ଫସଲ ବୀମା ଟଙ୍କା ପାଇଁ ଆନ୍ଦୋଳନ କରୁଥିବା ଚାଷୀଙ୍କ ମୃତ୍ୟୁ ପରେ ଉତ୍ତେଜନା : କ୍ଷତି ପୂରଣ ଦାବିରେ ମୃତଦେହ ରଖି ବରଗଡ ପାଇକମାଳରେ ରାସ୍ତାରୋକ
କନକ ବ୍ୟୁରୋ : ବରଗଡରେ ଫସଲ ବୀମା ଟଙ୍କା ପାଇଁ ଆନ୍ଦୋଳନ କରୁଥିବା ଚାଷୀଙ୍କ ମୃତ୍ୟୁ ପରେ ଉତ୍ତେଜନା ଦେଖାଦେଇଛି । ପଦ୍ମପୁର ଉପଖଣ୍ଡ ପାଇକମାଳ ବ୍ଲକ ପଲସଜା ସମବାୟ ସମିତି ସମ୍ମୁଖରେ ଫସଲ ବୀମା କ୍ଷତି ପୂରଣ ପାଇଁ ଆନ୍ଦୋଳନ କରୁଥିବା ଚାଷୀ ଗୋବିନ୍ଦ ବିଶ୍ୱାଲଙ୍କ ମୃତ୍ୟୁ ପରେ ତାତି ଉଠିଛନ୍ତି ଚାଷୀ । କ୍ଷତି ପୂରଣ ଦାବିରେ ମୃତଦେହ ରଖି ପାଇକମାଳ ଗୌରଜୁରି ଛକରେ ରାସ୍ତାରୋକ କରିଛି ପଲସଜା ଆଂଚଳିକ କୃଷକ ସଂଗଠନ । ୫ ଦିନ ହେଲା ପଲସଜା ସମହାୟ ସମିତି ଆଗରେ ଜାରି ରହିଛି ଧାରଣା । ତେବେ ଆନ୍ଦୋଳନର ଚତୁର୍ଥ ଦିନରେ ମାନସିକ ଚିନ୍ତାରେ ଚାଷୀ ଗୋବିନ୍ଦଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ ପ୍ରଧାନମନ୍ତ୍ରୀ ଫସଲବୀମା କ୍ଷତିପୂରଣ ପ୍ରଦାନରେ ବୀମା କମ୍ପାନୀର ପାତରଅନ୍ତର ନୀତିକୁ ନେଇ କେନ୍ଦ୍ରାପଡା ରାଜନଗର ବ୍ଲକରେ ଅସନ୍ତୋଷ ଦେଖାଦେଇଛି । ବ୍ଲକର ୨୯ଟି ପଂଚାୟତ ମଧ୍ୟରୁ ୧୩ ପଂଚାୟତର ଚାଷୀଙ୍କୁ ବୀମା କ୍ଷତିପୂରଣ ମିଳିଥିବା ବେଳେ ୧୬ ପଂଚାୟତର ଚାଷୀ ବୀମା କ୍ଷତିପୂରଣ ମିଳିନାହିଁ । ଇଶ୍ୱରପୁର, ବ୍ରାହ୍ମଣସାହି, ଗୁପ୍ତି, ସାତଭାୟା, ବନ୍ଧପଡା ସମେତ ନୂତନ ପଂଚାୟତର ମାନ୍ୟତା ପାଇଥିବା ମହିଁଷାସୁର, ହାତିନା, କେରୁଆଁପାଳ, ବାଘମାରି, କୃଷ୍ଣନଗର, ଖମାରସାହି, ଘଡିଆମାଳ, ଭିତରଗଡ, କେରଡାଗଡ, ରାଜପୁର, ବେଲପାଳ ପଂଚାୟତର ଚାଷୀମାନେ ଫସଲବୀମା କ୍ଷତିପୂରଣ ରାଶି ପାଇବାରୁ ବଂଚିତ ହୋଇଛନ୍ତି । ବୀମା କମ୍ପାନୀ ଉପର ଠାଉରିଆ ଭାବେ ସର୍ଭେ କରିବା ଓ ମନଇଚ୍ଛା ପଂଚାୟତକୁ ବାଦ୍ ଦେବା ଘଟଣାକୁ ନେଇ ଚାଷୀଙ୍କ ମଧ୍ୟରେ ତୀବ୍ର ପତିକ୍ରିୟା ପ୍ରକାଶ ପାଇଛି । କୃଷିବିଭାଗ, ରାଜସ୍ୱ ବିଭାଗ, ପରିସଂଖ୍ୟାନ ବିଭାଗ ସହ ମିଶି ଟାଟା ଏଆଇଜି ଇନ୍ସ୍ୟୁରାନ୍ସ କମ୍ପାନୀର ଅଧିକାରୀମାନେ ବିଭିନ୍ନ ଗାଁକୁ ଯାଇ ଫସଲ କ୍ଷୟକ୍ଷତି ସର୍ଭେ କରିଥିଲେ । ସର୍ଭେ ସମୟରେ ଫସଲ ହାନୀ ନେଇ କ୍ରପ୍ଲସ୍ ହୋଇଥିବା ସ୍ପଷ୍ଟ ହୋଇଥିଲା । ତଥାପି କାହିଁକି ଆଜି ଯାଏଁ କ୍ଷତିପୂରଣ ଦିଆଯାଇନାହିଁ ବୋଲି ପ୍ରଶ୍ନ କରିଛନ୍ତି ଚାଷୀ ।