ପଟ୍ଟାମୁଣ୍ଡାଇ କଲେଜରେ ଅଣଛାତ୍ରଙ୍କ ଦୌରାତ୍ମ୍ୟ! ଧମକ ଦେବା ସହ ଛାତ୍ର ମାନଙ୍କୁ ମାଡ ମାରୁଥିବା ଅଭିଯୋଗ, କଲେଜରେ ତାଲା ପକାଇ ଆନ୍ଦୋଳନକୁ ଓହ୍ଳାଇଲେ ଛାତ୍ରଛାତ୍ରୀ
କନକ ବ୍ୟୁରୋ : ବାରମ୍ବାର ଅଣଛାତ୍ର ପ୍ରବେଶକୁ ନେଇ ପଟ୍ଟାମୁଣ୍ଡାଇ କଲେଜରେ ଛାତ୍ର ଅଶାନ୍ତି ଦେଖା ଦେଇଛି । ଏପରିକି ଏହାକୁ ନେଇ ଛାତ୍ରଛାତ୍ରୀ ମାନେ ଆନ୍ଦୋଳନକୁ ଓହ୍ଳାଇଛନ୍ତି । କଲେଜ ଗେଟରେ ତାଲା ପକାଇ ବନ୍ଦ କରିବା ସହ ଟାୟାର ଜାଳି ପ୍ରତିବାଦ କରିଛନ୍ତି ଛାତ୍ରଛାତ୍ରୀ । ଫଳରେ ପାଠ ପଢାରେ ବାଧା ସୃଷ୍ଟି ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ସୂଚନା ଅନୁଯାୟୀ, ଗତକାଲି କଲେଜରେ କିଛି ଅପରାଧିକ କାର୍ଯ୍ୟକଳାପରେ ଲିପ୍ତ ଥିବା ଅଣଛାତ୍ର ମାନେ ପଶି ଛାତ୍ର ମାନଙ୍କୁ ମାଡ ମାରିବା ସହ ବନ୍ଧୁକ ଦେଖାଇ ଧମକ ଚମକ ଦେଇଥିଲେ । ଏନେଇ ଛାତ୍ର ମାନେ କଲେଜ କର୍ତ୍ତୃପକ୍ଷଙ୍କୁ କହିଥିଲେ ମଧ୍ୟ ଚିରାଚରିତ ଢଙ୍ଗରେ ବୁଝିଦେବା କହି ଚାଲି ଯାଇଥିଲେ । ତେବେ କଲେଜ କର୍ତ୍ତୃପକ୍ଷ ଏନେଇ କୌଣସି ପଦକ୍ଷେପ ନ ନେବା ଅଭିଯୋଗ କରି ଆଜି ଛାତ୍ରଛାତ୍ରୀ ମାନେ ଆନ୍ଦୋଳନକୁ ଓହ୍ଳାଇଥିଲେ । ତେବେ ପରେ ଘଟଣାସ୍ଥଳରେ କଲେଜ ଅଧ୍ୟକ୍ଷ, ତହସିଲଦାର ଓ ପୋଲିସ ଅଧିକାରୀ ପହଞ୍ଚି ବୁଝାସୁଝା କରିବା ସହ ଏନେଇ ପଦକ୍ଷେପ ନେବାକୁ କହିବା ପରେ ଆନ୍ଦୋଳନରୁ ଉଠିଥିଲେ ଛାତ୍ରଛାତ୍ରୀ ।
ଗତ କିଛି ବର୍ଷ ହେଲା ପଟ୍ଟାମୁଣ୍ଡାଇ ମହାବିଦ୍ୟାଳୟରେ ଅଣଛାତ୍ର ମାନେ ପଶି ଆତଙ୍କ ସୃଷ୍ଟି କରୁଛନ୍ତି । ଏପରିକି କଲେଜ ପରିସରରେ ଛାତ୍ର ମାନଙ୍କୁ ମାଡ ମାରିବା ସହ ଧମକ ଚମକ ଦେଉଥିବାର ଅଭିଯୋଗ ହୋଇଛି । ଏହାଛଡା କଲେଜ ପରିସରରେ ଏହି ଅଣଛାତ୍ର ମାନେ ନିଶାର ଆସର ଜମାଉଛନ୍ତି ଓ ମାରଣାସ୍ତ୍ର ଧରି ବୁଲୁଛନ୍ତି ।ଯାହା ଛାତ୍ରଛାତ୍ରୀ ମାନଙ୍କ ମଧ୍ୟରେ ଭୟ ସୃଷ୍ଟି କରିଛି । ଏହାଦ୍ୱାରା ଛାତଛାତ୍ରୀଙ୍କ ପାଠ ପଢ଼ାରେ ମଧ୍ୟ ବାଧା ଦେଖା ଦେଉଛି । ତେଣୁ କଲେଜ ପରିସରରେ ଅଣଛାତ୍ର ପ୍ରବେଶକୁ ବନ୍ଦ କରିବାକୁ ଛାତ୍ରଛାତ୍ରୀ ମାନେ ଦାବି କରୁଛନ୍ତି ।