ଏଆଇସିସି ବୈଠକରେ ରାହୁଲ ଗାନ୍ଧୀଙ୍କ ନିର୍ଦ୍ଦେଶ: ଫେବ୍ରୁୟାରୀ ଶେଷ ସୁଦ୍ଧା ଚୂଡାନ୍ତ ପ୍ରାର୍ଥୀ ତାଲିକା ପ୍ରସ୍ତୁତ କରିବାକୁ କହିଲେ କଂଗ୍ରେସ ଅଧ୍ୟକ୍ଷ
କନକ ବ୍ୟୁରୋ: ଆଗାମୀ ସାଧାରଣ ନିର୍ବାଚନ ପାଇଁ ଦିଲ୍ଲୀରେ ଚାଲିଛି କଂଗ୍ରେସର ମାରାଥନ ବୈଠକ । ଆଉ କଂଗ୍ରେସର କମ ବ୍ୟାକ ପ୍ଲାନ ନେଇ ଏକ ବଡ ରଣନୀତି ସାମନାକୁ ଆସିଛି । ଦିଲ୍ଲୀ ବୈଠକରେ ଯୋଗଦେବା ପାଇଁ ପହଚିଂଛନ୍ତି ପିସିସି ସଭାପତି ନିରଂଜନ ପଟ୍ଟନାୟକ ଓ ବିରୋଧୀ ଦଳ ନେତା ନରସିଂହ ମିଶ୍ର । ତେବେ ଦିଲ୍ଲୀରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ନିରଂଜନ କହିଛନ୍ତି, ଫେବ୍ରୁୟାରୀ ଶେଷ ସୁଦ୍ଧା ଚୁଡାନ୍ତ ପ୍ରାର୍ଥୀ ତାଲିକା ପ୍ରସ୍ତୁତ କରିବାକୁ ନିର୍ଦ୍ଦେଶ ଦେଇଛନ୍ତି ରାହୁଲ ଗାନ୍ଧୀ ।
Kanak News is now on WhatsApp
Join and get latest news updates delivered to you via WhatsApp
ତେବେ ନିର୍ବାଚନର ବହୁ ପୂର୍ବରୁ ୫୦ ପ୍ରତିଶତ ପ୍ରାର୍ଥ ତାଲିକା ପ୍ରକାଶ କରାଯିବ ବୋଲି ବାରମ୍ବାର ଦାବି କରି ଆସୁଥିଲେ ପିସିସି ମୁଖିଆ । ହେଲେ ଏହି ଡେଡଲାଇନ ଗଡିଗଡି ଚାଲିଛି । ନିର୍ବାଚନକୁ ଅଳ୍ପ କେଇ ମାସ ବାକି ଥିବା ବେଳେ ଦିଲ୍ଲୀରେ ପ୍ରଥମେ ପ୍ରଭାରୀ ଓ ପରେ ରାଜ୍ୟ ନେତୃତ୍ୱଙ୍କ ସହ ମାରାଥନ ବୈଠକ କରୁଛନ୍ତି ରାହୁଲ ଗାନ୍ଧୀ ।
ଜାତୀୟ ଗଣମାଧ୍ୟମରେ ହେଉଥିବା ଚର୍ଚ୍ଚା ଅନୁସାରେ ୨୦୧୯ ନିର୍ବାଚନ ପାଇଁ ରାହୁଲ ଗାନ୍ଧୀଙ୍କ କଡା ନିର୍ଦ୍ଦେଶ । ୩ ଥର ହାରିଥିବା ପ୍ରାର୍ଥୀ ଆଉ କଂଗ୍ରେସ ଟିକେଟରେ ନିର୍ବାଚନ ଳଢିପାରିବେ ନାହିଁ ବୋଲି ରାଜ୍ୟ ପ୍ରଭାରୀମାନଙ୍କୁ ସଫା ଶୁଣାଇଦେଇଛନ୍ତି ଦଳର ଅଧ୍ୟକ୍ଷ । ଯେଉଁମାନେ ଲୋକଙ୍କ ଦ୍ୱାରା ବାରମ୍ବାର ପ୍ରତ୍ୟାଖାନ ହେଉଛନ୍ତି ସେମାନଙ୍କୁ ଆଉ ଟିକେଟ ନଦେବା ପାଇଁ ରାଜ୍ୟ ନେତୃତ୍ୱଙ୍କୁ କୁହାଯାଇଛି ।
ଅର୍ଥାତ ତଳ ସ୍ତରରେ କଂଗ୍ରେସ କିଭଳି ଗ୍ରହଣୀୟ ହୋଇପାରିବ ସେ ଦିଗରେ କାମ କରିବାକୁ ନେତା ଓ କର୍ମୀଙ୍କୁ ନିର୍ଦ୍ଦେଶ ଦିଆଯାଇଛି । ଏନେଇ ପ୍ରତିକ୍ରିୟା ରଖି ବିରୋଧୀ ଦଳ ମୁଖ୍ୟ ସଚେତକ ତାରାବାହିନୀ ପତି କହିଛନ୍ତି ଯେ ରାହୁଲଙ୍କ ନିଷ୍ପତିକୁ ସେ ସ୍ୱାଗତ କରୁଛନ୍ତି । ଏପରିକି ତଳ ସ୍ତର ଲୋକଙ୍କ ଚିନ୍ତାଧାରାକୁ ରାହୁଲ ବୁଝିପାରିଥିବା ପ୍ରତିକ୍ରିୟାରେ କହିଛନ୍ତି ତାରା ବାହିନୀପତି ।