ନିର୍ବାଚନ ଫଳାଫଳ ଆସିବା ଜାତୀୟ ରାଜନୀତି ସରଗରମ : ପୁଣି ଥରେ ମମତାଙ୍କ ପାଇଁ ଏକାଠି ହେଲେ ବିରୋଧୀ, ବିଜେପି ପାଇଁ ବଢିପାରେ ଚିନ୍ତା
କନକ ବ୍ୟୁରୋ : ୨୦୧୯ ନିର୍ବାଚନର ଶେଷ ଲଢେଇ ପଶ୍ଚିମବଙ୍ଗରେ ଚାଲିଛି, ଆଉ ଏହା ଉପରେ ପୁରା ଦେଶର ନଜର ଅଟକି ରହିଛି । କାରଣ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓ ବିଜେପିର ଶୀର୍ଷ ନେତାଙ୍କ ଭିତରେ ଆରପାର ଲଢେଇ ଚାଲିିଛି । ସବୁ ଜୋର ଲଗାଇ ମମତା ବିଜେପିର ସାମ୍ନା କରୁଛନ୍ତି ତ ପୁରା ବିରୋଧୀ ମେଂଟ ତାଙ୍କ ପଛରେ ପୁଣିଥରେ ଛିଡା ହୋଇଛି । ମାୟାବତୀଙ୍କ ଠାରୁ ଆରମ୍ଭ କରି ରାହୁଲ ଗାନ୍ଧି ଓ ଅଖିଳେଶ ଯାଦବଙ୍କ ଯାଏଁ ନେତା ମମତା ବାନାର୍ଜୀଙ୍କୁ ସମର୍ଥନ କରିଛନ୍ତି । ତେଣୁ ନିର୍ବାଚନ ଶେଷ ହେଲାବେଳକୁ ପୁଣିଥରେ ସେହି ସ୍ଥିତି ତିଆରି ହୋଇଛି, ଯାହା ନିର୍ବାଚନ ପୂର୍ବରୁ ଥିଲା । ଅର୍ଥାତ ବିଜେପି ବିରୋଧୀ ଲଢେଇରେ ମମତା ସବୁଠାରୁ ଆଗରେ ଛିଡା ହୋଇଛନ୍ତି, ତାଙ୍କ ପଛରେ ରହିଛି ପୁରା ବିରୋଧୀ ମେଂଟ ଏବଂ ମମତା ଏହାର ନେତୃତ୍ୱ ନେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ମମତା ପୁଣିଥରେ ବିଜେପି ବିରୋଧରେ ମୋର୍ଚ୍ଚା ଖୋଲିବା ପରେ ସମର୍ଥନରେ ବାହାରି ଆସିଛନ୍ତି ଅଖିଳେଶ ଯାଦବ, ତେଜଶ୍ୱୀ ଯାଦବ, କେସିଆର ଓ ଚନ୍ଦ୍ରବାବୁ ନାଇଡୁଙ୍କ ଭଳି ନେତା । ଟ୍ୱିଟ୍ କରି ମମତା ବାନାର୍ଜୀଙ୍କୁ ଏମାନେ ଖୋଲାଖୋଲି ସମର୍ଥନ ଜଣାଇଛନ୍ତି । ସେପଟେ କଂଗ୍ରେସ ଓ ମାୟାବତୀ ପ୍ରେସମିଟ୍ କରି ଏହି ପ୍ରସଙ୍ଗରେ ମମତା ବାନାର୍ଜୀଙ୍କ ସହ ରହିଥିବା କହିଛନ୍ତି । ଏକାଠି ହୋଇ ବିରୋଧୀ ଅଭିଯୋଗ କରିଛନ୍ତି ଯେ, ପ୍ରଧାନମନ୍ତ୍ରୀ ମୋଦିଙ୍କ ରାଲି ଦିନରେ ରହିଛି । ସେଥିପାଇଁ ନିର୍ବାଚନ କମିଶନ୍ ରାତିରେ ପ୍ରଚାର ବନ୍ଦ କରିଦେଇଛନ୍ତି । ବିଜେପି ଇସାରାରେ ନିର୍ବାଚନ କମିଶନ୍ କାମ କରୁଥିବାରୁ ଏହା ଅସାମ୍ବିଧାନିକ ବୋଲି କଂଗ୍ରେସ କହିଛି । ଗଣତନ୍ତ୍ର ପ୍ରତି ବଡ ବିପଦ ସୃଷ୍ଟି ହୋଇଥିବା ମାୟାବତୀ ଅଭିଯୋଗ କରିଛନ୍ତି ।
ନିର୍ବାଚନ ଶେଷ ହେବା ଉପରେ, ଆଉ ମମତା ଦିଦି ପୁଣିଥରେ ବିରୋଧୀ ମେଂଟରେ ସବୁଠାରୁ ପ୍ରଭାବୀ ନେତା ଭାବେ ନଜର ଆସିଛନ୍ତି । ତେଣୁ ମୌକାରେ ଚୌକା ମାରି ତାଙ୍କୁ ସମର୍ଥନ ଜଣାଇଥିବା ଦଳଗୁଡିକୁ ଧନ୍ୟବାଦ ଜଣାଇଛି ପଶ୍ଚିମବଙ୍ଗ ମୁଖ୍ୟମନ୍ତ୍ରୀ । ନିର୍ବାଚନ ଫଳାଫଳ ଆସିବା ଆଗରୁ ମମତାଙ୍କ ନେତୃତ୍ୱରେ ବିରୋଧୀ ଏକତା ବିଜେପିର ଚିନ୍ତା ବଢାଇ ଦେଇଛି । ସେପଟେ ମମତା ଦିଦିଙ୍କୁ ପୁଣିଥରେ ବିରୋଧୀ ମେଂଟରେ ନେତା ନମ୍ବର ୱାନ୍ ଭାରେ ରେସର ଆଗରେ ରଖିଛି । ବିରୋଧୀ ମେଂଟର ନେତା କିଏ ବୋଲି ବିଜେପି ବାରମ୍ବାର ପ୍ରଶ୍ନ କରୁଥିଲା । ଆଉ ନିର୍ବାଚନ ଫଳାଫଳ ଆସିବା ପୂର୍ବରୁ ବିରୋଧୀ ନେତା ପରସ୍ପରକୁ ଭେଟୁଥିଲେ । ତେଲେଙ୍ଗାନା ମୁଖ୍ୟମନ୍ତ୍ରୀ କେସିଆର ମଧ୍ୟ ବିଜେପି ବିରୋଧୀ ଦଳର ନେତାମାନଙ୍କୁ ଭେଟି ସମସ୍ତଙ୍କୁ ଏକଜୁଟ କରିବାକୁ ପ୍ରୟାସ ଚଳାଇଥିଲେ । ହେଲେ ପଶ୍ଚିମବଙ୍ଗରେ ସୃଷ୍ଟି ହୋଇଥିବା ପରିସ୍ଥିତି ପୁଣିଥରେ ମମତା ବାନାର୍ଜୀଙ୍କୁ ଚର୍ଚ୍ଚାର ଆଗରେ ରଖିଛି ଏବଂ ପୁରା ବିରୋଧୀ ଦଳ ତାଙ୍କ ପଛରେ ଛିଡା ହୋଇଥିବା ପରି ମନେ ହେଉଛି ।
କୁହାଯାଉଛି ଜାତୀୟ ରାଜନୀତିରେ ପଶ୍ଚିମବଙ୍ଗର ବଡ ଭୂମିକା ରହିିଛି । କାରଣ ଏଠାରେ ୪୨ଟି ଲୋକସଭା ଆସନରେ ମତଦାନ ହେଉଛି । ଆଗାମୀ ୧୯ ତାରିଖରେ ସପ୍ତମ ତଥା ଶେଷ ପର୍ଯ୍ୟାୟ ମତଦାନ ପୂର୍ବରୁ ଏକାକୀ ମମତା ଯେଭଳି ମୋଦି-ଶାହା ଯୋଡିଙ୍କୁ ଚ୍ୟାଲେଞ୍ଜ ଦେଉଛନ୍ତି, ତାହା ତାଙ୍କ ଛବିକୁ ବିରୋଧୀ ଶିବିରରେ ବଢାଇ ଦେଇଛି । ବିଜେପିର ମନୋମୁଖୀ କାରବାରରେ ବ୍ରେକ୍ ଲଗାଇବାକୁ ମମତା ଓ ଟିଏମସି ହିଁ ସମର୍ଥ ବୋଲି ଧାରଣା ତିଆରି ହେଉଛି । ବ୍ୟୁରୋ ରିପୋର୍ଟ, କନକ ନ୍ୟୁଜ ।