ଏଣିକି ଜରି ଧରିଲେ ଦେବେ ଜରିମାନା । ଖାଉଟି, ଦୋକାନୀ, ହୋଟେଲ ମାଲିକ କେହି ପଡିବେନି ବାଦ୍
ଭୁବନେଶ୍ୱରବାସୀଙ୍କ ପାଇଁ ବଡ ଖବର । ଏଣିକି ପଲିଥିନ ବ୍ୟବହାର କଲେ ଗଣିବେ ତଣ୍ଡ, ବିଏମସି ବୈଠକରେ ହେଲା ବଡ ନିଷ୍ପତି । ଅଭିଯୋଗ ପାଇଁ ଫୋନ ନମ୍ବର ଜାରି କଲା ବିଏମସି
କନକ ବ୍ୟୁରୋ : ରାଜ୍ୟରେ ପ୍ଲାଷ୍ଟିକ ବ୍ୟାନର ଆଜି କଣ୍ଟ ପୁରିଛି । ଏଣିକି ପ୍ଲାଷ୍ଟିକ ବ୍ୟବହାର କଲେ ହେବ ଦଣ୍ଡବିଧାନ । ରାଜ୍ୟ ସରକାର ଜାରି କରିଥିବା ନିର୍ଦ୍ଦେଶାନାମା ଅନୁସାରେ ପଲିଥିନ ବ୍ୟାନ ଲାଗି କଂଟ ପୁରିବା ପରେ ଏଣିକି ପଲିଥିନ ବିକ୍ରି କଲେ ସଂପୃକ୍ତ ଦୋକାନୀ ଓ କଂପାନୀ ମାଲିକଙ୍କ ଉପରେ କାର୍ଯ୍ୟାନୁଷ୍ଠାନ ହେବ ବୋଲି କହିଛନ୍ତି ଜଙ୍ଗଲ ଓ ପରିବେଶ ନିର୍ଦ୍ଦେଶକ । ଛୋଟ ଛୋଟ ଦୋକାନୀ ଯଦି ପଲିଥିନ ବିକ୍ରି କରନ୍ତି ତେବେ ୩ରୁ ୭ହଜାର ଟଙ୍କାର ଜରିମାନା ଆଦାୟ କରିବା ପାଇଁ ସୁନିସିପାଲିଟି ଓ ଜିଲ୍ଲାପାଳଙ୍କୁ ଚିଠି ଲେଖିଛି ପରିବେଶ ବିଭାଗ ।
Kanak News is now on WhatsApp
Join and get latest news updates delivered to you via WhatsApp
ପ୍ଲାଷ୍ଟିକ ବ୍ୟାନ ନେଇ ଭୁବନେଶ୍ୱର ମହାନଗର ନିଗମ ବୈଠକରେ ପ୍ଲାଷ୍ଟିକ କଟକଣା ନେଇ ଆଜି ଗୁରୁତ୍ୱପୂର୍ଣ୍ଣ ନିଷ୍ପତି ନିଆଯାଇଛି । ଏଥିରେ ନିଷିଦ୍ଧ ପଲିଥିନ ବ୍ୟବହାର କଲେ ଖାଉଟିଙ୍କୁ ମଧ୍ୟ ଜରିମାନା ଦେବାକୁ ପଡିବ । ପ୍ରଥମ ଥର ଧରାପଡିଲେ ୨୦୦ ଟଙ୍କା, ଦ୍ୱିତୀୟ ଥର ଧରାପଡିଲେ ୫୦୦ ଟଙ୍କା ଓ ତୃତୀୟ ଥର ଜରି ବ୍ୟବହାର କରୁଥିବା ବେଳେ ଧରାପଡିଲେ ୧୦୦୦ଟଙ୍କା ଜରିମାନା ଦେବାକୁ ପଡିବ । ଏହାପରେ ପୁଣି ଏହି ନିଷିଦ୍ଧ ସାମଗ୍ରୀ ବ୍ୟବହାର କଲେ ବ୍ୟବହାରକାରୀଙ୍କ ବିରୋଧରେ ଫୌଜଦାରୀ ମାମଲା ରୁଜୁ କରିବ ବିଏମସି ।
ସେହିଭଳି ଦୋକାନୀ ତଥା ରାସ୍ତାକଡ ଉଠା ଦୋକାନୀମାନେ ପଲିଥିନ ବ୍ୟବହାର କଲେ ସେମାନଙ୍କୁ ମଧ୍ୟ ତଣ୍ଡ ଗଣିବାକୁ ପଡିବ । ପ୍ରଥମ ଥର ଭୁଲ କଲେ ୫୦୦ ଟଙ୍କା, ଦ୍ୱିତୀୟ ଥର ପାଇଁ ୧୦୦୦ ଏବଂ ତୃତୀୟ ଥର ପ୍ଲାଷ୍ଟିକ ବ୍ୟବହାର କରୁଥିଲେ ୨୦୦୦ଟଙ୍କା ଫାଇନ୍ ଦେବାକୁ ପଡିବ । ପରବର୍ତୀ ସମୟରେ ଧରାପଡିଲେ ଏହି ଦୋକାନୀଙ୍କ ବିରୋଧରେ ମଧ୍ୟ ଫୌଜଦାରୀ ମାମଲା ରୁଜୁ ହେବ । ସେହି ପରି ଛୋଟ ଛୋଟ ହୋଟେଲ- ରେଷ୍ଟୁରାଂଟ ମଧ୍ୟ ଏଥିରୁ ବାଦ ପଡିବେ ନାହିଁ । ପ୍ଲାଷ୍ଟିକ ବ୍ୟାନ ପରେ ଯଦି ଏହାର ବ୍ୟବହାର କରୁଥାନ୍ତି ତେବେ ଯଥାକ୍ରମେ ୧୦୦୦, ୨୦୦୦ ଓ ୫୦୦୦ ଟଙ୍କା ଫାଇନ ଦେବେ । ଏହାପରେ ଯଦି ନିୟମ ନ ମାନନ୍ତି ତେବେ ତାଙ୍କର ଦୋକାନର ଲାଇସେନ୍ସ ରଦ୍ଦ କରାଯିବ ।
ଅନ୍ୟପଟେ ଷ୍ଟାର କାଟାଗୋରୀ ପାଇଥିବା ହୋଟେଲ ଓ ରେଷ୍ଟୁରାଣ୍ଟରେ ଯଦି ନିୟମ ଭାଙ୍ଗନ୍ତି ତେବେ ଯଥାକ୍ରମେ ୨୦୦୦, ୧୦,୦୦୦ ଓ ୫୦,୦୦୦ ଟଙ୍କା ଜରିମାନା ଆଦାୟ କରିବ ବିଏମସି । ଏହାପରେ ହୋଟେଲ କର୍ତ୍ତୃପକ୍ଷ ନିୟମ ଭାଙ୍ଗନ୍ତି ତେବେ ତାଙ୍କ ଲାଇସେନ୍ସ ରଦ୍ଦ କରାଯିବା ସହ ଫୌଜଦାରୀ ମାମଲା ରୁଜୁ କରାଯିବ । ସେହିଭଳି ଏହି ସର୍ମ୍ପକିତ ଅଭିଯୋଗ ପାଇଁ ମଧ୍ୟ ଫୋନ ଓ ହ୍ୱାଟସଆପ ନମ୍ବର ଜାରି କରିଛି ବିଏମସି ।ଅଭିଯୋଗକାରୀ ମାନେ ୧୮୦୦୩୪୫୦୦୬୧ ନିଶ୍ୁଳ୍କ ଫୋନ ନମ୍ବରରେ ନିଜର ଅଭିଯୋଗ ଜଣାଇପାରିବେ । ସେହିଭଳି ନିଜର ଅଭିଯୋଗ ୮୫୯୯୦୭୧୯୦୦ ହ୍ୱାଟସଆପ ନମ୍ବରରେ ମଧ୍ୟ ପଠାଇପାରିବେ ବୋଲି ବିଏମସି ବୈଠକରେ ନିଷ୍ପତି ନିଆଯାଇଛି ।