ପୁଲୱାମା ଆକ୍ରମଣ ପରେ ପାକିସ୍ତାନ ଉପରେ ବଢୁଛି ଚାପ : ମୁମ୍ବାଇ ଆକ୍ରମଣର ମାଷ୍ଟର ମାଇଣ୍ଡ ହାଫିଜ୍ ସଇଦର ସଂଗଠନ ଉପରେ ପାକ୍ ଲଗାଇଲା କଟକଣା
କନକ ବ୍ୟୁରୋ : ପୁଲବାମା ଆକ୍ରମଣ ପରେ ଭାରତର ଉଗ୍ରରୂପ ଓ ବିଶ୍ୱ ସମୁଦାୟର ଭାରତ ପ୍ରତି ସମର୍ଥନକୁ ଦେଖି ଛାନିଆ ପାକିସ୍ତାନ । ଏଥିପାଇଁ ପାକ୍ ପ୍ରଧାନମନ୍ତ୍ରୀ ଇମ୍ରାନ ଖାନ ଆତଙ୍କବାଦୀ ହାଫିଜ୍ ସଇଦର ସଂଗଠନ ଜମାଏତ ଉଲ ଦାୱାକୁ ନିଷିଦ୍ଧ ଘୋଷଣା କରିଛି । ଏହା ସହିତ ହାଫିଜ ସଇଦର ଫଲା-ଏ ଇନସାନିଅତ୍ ଫାଉଣ୍ଡେସନକୁ ମଧ୍ୟ ନିଷିଦ୍ଧ କରାଯାଇଛି । ଅନ୍ୟପଟେ ଭାରତର ସମ୍ଭାବ୍ୟ ଆକ୍ରଣକୁ ଦୃଷ୍ଟିରେ ରଖି ପାକ୍ ସେନାକୁ ସତର୍କ ରହିବାକୁ ପରାମର୍ଶ ଦେଇଛନ୍ତି ଇମ୍ରାନ ।
Kanak News is now on WhatsApp
Join and get latest news updates delivered to you via WhatsApp
ପାକ୍ ଜାତୀୟ ନିରାପତ୍ତା କମିଟି ବୈଠକରେ ହାଫିଜର ସଂଗଠନକୁ ନିଷିଦ୍ଧ କରିବାକୁ ନିଷ୍ପତ୍ତି ନିଆଯାଇଥିଲା ବୋଲି ଆଭ୍ୟନ୍ତରୀଣ ବ୍ୟାପାର ମନ୍ତ୍ରାଳୟର ପ୍ରବକ୍ତା କହିଛନ୍ତି । ହାଫିଜର ସଂଗଠନ ପାକିସ୍ତାନରେ ଉଗ୍ର ଇସଲାମିକ୍ ଚିନ୍ତାଧାରାର ପ୍ରଚାରପ୍ରସାର ଘଟାଉଥିବାରୁ ଏଭଳି ପଦକ୍ଷେପ ନିଆଯାଇଥିବା କୁହାଯାଇଛି । ଅନ୍ୟପକ୍ଷରେ ହାଫିଜର ସଂଗଠନ ଉପରେ କଟକଣାକୁ ନେଇ ପାକ୍ ରାଜନୀତି ସରଗରମ ହୋଇଛି । ପୂର୍ବରୁ ମଧ୍ୟ ହାଫିଜ୍କୁ ସରକାର କିଛିଦିନ ପାଇଁ ଗୃହବନ୍ଦୀ କରି ରଖିଥିଲେ ଏବଂ ତା’ର ସଂଗଠନ ଉପରେ କଟକଣା ଲଗାଇଥିଲେ । ତେବେ ଏକ କୋର୍ଟ ରାୟ ପରେ ପାକ୍ ସରକାର ହାଫିଜ୍ ଉପରୁ ସମସ୍ତ ପ୍ରତିବନ୍ଧକ ହଟାଇଥିଲେ।
ଜମ୍ମୁ କଶ୍ମୀରର ପୁଲୱାମାରେ ପାକ୍ ଆତଙ୍କବାଦୀ ସଂଗଠନ ଜୈସ୍ ଏ ମହମ୍ମଦ ଆତ୍ମଘାତୀ ଆକ୍ରମଣ କରିଥିଲେ ମଧ୍ୟ ଏହି ସଂଗଠନ ବିରୋଧରେ ପାକ୍ ସରକାର କିମ୍ବା ସେନା ମୁହଁ ଖୋଲୁନାହାନ୍ତି । ଜୈସ୍ ମୁଖ୍ୟ ମସୁଦ୍ ଆଝାର ପାକିସ୍ତାନରୁ ଭାରତ ବିରୋଧରେ ତା’ର କାର୍ୟ୍ୟକ୍ରମ ସଂଚାଳନ କରୁଛି ଏବଂ କଶ୍ମୀରକୁ ଲଗାତାର ଆତଙ୍କବାଦୀଙ୍କୁ ଅନୁପ୍ରବେଶ କରାଉଛି । ପାକ୍ ସେନା ସହାୟତାରେ ଏବେ ଜୈସର ଶତାଧିକ ଆତଙ୍କବାଦୀ ନିୟନ୍ତ୍ରଣ ରେଖା ଅଂଚଳରେ ତାଲିମ ନେଉଥିବା ଜଣାପଡ଼ିଛି ।