ସୀମାରେ ଭୟଙ୍କର ଗୁଳିବର୍ଷା ! ପାକ୍ ସେନା ଟାର୍ଗେଟରେ ବେସାମରିକ ଅଞ୍ଚଳ
କନକ ବ୍ୟୁରୋ: ଜମ୍ମୁ କଶ୍ମୀରର ପୁଂଚ ଜିଲ୍ଲାର ନିୟନ୍ତ୍ରଣ ରେଖା ଅଂଚଳରେ ପାକ୍ ସେନା ଗୁଳି ବର୍ଷା ଜାରି ରଖିଛି । ସୀମାବର୍ତ୍ତୀ ଭାରତୀୟ ସେନା ପୋଷ୍ଟ ଓ ବେସାମରିକ ଅଞ୍ଚଳକୁ ଟାର୍ଗେଟ କରି ପାକ୍ ଯବାନମାନେ ଭୟଙ୍କର ଗୁଳିଗୋଳା ମାଡ଼ କରିଛନ୍ତି । ଭାରତୀୟ ସେନା ଏହାର ପାଲଟା ଜବାବ ଦେଇଛି । ମନକୋଟ ସେକ୍ଟରରେ ମଧ୍ୟ ପାକ୍ ସେନା ଅସ୍ତ୍ରବିରତି ଉଲ୍ଲଙ୍ଘନ କରି ଗୁଳିମାଡ଼ କରିଛି ।
Kanak News is now on WhatsApp
Join and get latest news updates delivered to you via WhatsApp
ଭାରତୀୟ ଗ୍ରାମଗୁଡ଼ିକ ଉପରକୁ ପାକିସ୍ତାନ ୧୨୦ ମିମି ମୋର୍ଟାର ମାଡ଼ କରୁଥିବାରୁ ଭାରତ ମଧ୍ୟ ସମାନ ଅସ୍ତ୍ରରେ ଜବାବ ଦେଉଛି । ପୁଂଚ ସେକ୍ଟରରେ ପାକିସ୍ତାନ ସେନା ସ୍ୱୟଂଚାଳିତ ବନ୍ଧୁକରୁ ମଧ୍ୟ ଅନବରତ ଗୁଳିମାଡ଼ ଜାରି ରଖିଛନ୍ତି । ୬ଟି ଭାରତୀୟ ପୋଷ୍ଟକୁ ପାକ୍ ସେନା ଟାର୍ଗେଟ୍ କରିଥିଲେ ମଧ୍ୟ କଡ଼ା ପଦକ୍ଷେପ ଯୋଗୁଁ ସମସ୍ତ ପୋଷ୍ଟ ସୁରକ୍ଷିତ ଥିବା ସେନା ପ୍ରବକ୍ତା କହିଛନ୍ତି ।
ଯେ କୌଣସି ପରିସ୍ଥିତିରେ ବି ଆତଙ୍କବାଦୀଙ୍କ ଅନୁପ୍ରବେଶ କରାଇବା ପାଇଁ ପାକିସ୍ତାନ ସେନା ଏହି ଗୁଳି ବର୍ଷା ଜାରି ରଖିଥିବାରୁ ଭାରତୀୟ ସେନା ମଧ୍ୟ ଯଥୋଚିତ ସୁରକ୍ଷା ପଦକ୍ଷେପ ଗ୍ରହଣ କରିଛି । ଅନୁପ୍ରବେଶକାରୀଙ୍କୁ ସୁରକ୍ଷା ଯୋଗାଇବାକୁ ପାକ୍ ସେନା ଗୁଳିବର୍ଷା କରୁଛି ।
ତେବେ ଅନୁପ୍ରବେଶ ହେଉଥିବା ସମସ୍ତ ରାସ୍ତା ଉପରେ ସେନାର ସତର୍କ ନଜର ଯୋଗୁଁ ପାକ୍ ସେନା ହତାଶ ହେଉଛି । ବଡ଼ ଧରଣର ଅନୁପ୍ରବେଶ ଓ ଆକ୍ରମଣ ଆଶଙ୍କା ଥିବା ନେଇ ଗୁଇନ୍ଦା ବିଭାଗ ସତର୍କ କରାଇଛି ।