ମାନସିକ ବିକାରଗ୍ରସ୍ତ ଦୁଇ ପୁଅଙ୍କ ଚିକିତ୍ସା ପାଇଁ ଅର୍ଥ ସାଜିଛି ବାଧକ ! ସରକାରୀ ସହାୟତା ଲୋଡିଲେ ପରିବାର ସଦସ୍ୟ ।
କନକ ବ୍ୟୁରୋ : ଘରେ ପୁଅ ଜନ୍ମ ହେଲେ ବାପା ମା’ଙ୍କ ସମେତ ପରିବାର ଲୋକ ମଧ୍ୟ ବେସ ଖୁସି ହୋଇଯାଆନ୍ତି । ବାପା ମା’ ଭାବନ୍ତି ତାଙ୍କର ହଜିଯାଇଥିବା ସୁଖ ଫେରାଇ ଆଣିବ ପୁଅ । ଏହି ଭଳି ଅନେକ ସ୍ୱପ୍ନ ସାଉଁଟି ବାପା ମା’ ପିଲାମାନଙ୍କୁ ବଡ କରିଥାନ୍ତି । ଠିକ ସେହିଭଳି କେନ୍ଦ୍ରାପଡା ଜିଲ୍ଲାର ଜଣେ ଦମ୍ପତ୍ତି ତାଙ୍କର ଦୁଇ ପୁଅକୁ ନେଇ ଅନେକ ସ୍ୱପ୍ନ ଦେଖିଥିଲେ । କିନ୍ତୁ ବୋଧ ହୁଏ ବିଧିର ବିଧାନ ଚାହୁଁଥିଲା ଆଉ କିଛି । ପରିଣତ ବୟସରେ ପୁଅ ସାହାରା ହେବ ବୋଲି ଆଶା ରଖିଥିବା ବୃଦ୍ଧ ବାପା ମା’ ଆଜି ସାଜିଛନ୍ତି ଦୁଇ ଦୁଇ ଜଣ ପୁଅଙ୍କ ପୋଷଣା ହାରି । ମାନସିକ ରୋଗରେ ପିଡୀତ ଦୁଇ ପୁଅଙ୍କୁ ଚିକିତ୍ସା କରି ଘରେ ଯାହା କିଛି ସମ୍ବଳ ଥିଲା ତାହା ଶେଷ ହୋଇଗଲାଣି । ଅଭାବ ଅନାଟନରେ ଦିନ କଟୁଥିବା ବେଳେ ଦୁଇ ପୁଅଙ୍କ ଅଧିକ ଚିକିତ୍ସା ପାଇଁ ସରକାରଙ୍କ ସାହାଯ୍ୟକୁ ଚାହିଁ ବସିଛନ୍ତି ବାପା ମା’ ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରାପଡା ଜିଲ୍ଲା ମହଙ୍ଗାପଡା ବ୍ଲକ ଅନ୍ତର୍ଗତ ରାୟଗଡା ଗ୍ରାମରେ ବାସ କରନ୍ତି ରବିନ୍ଦ୍ର ନାୟକ ଏବଂ ତାଙ୍କ ପରିବାର । ପରିବାର କହିଲେ ଦୁଇ ପୁଅ, ପତ୍ନୀ ଏବଂ ବୃଦ୍ଧ ବାପା ମା’ । ରବିନ୍ଦ୍ରଙ୍କ ଦୁଇ ପୁଅ ଜନ୍ମ ହେବା ପରେ କିଛି ଦିନ ହସ ଖୁସିରେ ଦିନ ବିତାଇଥିଲେ ପରିବାର ଲୋକେ । କିଛିଦିନ ବିତିବା ପରେ ହଠାତ୍ ରବିନ୍ଦ୍ରଙ୍କ ବଡ ପୁଅ ତପନ ଏବଂ ସାନ ପୁଅ ଜୀବନଙ୍କ ଠାରେ ଦେଖାଦେଇଥିଲା ମାନସିକ ବିକୃତି । ଦୁଇ ପୁଅଙ୍କୁ ଭଲ କରିବା ଲାଗି ବାପା ମା’ ମେଡିକାଲରେ ଚିକିତ୍ସା ଆରମ୍ଭ କରିଥିଲେ କିନ୍ତୁ କିଛି ସୁଫଳ ମିଳିପାରିନଥିଲା । ରୋଗ ଭଲ ହେବା ବଦଳରେ ଧିରେ ଧିରେ ବଢଚାଲିଲା । ରୋଗକୁ ଭଲ କରିବା ପାଇଁ ଡାକ୍ତର ଉଚ୍ଚ ଚିକିତ୍ସା ପାଇଁ ପରାମର୍ଶ ଦେଇଥିଲେ ମଧ୍ୟ ଅର୍ଥ ଅଭାବରୁ ତାହା ସମ୍ଭବ ହୋଇପାରି ନାହିଁ । ତେଣୁ ବାପା ମା ଏବେ ସରକାରଙ୍କ ସାହାଯ୍ୟକୁ ଚାହିଁବସିଛନ୍ତି । ସରକାର ଯଦି କିଛି ସାହାଯ୍ୟ ଯୋଗାଇ ଦିଅନ୍ତି ତେବେ ଦୁଇ ପୁଅଙ୍କ ଉଚ୍ଚ ଚିକିତ୍ସା ହୋଇପାରନ୍ତା ।
ଦୁଇ ପୋଷଣା ହାରି ପୁଅଙ୍କର ଏ ଅବସ୍ଥା ଦେଖି ଭାଙ୍ଗି ପଡିଛନ୍ତି ରବିନ୍ଦ୍ର । ଜମି ବାଡି ସବୁ ବିକି ପିଲାଙ୍କ ଚିକିତ୍ସାରେ ଖର୍ଚ୍ଚ କରିଦେଇଥିବା ବେଳେ ଦିନ ମଜୁରୀ କରି ପରିବାର ପୋଷଣ କରୁଛନ୍ତି ରବିନ୍ଦ୍ର । ତେଣୁ ପିଲାଙ୍କ ଅଧିକ ଚିକିତ୍ସା ପାଇଁ ରବିନ୍ଦ୍ର ସରକାରଙ୍କ ପାଖରେ ଅନେକ ଗୁହାରି କରିବା ପରେ ସରକାରୀ ସହାୟତା ହିସାବରେ ଦୁଇ ପୁଅଙ୍କୁ ମିଳୁଛି ମାତ୍ର କେଇ ଟଙ୍କା ଭତା । ଏନେଇ ବିଡିଓ କହିଛନ୍ତି, ଆମେ ଏହାର ତଦନ୍ତ କରିବୁ ଯଦି କିଛି ଆବଶ୍ୟକତା ପଡେ ତେବେ ଜିଲ୍ଲାପାଳଙ୍କୁ ଅବଗତ କରାଇ ତାଙ୍କ ଚିକିତ୍ସା ପାଇଁ ସହାୟତା ଯୋଗାଇଦିଆଯିବ ।