ଆଜି ପାଟଣା ଗାନ୍ଧି ମୈଦାନରେ ଶକ୍ତି ପ୍ରଦର୍ଶନ କରିବେ ଲାଲୁ ! ‘ବିଜେପି ଭଗାଓ ଦେଶ ବଚାଓ’ ଅଭିଯାନର ନେତୃତ୍ୱ ନେଉଛନ୍ତି ଆରଜେଡ଼ି ମୁଖ୍ୟ
କନକ ବ୍ୟୁରୋ : ଆଜି ବିହାର ପାଟଣାର ଗାନ୍ଧି ମୈଦାନରେ ରାଷ୍ଟ୍ରିୟ ଜନତା ଦଳ ମୁଖ୍ୟ ଲାଲୁ ପ୍ରସାଦ ଯାଦବ କରିବେ ଶକ୍ତି ପ୍ରଦର୍ଶନ । ଆୟୋଜିତ ହେବ ଲାଲୁଙ୍କ ମହାରାଲି ବିଜେପି ଭଗାଓ ଦେଶ ବଚାଓ ଅଭିଯାନ । ବିଜେପିକୁ ବିରୋଧ କରି ଏହି ରାଲିର ଡାକରା ଦେଇଛନ୍ତି ଲାଲୁ । ଏହି ରାଲିରେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜି, ୟୁପିର ପୂର୍ବତନ ମୁଖ୍ୟମନ୍ତ୍ରୀ ଅଖିଳେଶ ଯାଦବ, ଜେଡିୟୁର ପୂର୍ବତନ ଅଧ୍ୟକ୍ଷ ତଥା ସାଂସଦ ଶରଦ ଯାଦବ , କଂଗ୍ରେସର ବରିଷ୍ଠ ନେତା ଗୁଲାମନବୀ ଆଜାଦ ଯୋଗ ଦେବାର କାର୍ଯ୍ୟକ୍ରମ ରହିଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ରାଲିକୁ ସଫଳ କରିବା ପାଇଁ ରାଜ୍ୟର କୋଣ ଅନୁକୋଣରୁ ଆରଜେଡି କର୍ମୀଙ୍କୁ ଆଣିବାରେ ଲାଗି ପଡିଛନ୍ତି ନିଜେ ତେଜସ୍ୱୀ ଯାଦବ । ଏଥିପାଇଁ ସମସ୍ତ ପ୍ରସ୍ତୁତିର ଅନୁଧ୍ୟାନ ତେଜସ୍ୱୀ ନିଜେ କରୁଛନ୍ତି । ରାଲି ପୂର୍ବରୁ ପାଟଣା ସହର ସମ୍ପୂର୍ଣ୍ଣ ଭାବେ ସୁବଜ ରଙ୍ଗର ପୋଷ୍ଟରରେ ଛାଇ ଯାଇଛି । ଏହା ସହିତ ‘ଲୋକନାୟକ ଜୟପ୍ରକାଶ ନାରାୟଣ ଦ୍ୱାର’ ନାଁରେ ଏକ ଗେଟ୍ ନିର୍ମାଣ କରାଯାଇଛି । ଅନ୍ୟପଟେ ଜେଡିୟୁର ବରିଷ୍ଠ ନେତା ଶରଦ ଯାଦବଙ୍କ ଅଡୁଆ ଦିନକୁ ଦିନ ତୀବ୍ର ହେବାରେ ଲାଗିଛି । ପରୋକ୍ଷଭାବେ ଦଳ ଛାଡିବା ପାଇଁ ଶରଦଙ୍କୁ ଇଙ୍ଗିତ କରିଛି ଜେଡିୟୁ ।
ଆଜି ଆୟୋଜିତ ହେବାକୁ ଥିବା ଆରଜେଡି ବିଶାଳ ରାଲିରେ ଶରଦ ଯୋଗ ଦେବା ପାଇଁ ସମର୍ଥନ ଜଣାଇବା ପରେ ତାଙ୍କୁ ଏବେ ମିଳିଛି ଦଳ ପକ୍ଷରୁ ଚିଠି । ଚିଠିରେ ଉଲ୍ଲେ୍ଖ ରହିଛି କି, ଲାଲୁଙ୍କ ରାଲିରେ ସାମିଲ ହେବା ଶରଦଙ୍କ ନିଜସ୍ୱ ଇଚ୍ଛା । ତେଣୁ ଦଳ ମନେକରୁଛି କି ଶରଦ ସ୍ୱଇଚ୍ଛାରେ ଦଳ ଛାଡି ସାରିଛନ୍ତି । ମେଂଟ ଭାଙ୍ଗିବା ପରେ ଶରଦ ଦଳର ମାପଦଣ୍ଡର ଉଲଂଘନ କରିଥିବା ମଧ୍ୟ ଉକ୍ତ ଚିଠିରେ ଉଲ୍ଲେଖ କରାଯାଇଛି ।
ପ୍ରକୃତରେ କହିବାକୁ ଗଲେ ବିଜେପି ଓ ମୋଦିଙ୍କୁ ଏକାଠି କରିବାକୁ ଏ ଯାଏଁ ବିରୋଧୀ ଏକାଠି ହୋଇପାରିନାହାନ୍ତି । ଆଜି ପାଟନାରେ ଲାଲୁଙ୍କ ଶକ୍ତି ପ୍ରଦର୍ଶନରେ ସୋନିଆ ଗାନ୍ଧି, ରାହୁଲ ଗାନ୍ଧି ଓ ବିଏସପି ସୁପ୍ରିମୋ ମାୟାବତୀ ସାମିଲ ହେବେ ନାହିଁ । ୨୦୧୯ରେ ମୋଦିଙ୍କ ବିରୋଧରେ କାହାକୁ ବିରୋଧୀ ମୁହଁ ଭାବେ ଉପସ୍ଥାପିତ କରାଯିବ ସେ ନେଇ ବିରୋଧୀ ନିଷ୍ପତ୍ତି ନେଇପାରୁନାହାନ୍ତି ।
କଂଗ୍ରେସ ରାହୁଲ ଗାନ୍ଧିଙ୍କୁ ଉପସ୍ଥାପିତ କରିବାକୁ ଚାହିୁଁଛି । କିନ୍ତୁ ଅନ୍ୟ ଦଳ ଏଥିରେ ପ୍ରାୟତଃ ଏକମତ ହୋଇପାରୁନାହାନ୍ତି । ଏହାଛଡା ଉତ୍ତରପ୍ରଦେଶ, ପଶ୍ଚିମବଙ୍ଗ ଓ କେରଳ ଭଳି ରାଜ୍ୟରେ ବିଭିନ୍ନ ଦଳ ପରସ୍ପର ବିରୋଧରେ ଲଢୁଛନ୍ତି । ପଶ୍ଚିମବଙ୍ଗରେ ମମତାଙ୍କ ବିରୋଧ ସିପିଏମ ହୋଇଥିବାବେଳେ କେରଳରେ ସିପିଏମ ବିରୋଧରେ ଲଢୁଛି କଂଗ୍ରେସ । ଉତ୍ତରପ୍ରଦେଶରେ ସମାଜବାଦୀ ପାର୍ଟି ଓ ବହୁଜନ ସମାଜ ପାର୍ଟି ଅଲଗା ଅଲଗା ଲଢୁଛନ୍ତି । ଏଭଳି କ୍ଷେତ୍ରରେ ବିରୋଧୀ କେମିତି ଏକାଠି ହେବେ ସେ ନେଇ ମଧ୍ୟ ପ୍ରଶ୍ନ ଉଠିଛି ।