ଏୟାରଷ୍ଟ୍ରାଇକ୍ ପରେ ଏବେ ବି ଆତଙ୍କିତ ଅବସ୍ଥାରେ ପାକିସ୍ତାନ । ଭାରତୀୟ ଉଚ୍ଚାୟୁକ୍ତଙ୍କୁ ଡକାଇଲେ ଇମ୍ରାନ୍, କହିଲେ ପୁଣି ଆକ୍ରମଣ କଲେ ଦିଆଯିବ ଜବାବ ।
କନକ ବ୍ୟୁରୋ : ବାଲାକୋଟ ଆକ୍ରମଣ ପରେ ଏବେ ବି ଆତଙ୍କିତ ଅବସ୍ଥାରେ ପାକିସ୍ତାନ । ଭାରତୀୟ ସେନା ପାକିସ୍ତାନ ମାଟିରେ ପଶି ଏୟାରଷ୍ଟ୍ରାଇକ୍ କରିବାକୁ ଗୋଟିଏ ମାସ ବିତିଯାଇଥିଲେ ମଧ୍ୟ ପାକର ଭୟ ଛାଡିନି । ଭାରତ ପୁଣି ଥରେ ପାକିସ୍ତାନ ଉପରେ ଆକ୍ରମଣ କରିପାରେ ବୋଲି ଆଶଙ୍କା କରିଛନ୍ତି ପାକ୍ ବୈଦେଶିକ ମନ୍ତ୍ରୀ ମହମ୍ମଦ କ୍ୟୁରେସୀ । ଆଗାମୀ ୧୬ରୁ ୨୦ ତାରିଖ ମଧ୍ୟରେ ଭାରତ ଆଉ ଏକ ଆକ୍ରମଣ ପାଇଁ ଯୋଜନା କରୁଛି ବୋଲି ସେ କହିଛନ୍ତି । ମୂଲତାନରେ ଗଣମାଧ୍ୟମକୁ ସମ୍ବୋଧନ କରି କହିଛନ୍ତି, ଭରଷା ଯୋଗ୍ୟ ଗୁଇନ୍ଦା ସୂଚନା ଅନୁଯାୟୀ ଭାରତ ଆଉ ଏକ ଆକ୍ରମଣ ପାଇଁ ନୂଆ ଯୋଜନା କରୁଛି । ତେବେ ଏହା ଉଭୟ ଦେଶ ମଧ୍ୟରେ ଶାନ୍ତି ଓ ସ୍ଥିରତାରେ ବ୍ୟାଘାତ ସୃଷ୍ଟି କରିବ ବୋଲି ସେ କହିଛନ୍ତି । ଫେବୃଆରୀ ୧୪ରେ ପୁଲୱାମା ଆକ୍ରମଣ ପରେ ଭାରତ ପାକିସ୍ତାନ ମାଟିରେ ପଶି ସେହି ମାସ ୨୬ରେ ଜୈସ-ଏ-ମହମ୍ମଦର କ୍ୟାମ୍ପକୁ ଧୂଂସ କରିଥିଲା । ଯାହାକୁ ନେଇ ଦୁଇ ଦେଶ ମଧ୍ୟରେ ଯୁଦ୍ଧ ପରିସ୍ଥିତି ସୃଷ୍ଟି ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ତେବେ ସବୁଠାରୁ ବଡ କଥା ହେଉଛି, ଭାରତ ପୁଣି ଆକ୍ରମଣ ପାଇଁ ପ୍ରସ୍ତୁତି କରୁଥିବା ଅଭିଯୋଗ କରି ପାକିସ୍ତାନ ଆଜି ସେଠାରେ ଅବସ୍ଥାପିତ ଭାରତୀୟ ଡେପୁଟି ହାଇକମିଶନର ଗୌରବ ଆଲୁଓ୍ଵାଲିଆଙ୍କୁ ଡକାଇଛି । ଭାରତ କୌଣସି ପ୍ରକାର ଦୁଃସାହସ କଲେ ତାହାର ଦୃଢ ଜବାବ ଦିଆଯିବ ବୋଲି ପାକିସ୍ତାନ ପକ୍ଷରୁ ତାଙ୍କୁ ଜଣାଇ ଦିଆଯାଇଛି । ତେବେ ଭାରତୀୟ ବୈଦେଶିକ ମନ୍ତ୍ରାଳୟ ଏପର୍ଯ୍ୟନ୍ତ ଏହାର କୌଣସି ଜବାବ ଦେଇନଥିଲେ ମଧ୍ୟ ବିଶେଷଜ୍ଞମାନେ କହିଛନ୍ତି ଯେ ପାକିସ୍ତାନ ଆତଙ୍କବାଦୀଙ୍କ ବିରୋଧରେ କୌଣସି ପଦକ୍ଷେପ ନେଇନଥିବାବେଳେ ଅଯଥାରେ ଯୁଦ୍ଧ ବାତାବରଣ ସୃଷ୍ଟି କରୁଛି ।