ସାମ୍ବାଦିକ ସୁଜାତ୍ ବୁଖାରୀଙ୍କ ହତ୍ୟା ନେଇ ଜାମ୍ମୁ-କାଶ୍ମୀର ପୋଲିସର ବଡ ଖୁଲାସା ! ସୁଜାତଙ୍କୁ ହତ୍ୟା କରିବାକୁ ପାକିସ୍ତାନରୁ ଦିଆଯାଇଥିଲା ସୁପାରୀ
କନକ ବ୍ୟୁରୋ: ବୁଖାରୀଙ୍କ ପାଇଁ ସୁପାରୀ ଦେଇଥିଲା ପାକିସ୍ତାନ । ସୁଜାତ୍ ବୁଖାରୀଙ୍କୁ ହତ୍ୟା କରିବାକୁ ସୀମା ସେପାଖରୁ ଆସିଥିଲା ନିର୍ଦ୍ଦେଶ । ଜମ୍ମୁ କଶ୍ମୀରର ବରିଷ୍ଠ ସାମ୍ବାଦିକ ସୁଜାତ୍ ବୁଖାରୀ ହତ୍ୟା ମାମଲାରେ ସାମନାକୁ ଆସିଛି ଏପରି ଚାଂଚଲ୍ୟକର ତଥ୍ୟ । ହତ୍ୟାକାଣ୍ଡର ତଦନ୍ତ କରୁଥିବା ଜମ୍ମୁ କଶ୍ମୀର ପୋଲିସ ପକ୍ଷରୁ ଏପରି ସୂଚନା ଦେଇଛି । ସୁଜାତ୍ ବୁଖାରୀ ହତ୍ୟାକାଣ୍ଡର ତଦନ୍ତ ସହ ସିଧାସଳଖ ସଂପୃକ୍ତ ଥିବା ଜମ୍ମୁ କଶ୍ମୀର ପୋଲିସର କିଛି ଅଧିକାରୀ ଏ ନେଇ ଖୁଲାସା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ତଦନ୍ତକାରୀ ଅଧିକାରୀଙ୍କ ସୂଚନା ଅନୁଯାୟୀ, କଶ୍ମୀର ଘାଟିରେ ଶାନ୍ତି ପ୍ରତିଷ୍ଠା ପାଇଁ ଉଦ୍ୟମ ଚଳାଇଥିବା ବରିଷ୍ଠ ସାମ୍ବାଦିକ ସୁଜାତ୍ ବୁଖାରୀଙ୍କୁ ହତ୍ୟା କରିବା ପାଇଁ ସୀମା ଆରପଟୁ ନିର୍ଦ୍ଦେଶ ଆସିଥିଲା । ଆଉ ପାକିସ୍ତାନରୁ ଆସିଥିବା ନିର୍ଦ୍ଦେଶ ଅନୁଯାୟୀ ଆତଙ୍କବାଦୀମାନେ ବୁଖାରୀଙ୍କୁ ଗୁଳି ମାରି ହତ୍ୟା କରିଥିଲେ । ତେବେ ବୁଖାରୀଙ୍କ ହତ୍ୟାକାରୀଙ୍କୁ ଚିହ୍ନଟ ସରିଛି ବୋଲି ଜମ୍ମୁ କଶ୍ମୀର ପୋଲିସ ପକ୍ଷରୁ କୁହାଯାଇଛି । ଏହି ହତ୍ୟାକାଣ୍ଡରେ ବିଛିନ୍ନତାବାଦୀ ନେତାଙ୍କ ସହ ଜମାତ୍-ଏ-ଇସଲାମୀ ନେତାଙ୍କ ସଂପୃକ୍ତି ସମ୍ପର୍କରେ ମଧ୍ୟ ସୁରାକ୍ ମିଳିଛି ।
କଶ୍ମୀର ଘାଟିକୁ ଅଶାନ୍ତ କରି ରଖୁଥିବା ଦିଗରେ ବିଚ୍ଛିନ୍ନତାବାଦୀ ସଙ୍ଗଠନଗୁଡିକର ଭୂମିକାକୁ ଅଙ୍ଗୁଳି ନିର୍ଦ୍ଦେଶ କରିବା ସହ ସମାଲୋଚନା କରୁଥିଲେ ରାଇଜିଂ କଶ୍ମୀର ସମ୍ପାଦକ ସୁଜାତ୍ ବୁଖାରୀ । ଯେଉଁଥି ପାଇଁ ବିଛିନ୍ନତାବାଦୀ ନେତା ଓ ସେମାନଙ୍କୁ ପ୍ରଛନ୍ନ ସମର୍ଥନ ଯୋଗାଇ ଦେଉଥିବା ପାକିସ୍ତାନୀ ଆତଙ୍କବାଦୀ ସଙ୍ଗଠନର ବିଷଦୃଷ୍ଟିରେ ପଡିଥିଲେ ସାମ୍ବାଦିକ ବୁଖାରୀ ।