ନାବାଳିକାଙ୍କ ସୁରକ୍ଷା ପାଇଁ ଅଂଟା ଭିଡ଼ିଲା ପୁଲିସ : ସାରା ରାଜ୍ୟରେ ବୁଲିବ ପରୀ ରଥ, ୨୮ ରେ ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ
କନକ ବ୍ୟୁରୋ : ନାବାଳିକାଙ୍କ ସୁରକ୍ଷା ପାଇଁ ଅଂଟା ଭିଡ଼ିଲା ପୁଲିସ୍ । ସାରା ରାଜ୍ୟରେ ବୁଲିବ ପରୀ ରଥ । ନାବାଳିକାଂକ ପ୍ରତି ଘଟୁଥିବା ନିର୍ଯାତନାକୁ ରୋକିବାକୁ ରାଜ୍ୟ ପୁଲିସ୍ ପକ୍ଷରୁ ପରୀ ପାଇଁ କଥାଟିଏ ନାମରେ ଏକ ଜନ ଜାଗରଣ ଆରମ୍ଭ ହେବ । ଏହି ଅଭିଯାନ ପାଇଁ ଚୂଡ଼ାନ୍ତ ଖସଡ଼ା ପ୍ରସ୍ତୁତ ହୋଇ ସାରିଛି । ଏହି ମହାଅଭିଯାନକୁ ପ୍ରଥମେ ଭୁବନେଶ୍ୱରରୁ ଆରମ୍ଭ କରାଯିବ । ଚଳିତମାସ ୨୮ ତାରିଖରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର ଶୁଭାରମ୍ଭ କରିବେ ।
Kanak News is now on WhatsApp
Join and get latest news updates delivered to you via WhatsApp
୨୮ ତାରିଖରୁ ଜୁନ୍ ୧୨ ତାରିଖ ପର୍ଯ୍ୟନ୍ତ ୧୫ ଦିନ ଧରି ସାରା ରାଜ୍ୟରେ ପରୀ ରଥ ମାଧ୍ୟମରେ ଜନ ଜାଗରଣ ସୃଷ୍ଟି କରାଯିବ । ପୁଲିସ୍ ଓ ୟୁନିସେଫ୍ ପକ୍ଷରୁ ଆୟୋଜିତ ଏକ କର୍ମଶାଳାରେ ପୁଲିସ୍ ଡିଜି ରାଜେନ୍ଦ୍ର ପ୍ରସାଦ ଶର୍ମା ଏନେଇ ସୂଚନା ଦେଇଛନ୍ତି । ଜନ ଜାଗରଣ ପାଇଁ ୩୦ଟି ଜିଲ୍ଲାରେ ୧୫ଟି ପରୀ ରଥ ଗଡ଼ିବ । ଗୋଟିଏ ରଥ ୨ଟି ଜିଲ୍ଲାରେ ପରିକ୍ରମା କରିବ । ପ୍ରତି ରଥରେ ଜଣେ ନୋଡାଲ ଅଫିସରଙ୍କ ସହ ୪ ଜଣ ପୁଲିସ୍ ଅଧିକାରୀ ରହିବେ । ରଥ ଗୁଡ଼ିକରେ ଏଲଇଡି ମାଧ୍ୟମରେ ସଚେତନତା ଭିଡିଓ ପ୍ରଦର୍ଶନ କରାଯିବ। ସଚେତନତା ଭିଡିଓ ପ୍ରଦର୍ଶନ ସହ ଲିଫଲେଟ୍ ପୋଷ୍ଟର ଓ ପାମ୍ପଲେଟ୍ ଲୋକଙ୍କୁ ବଂଟାଯିବ । ଜିଲ୍ଲା ସ୍ତରରେ ଆରକ୍ଷୀ ଅଧୀକ୍ଷକମାନେ ଏହରେ ନେତୃତ୍ୱ ନେବେ। ସେହିପରି ରେଞ୍ଜ ସ୍ତରରେ ରେଞ୍ଜ ଆଇଜି କିମ୍ବା ଡିଆଇଜିମାନେ ନେତୃତ୍ୱ ନେବେ।