ଦେଶର ପରବର୍ତ୍ତୀ ପ୍ରଧାନମନ୍ତ୍ରୀ ବାଛୁଛି ପାକିସ୍ତାନ : ସେନା ଓ ଆଇଏସଆଇର ସମର୍ଥନ ଥିବାରୁ ଇମ୍ରାନ ଖାନଙ୍କ ସପକ୍ଷରେ ଯାଇପାରେ ଜନମତ
କନକ ବ୍ୟୁରୋ : ଦେଶର ପରବର୍ତ୍ତୀ ପ୍ରଧାନମନ୍ତ୍ରୀ ବାଛୁଛି ପାକିସ୍ତାନ । ପାକ ଇତିହାସରେ ଏହା ଦ୍ୱିତୀୟ ଘଟଣା, ଯେତେବେଳେ ଗୋଟିଏ ନିର୍ବାଚିତ ସରକାର ହାତରୁ ଆଉ ଗୋଟିଏ ନିର୍ବାଚିତ ସରକାର କ୍ଷମତା ନେବ । ଯଦି ଆକଳନ ଠିକ ରୁହେ ତେବେ କ୍ରିକେଟରରୁ ରାଜନେତା ବନିଥିବା ଇମ୍ରାନ ଖାନ ପାକିସ୍ତାନର ପରବର୍ତ୍ତି ପ୍ରଧାନମନ୍ତ୍ରୀ ହୋଇପାରନ୍ତି । କାରଣ ଚର୍ଚ୍ଚା ଅନୁସାରେ ପାକ ସେନା ଓ ଆଇଏସଆଇର ସମର୍ଥନ ତାଙ୍କ ପଛରେ ରହିଛି । ହେଲେ ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫଙ୍କ ଦଳ ସପକ୍ଷରେ ସମବେଦନାର ଭୋଟ ବି ରହିଛି ।
Kanak News is now on WhatsApp
Join and get latest news updates delivered to you via WhatsApp
ପାକିସ୍ତାନ ଇତିହାସରେ ଦ୍ୱିତୀୟଥର ଲାଗି ଲୋକଙ୍କ ଦ୍ୱାରା ନିର୍ବାଚିତ ଏକ ସରକାର ହାତରୁ ପୁଣି ସେହି ଗଣତାନ୍ତ୍ରିକ ଉପାୟରେ ନିର୍ବାଚିତ ସରକାର ହାତକୁ କ୍ଷମତା ହସ୍ତାନ୍ତର ହେବାକୁ ଯାଉଛି । କାରଣ ପଡୋଶୀ ଦେଶରେ ଅନେକ ସମୟରେ ନିର୍ବାଚିତ ସରକାର ହାତରୁ ସେନା କ୍ଷମତା ଛଡାଇ ନେବାର ନଜିର ରହିଛି । ଯେଉଁଥିପାଇଁ ଏହି କଥାର ବିଶେଷ ଗୁରୁତ୍ୱ ରହିଛି । ପାକ ସଂସଦର ମୋଟ ୨୭୨ ଆସନ ଲାଗି ଛୋଟବଡ ପ୍ରାୟ ୧୦୦ଟି ରାଜନୈତିକ ଦଳ ପ୍ରତିଦ୍ୱନ୍ଦ୍ୱିତା କରୁଥିଲେ ବି ଲଢେଇ ମୁଖ୍ୟତଃ- ଇମରାନ ଖାନଙ୍କ ପାର୍ଟି ପାକିସ୍ତାନ-ତେହରିକ-ଏ-ଇନସାଫ ବା ପିଟିଆଇ, ନୱାଜ ସରିଫଙ୍କ ପାକିସ୍ତାନ ମୁସଲିମ ଲିଗ ଏନ ବା ପିଏମଏଲଏନ ଓ ବିଲାୱଲ ଭୁଟ୍ଟୋଙ୍କ ପାକିସ୍ତାନ ପିପୁଲ୍ସ ପାର୍ଟି ବା ପିପିପି ମଧ୍ୟରେ ହେଉଛି ।
ପାକିସ୍ତାନ ସଂସଦର ୬୦ଟି ସିଟ୍ ମହିଳାଙ୍କ ପାଇଁ ସଂରକ୍ଷିତ ରହିଛି
୧୦ ପ୍ରତିଶତ ଆସନ ହିନ୍ଦୁ ଓ ଅନ୍ୟ ସଂଖ୍ୟାଲଘୁଙ୍କ ପାଇଁ ସଂରକ୍ଷିତ
୨୭୨ ଆସନରେ ପ୍ରତିଦ୍ୱିନ୍ଦ୍ୱିତା କରୁଛନ୍ତି ୩ ହଜାର ୫୪୯ ଜଣ ପ୍ରାର୍ଥୀ
୮୫ହଜାର ପୋଲିଂ ଷ୍ଟେସନରେ ସକାଳ ୮ଟାରୁ ସଂଧ୍ୟା ୬ଯାଏଁ ଭୋଟିଂ
ପ୍ରାୟ ୮ ଲକ୍ଷ ପୋଲିସ ଓ ସୁରକ୍ଷା କର୍ମୀ ବିଭିନ୍ନ ସ୍ଥାନରେ ମୁତୟନ
ଚର୍ଚ୍ଚା ଅନୁସାରେ ସେନା, ଗୁଇନ୍ଦା ଓ ଅଦାଲତକୁ ନିଜ ପକ୍ଷରେ ନେଇ ଏହି ଗଣତାନ୍ତ୍ରିକ ନିର୍ବଚନକୁ ଜିତିବା ପାଇଁ ସବୁ ଜୋର ଲଗାଇ ଦେଇଛି କ୍ରିକେଟରରୁ ରାଜନେତା ବନିଥିବା ଇମ୍ରାନ ଖାନଙ୍କ ତେହରିକ-ଏ-ଇନସାଫ ପାର୍ଟି ।
ସେପଟେ ଆଜି ଭୋଟିଂ ବେଳେ ଦକ୍ଷିଣ-ପଶ୍ଚିିମ ପାକିସ୍ତାନର କ୍ୱେଟା ସହରରେ ହୋଇଛି ଭୟାବହ ବିସ୍ଫୋରଣ । ଅନ୍ତର୍ଜାତୀୟ ଗଣମାଧ୍ୟମ ଅଲ ଜଜିରା ରିପୋର୍ଟ ଅନୁସାରେ କ୍ୱେଟାରେ ଏକ ପୋଲିଂ ଷ୍ଟେସନ ନିକଟରେ ପୋଲିସ ଭ୍ୟାନକୁ ଲକ୍ଷ୍ୟ କରି ହୋଇଥିବା ଆତ୍ମଘାତୀ ବିସ୍ଫୋରଣରେ ୨୯ ଜଣଙ୍କ ମୃତ୍ୟୁ ହୋଇଥିବାବେଳେ ୪୦ରୁ ଅଧିକ ଆହତ ହୋଇଛନ୍ତି । ତେବେ ଏକ ୱେବସାଇଟ ଜରିଆରେ ବିସ୍ଫୋରଣ ପାଇଁ ନିଜକୁ ଦାୟୀ କରିଛି ଆଇଏସଆଇଏସ ।
ପିଏମଏଲଏନ ନେତା ନୱାଜ ସରିଫ ପାନାମା ପେପର ମାମଲାରେ ଦୋଷୀ ସାବ୍ୟସ୍ତ ହୋଇ ଜେଲ ଯାଇଛନ୍ତି । ଆଉ ନିର୍ବାଚନ ପୂର୍ବରୁ ବିଦେଶରୁ ଫେରିଆସିବା ଦଳ ପାଇଁ ଲାଭଦାୟକ ହେବ ବୋଲି ରାଜନୀତି ସମୀକ୍ଷକମାନେ ଅଂକ କଷୁଛନ୍ତି । କାରଣ ସମର୍ଥକଙ୍କ ଭିତରେ ଦଳ ଧରାଣା ତିଆରି କରିଛି ଯେ, ରାଜନୈତିକ ଷଡଯନ୍ତ୍ରର ଶିକାର ହୋଇଛନ୍ତି ସରିଫ । ପୂର୍ବତନ ପ୍ରଧାନମନ୍ତ୍ରୀ ନୱାଜ ସରିଫ ନିଜ ଝିଅ, ଜ୍ୱାଇଁଙ୍କ ସହ ପାକିସ୍ତାନର ଆଦିଆଲା ଜେଲରେ ବନ୍ଦୀ ଅଛନ୍ତି । ଆଉ ଭାଇ ସେହବାଜ ସରିଫ ତାଙ୍କ ନାଁରେ ସିମ୍ପାଥି ଭୋଟ ଗୋଟାଇବା ଲକ୍ଷ୍ୟରେ ଅଛନ୍ତି । ହେଲେ ସେନା ଓ ଆଇଏସଆଇର ପୂର୍ଣ୍ଣ ସହଯୋଗ ଥିବା ତେହରିକ-ଏ-ଇନସାଫ ମୁଖ୍ୟ ଇମ୍ରାନ ଖାନ, ପାରମ୍ପରିକ ରାଜନୈତିକ ପାର୍ଟିଗୁଡିକୁ ମାତ ଦେଇ ଦେଶର ପରବର୍ତି ପ୍ରଧାନମନ୍ତ୍ରୀ ହେବେ ବୋଲି ଦାବି କରିଛନ୍ତି ।