ସର୍ଜିକାଲ୍ ଷ୍ଟ୍ରାଇକର ପ୍ରମାଣ ଦେଖିଲା ପାକିସ୍ତାନ ! ସର୍ବସାଧାରଣଙ୍କ ପାଇଁ ଭାରତ ସରକାର ଜାରି କଲେ ଚର୍ଚ୍ଚିତ ଅପରେସନର ୪ଟି ଭିଡିଓ ।
କନକ ବ୍ୟୁରୋ : ସର୍ଜିକାଲ ଷ୍ଟ୍ରାଇକର ପ୍ରାୟ ଦୁଇ ବର୍ଷ ପରେ ସର୍ବସାଧାରଣ ହୋଇଛି ଏହି ଅପରେସନର ଜୀବନ୍ତ ଚିତ୍ର । ୨୦୧୬ ସେପ୍ଟେମ୍ବର ମାସରେ ହୋଇଥିବା ବହୁ ଚର୍ଚ୍ଚିତ ସର୍ଜିକାଲ ଷ୍ଟ୍ରାଇକର ୪ଟି ଭିଜୁଆଲ ଜାରି କରିଛନ୍ତି ଭାରତ ସରକାର । ଆକାଶମାର୍ଗରୁ ମାନବ ବିହୀନ ଯାନ ଏବଂ ଯବାନଙ୍କ ଦେହରୁ ଖଂଜା ଯାଇଥିବା କ୍ୟାମେରାରେ ଯେଉଁ ଚିତ୍ର କଏଦ ହୋଇଥିଲା, ତାକୁ ସର୍ବସାଧାରଣଙ୍କ ଉଦ୍ଦେଶ୍ୟରେ ଜାରି କରାଯାଇଛି । ଏହି ଭିଜୁଆଲ ସାମ୍ନାକୁ ଆସିବା ପରେ, ଯେଉଁମାନେ ଏହାକୁ ଫର୍ଜିକାଲ ଷ୍ଟ୍ରାଇକ୍ ବୋଲି କହୁଥିଲେ ତାଙ୍କ ମୁହଁ ବନ୍ଦ ହୋଇଯାଇଛି । ଆଉ ଏହି ଭିଜୁଆଲ ପୁଣି ଥରେ ମନେ ପକାଇ ଦେଇଛି ସେହି ଘଟଣାକୁ ।
Kanak News is now on WhatsApp
Join and get latest news updates delivered to you via WhatsApp
୨୯ ସେପ୍ଟେମ୍ବର ୨୦୧୬ରେ ପାକ୍ ଅଧିକୃତ କାଶ୍ମୀର ଠାରେ ଭାରତୀୟ ଯବାନଙ୍କ ପରାକ୍ରମର ପରାକାଷ୍ଠା ଦେଖିଥିଲା ପୁରା ଦୁନିଆ, ଯେତେବେଳେ ରାତିର ଘନ ଅନ୍ଧାରକୁ ଚିରି ପାକିସ୍ତାନ ଅଧିକୃତ କାଶ୍ମୀରରେ ପାଦ ରଖିଥିଲେ । ଆତଙ୍କର ପସରା ମେଳି, ନିଘୋଡ ନିଦରେ ଶୋଇଥିବା ପାକିସ୍ତାନର ନାକ ତଳେ ହୋଇଥିଲା ସେହି ଅପରେସନ୍ ଯାହା, ଭାରତୀୟ ସେନାର ନିଷ୍ଠା ଓ ସଂକଳ୍ପର ପ୍ରମାଣ ହୋଇ ସାମ୍ନାକୁ ଆସିଲା । ୨୮ ସେପ୍ଟେମ୍ବର ମଧ୍ୟରାତ୍ରୀ, ଯେତେବେଳେ ପାକିସ୍ତାନ ଛାଡି ଯାଇଥିବା ଉରି ଆଘାତ ଘା’ ଶୁଖିବି ନଥାଏ । ଭାରତୀୟ ସେନାର ନର୍ଦନ୍ କମାଣ୍ଡ ଏବଂ ଦିଲ୍ଲୀ ହେଡକ୍ୱାର୍ଟରରୁ ପ୍ରସ୍ତୁତ ହୋଇଥିଲା ସେହି ନକ୍ସା, ଯାହା ନେଇଥିଲା ସର୍ଜିକାଲ ଷ୍ଟ୍ରାଇକ୍ ରୂପ ।
ସର୍ଜିକାଲ ଷ୍ଟ୍ରାଇକକୁ ଫର୍ଜିକାଲ ଷ୍ଟ୍ରାଇକ୍ କହୁଥିବା ପାକିସ୍ତାନ ମୁହଁରେ ଇଏ ହେଉଛି ସେହି ଶକ୍ତ ଚାପୁଡ଼ାର ପ୍ରମାଣ ଯାହା ଆଜି ସାମ୍ନାକୁ ଆସିଛି । ପାକ୍ ଅଧିକୃତ କାଶ୍ମୀର ଗୋଟିଏ କି ଦୁଇଟି ଆତଙ୍କି ଆଡ୍ଡା ନୁହେଁ ୬-୬ଟି ଠିକଣା ଉପରେ ହୋଇଥିଲା ଏଭଳି ଆକ୍ରମଣ, ଯାହାକୁ ପାକିସ୍ତାନ ନା’ କହି ପାରିଲା ନା’ ସହିପାରିଲା ।
ଟାର୍ଗେଟ୍ ନମ୍ବର-୧ :
ପାକିସ୍ତାନ ସେନାର ଆଖିରେ ଧୁଳି ଦେଇ ପ୍ରଥମ ଟାର୍ଗେଟରେ ପହଂଚିଥିଲା ଭାରତୀୟ ଯବାନ । ଜଙ୍ଗଲ-ପାହାଡ଼ ଘେରା ଭିତରେ ଥାଏ ଆତଙ୍କବାଦୀ ଠିକଣା । ଅତି ଚତୁରତାର ସହ ଲକ୍ଷ୍ୟସ୍ଥଳ ନିକଟରେ ପହଂଚିବା ପରେ ଆରମ୍ଭ ହେଲା ସେହି ଅପରେସନ୍, ଯାହାକୁ ହାସଲ କରିବା ପାଇଁ ପ୍ରାୟ ୩ରୁ ୪ କିଲୋମିଟର୍ ପାକ୍ ସୀମାରେ ପଶି ସାରିଥାଏ ଭାରତ । କ୍ୟାମ୍ପ ଉପରେ ହେଲା ରକେଟ୍ ଲଂଚର ମାଡ଼, ଧୂଳିସାତ୍ ହୋଇଗଲା ଠିକଣା ଏବଂ ମାଟିରେ ମିଶିଗଲେ ଆତଙ୍କବାଦୀ ।
ଟାର୍ଗେଟ୍ ନମ୍ବର-୨ :
ଠିକ୍ ଏକ ନମ୍ବର ଟାର୍ଗେଟ୍ ଭଳି ଦୁଇ ନମ୍ବର ଆତଙ୍କବାଦୀ କ୍ୟାମ୍ପ ଉପରେ ହୋଇଥିଲା ଆକ୍ରମଣ । ଇଏ ହେଉଛି ସେହି ଘଡିସନ୍ଧି ମୁହୁର୍ତ୍ତର ଭିଜୁଆଲ । ଯାହା ଯବାନଙ୍କ ହେଲମେଟ୍ ଏବଂ ଏକ ଅନମେନ୍ ଭେଇକିଲ ଦ୍ୱାରା ଉତୋଳନ ହୋଇଥିବା ଚିତ୍ର । ଦ୍ୱିତୀୟ ଟାର୍ଗେଟଟି ଏତେ ଭୟଙ୍କର ଥିଲା ଯେ, ସଂପୂର୍ଣ୍ଣ ଅଂଚଳ ଧୂଆଁଳିଆ ହୋଇଯାଇଥିଲା । ଏତିକିରେ ଅପରେସନ୍ ସରିନଥିଲା । ଆଗକୁ ମାଡ଼ି ଚାଲିଥିଲେ ଭାରତୀୟ ଯବାନ । ନର୍ଦନ୍ କମାଣ୍ଡ ଏବଂ ଦିଲ୍ଲୀ ହେଡକ୍ୱାର୍ଟରରୁ ଏହି ପୁରା ଅପରେସନର ଅନୁଧ୍ୟାନ ହେଉଥାଏ । ଏହା ପରେ ପାଳି ଆସିଥିଲା ତୃତୀୟ ଟାର୍ଗେଟର ।
ଟାର୍ଗେଟ୍ ନମ୍ବର-୩ :
ତୃତୀୟ ଟାର୍ଗେଟ୍ ଏତେ ସହଜ ନଥିଲା । କାରଣ ଆତଙ୍କବାଦୀ କ୍ୟାମ୍ପ ନିକଟରେ ପହରା ଦେଉଥିଲେ ୨ ଜଣ ଆତଙ୍କବାଦୀ ଏବଂ ୨ ଜଣ ପାକ୍ ସୈନିକ୍ । ହେଲେ ଏକ ମଜବୁତ ଲକ୍ଷ୍ୟ ନେଇ ଆଗକୁ ବଢ଼ି ଚାଲିଥିବା ଭାରତୀୟ ଯବାନ ଯେତିକି, ସବୁ ବାଧାବିଘ୍ନକୁ ଅତିକ୍ରମ କରିବା ପାଇଁ ପଣ କରି ହିଁ ଯାଇଥିଲେ । ରକେଟ୍ ଲଂଚର ମାଡ଼ ସହ ହେଲା ଅନ୍ଧାଧୁନ୍ ଫାଇରିଂ ।
ଟାର୍ଗେଟ୍ ନମ୍ବର-୪ :
ଅନ୍ଧାର ଭିତରେ ହୋଇଥିବା ଏହି ଅପରେସନ୍ ଆଖିକୁ ସ୍ପଷ୍ଟ ଦେଖାଯାଉନଥିଲେ ବି, ସାରା ବିଶ୍ୱକୁ ଦେଉଥିଲା ସ୍ପଷ୍ଟ ବାର୍ତା । ଚତୁର୍ଥ ଟାର୍ଗେଟରେ ଏକ ବଡଧରଣର ମୁହାଁମୁହିଁ ସ୍ଥିତି ହୋଇଥିଲା । ହେଲେ ଶେଷରେ ଆତଙ୍କବାଦୀଙ୍କ କ୍ୟାମ୍ପ ଧ୍ୱଂସ ହେବା ସହ ଆତଙ୍କୀଙ୍କୁ ସୁରକ୍ଷା ଦେଉଥିବା ପାକ୍ ସେନାର ଯବାନଙ୍କୁ ବି ଆଖି ବୁଜିବାକୁ ପଡ଼ିଲା । ଏହି ଭଳି ୬ଟି ଠିକଣା ଉପରେ ହୋଇଥିଲା ସର୍ଜିକାଲ ଷ୍ଟ୍ରାଇକ୍ । ଚର୍ଚ୍ଚା ହୁଏ ଏହି ଅପରେସନକୁ ନର୍ଦନ୍ କମାଣ୍ଡ ଏବଂ ଦିଲ୍ଲୀ ହେଡକ୍ୱାର୍ଟରରେ ବସି ଦେଖୁଥିଲେ, ସେନାମୁଖ୍ୟ, ସୁରକ୍ଷା ପରାମର୍ଶଦାତା ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
ଆଉ ଅପରେସନ୍ ସାରି ଯେମିତି ଭାରତୀୟ ସେନା ସୀମା ଅତିକ୍ରମ କରି ଯାଇଥିଲେ, ଠିକ୍ ସେମିତି ସୀମା ଡେଇଁ ଭାରତୀୟ ସୀମାକୁ ଚାଲିଆସିଥିଲେ । ଆଉ ଆଜି ଏହି ଭିଡିଓ ରିଲିଜ୍ ହେବା ପରେ ସମସ୍ତଙ୍କ ମୁହଁ ବନ୍ଦ ହୋଇଯାଉଛି, ଯେଉଁମାନେ ଏହି ସର୍ଜିକାଲ ଷ୍ଟ୍ରାଇକକୁ ନେଇ ସନ୍ଦେହ କରୁଥିଲେ ।