ଗାଁରୁ ଆସିଲା ପ୍ରଥମ ପର୍ଯ୍ୟାୟ ରାୟ : ଖସିଲା ବିଜେଡି, ହସିଲା ବିଜେପି
କନକ ବ୍ୟୁରୋ : ପ୍ରଥମ ପର୍ଯ୍ୟାୟ ପଂଚାୟତ ନିର୍ବାଚନରେ ଶାସକ ବିଜେଡି ଦଳକୁ ଶକ୍ତ ଧକା । ପ୍ରଥମ ପର୍ଯ୍ୟାୟ ଭୋଟ୍ ଫଳାଫଳ ଆସିବା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଲୋକପ୍ରିୟତା ପ୍ରତି ଚ୍ୟାଲେଞ୍ଜ ସୃଷ୍ଟି ହୋଇଛି । ଦଶନ୍ଧି ଧରି ବିଜେଡିର ଗଡ ଭାବେ ଚିହ୍ନଟ ଅଂଚଳରେ ବିଜେପି ଧସେଇ ପଶିଛି । ଗତ ଜିଲ୍ଲା ପରିଷଦ ନିର୍ବାଚନ ଫଳାଫଳ ତୁଳନାରେ ଏଥର ପାଖାପାଖି ଏକ ତୃତୀୟାଂଶ ଆସନ ବିଜେଡି ହାତରୁ ଖସିଛି ।
Kanak News is now on WhatsApp
Join and get latest news updates delivered to you via WhatsApp
ପ୍ରଥମ ପର୍ଯ୍ୟାୟରେ ହୋଇଥିବା ୧୮୮ଟି ଜିଲ୍ଲା ପରିଷଦ ଆସନରୁ ୧୦୩ଟି ଆସନ ବିଜେଡି ଅକ୍ତିଆର କରିବାକୁ ସକ୍ଷମ ହୋଇଛି । ଗତ ନିର୍ବାଚନରେ ବିଜେଡି ଏହି ୧୮୮ ଆସନରୁ ୧୪୯ ଆସନକୁ ଦଖଲ କରିଥିଲା । ଫଳରେ ଭାଳେଣିରେ ପଡିଛି ଶାସକ ଦଳ । କିଭଳି ବାକି ଥିବା ୪ଟି ପର୍ଯ୍ୟାୟରେ ଅଧିକରୁ ଅଧିକ ଆସନ ଅକ୍ତିଆର କରିବ ସେନେଇ ବିଜେଡି ନେତାମାନେ ପ୍ରସ୍ତୁତି ଆରମ୍ଭ କରିଛନ୍ତି ।
ବିଜେପିକୁ ଆଶାତୀତ ସଫଳତା ମିଳିଛି । ପଶ୍ଚିମରେ ପୁଣି ଥରେ ପଦ୍ମ ଫୁଟିଛି । ଦକ୍ଷିଣ, ଉତର ଓ ଉପକୂଳ ଓଡିଶାରେ ବି ପୁଣି ଥରେ ମୁଣ୍ଡ ଟେକିଛି ଦଳ । ଗତ ନିର୍ବାଚନରେ ଏହି ୧୮୮ ଆସନ ମଧ୍ୟରୁ ମାତ୍ର ୭ଟି ଆସନ ଦଖଲ କରିଥିଲା ବିଜେପି । ଏଥର ଏହି ସଂଖ୍ୟା ଏକା ଥରକେ ବୃଦ୍ଧି ପାଇ ୭୧ରେ ପହଁଚିଛି । ଏଥିରୁ ଲୋକମାନେ ବିଜେପି ଆଡକୁ ଢ଼ଳୁଥିବା ଏକ ପ୍ରକାର ସ୍ପଷ୍ଟ ହୋଇଛି ।