତିର ଆକଳନ କରିବାକୁ ନିର୍ଦ୍ଦେଶ ଦେଇଛନ୍ତି କୃଷି ମନ୍ତ୍ରୀ । ବର୍ଷା ଓ ବନ୍ୟା ଆଶଙ୍କା ଟଳିଯିବା ପରେ ପ୍ରଭାବିତ ଲୋକଙ୍କ ସମସ୍ୟାର ସମାଧାନ କରିବା ଏବେ ପ୍ରଶାସନ ପାଇଁ, ସବୁଠାରୁ ବଡ ଚ୍ୟାଲେଂଜ୍ ପାଲଟିଛି ।
ସେପଟେ ସମ୍ବଲପୁରରେ ବାଦଲଫଟା ବର୍ଷା ଫଳରେ ଦେଖାଦେଇଥିବା ବନ୍ୟା ପରିସ୍ଥିତିର ସମୀକ୍ଷା କରିବାକୁ ପହଂଚିଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । କେବଳ ସମ୍ବଲପୁର ନୁହେଁ ଜମାଦାରପାଲିଠାରେ ୧୦ଟି ଜିଲ୍ଲାରେ ବନ୍ୟା କ୍ଷୟକ୍ଷତିର ସମୀକ୍ଷା କରିଛନ୍ତି ନବୀନ । ଆଗାମୀ ୨୪ ଘଂଟା ମଧ୍ୟରେ କ୍ଷୟକ୍ଷତିର ଆକଳନ କରି ରିପୋର୍ଟ ଦେବାଲାଗି ସେ ସମସ୍ତ ବିଭାଗକୁ ନିର୍ଦ୍ଦେଶ ଦେଇଛନ୍ତି । ସେହିପରି ଆଜି ସୁବର୍ଣ୍ଣପୁରରେ ବୃକ୍ଷ ରୋପଣ ସହ ସବୁଜ ମହାନଦୀ ରଥର ଶୁଭାରମ୍ଭ କରିଛନ୍ତି ମୁଖ୍ୟମନ୍ତ୍ରୀ । ଓଡିଶାର ଜୀବନ ରେଖା ମହାନଦୀର ଜଳ ପ୍ରବାହକୁ ଅବ୍ୟାହତ ରଖିବା ପାଇଁ ସବୁଜ ମହାନଦୀ ମିଶନର ପରିକଳ୍ପନା କରାଯାଇଛି । ଚଳିତବର୍ଷ ସବୁଜ ମହାନଦୀ ମିଶନ ମାଧ୍ୟମରେ ମହାନଦୀ ଏବଂ ଏହାର ଉପନଦୀ ତେଲ ଓ ଇବ ଉପକୂଳ ଅଂଚଳର ଉଭୟ ପାଶ୍ୱର୍ରେ ସବୁଜ ବଳୟ ସୃଷ୍ଟି କରିବା ଏହି ଅଭିଯାନର ମୂଳ ଲକ୍ଷ୍ୟ । ଏଥିସହ ରାଜ୍ୟର ପ୍ରମୁଖ ନଦୀ ଏବଂ ଉପନଦୀର ଉଭୟ ପାଶ୍ୱର୍ରେ ଆସନ୍ତା ବର୍ଷଠାରୁ ପର୍ଯ୍ୟାୟକ୍ରମେ ବନୀକରଣ କରାଯିବ । ୫ ବର୍ଷରେ ରାଜ୍ୟରେ ସବୁ ପ୍ରମୁଖ ନଦୀଗୁଡିକର ଉଭୟ ପାଶ୍ୱର୍ରେ ୪୧ ହଜାର ହେକ୍ଟରରେ ଏବଂ ୫ ହଜାର କୋଟି ଟଙ୍କାରେ ୫ କୋଟିରୁ ଅଧିକ ବୃକ୍ଷ ରୋପଣ କରାଯିବାକୁ ଲକ୍ଷ୍ୟ ରଖାଯାଇଛି ।