ଭାଗଚାଷୀଙ୍କୁ ନେଇ ବିଧାନସଭା ଗରମ ! ପ୍ରଶ୍ନ ପଚାରିଲେ ନରସିଂହ, ଅସହାୟ ହୋଇପଡିଲେ ଦାମ ! କହିଲେ, ଭାଗଚାଷୀଙ୍କୁ ସ୍ୱୀକୃତି ଦେବାକୁ ଚିଠି ଲେଖିଛି କିନ୍ତୁ କାର୍ଯ୍ୟକାରୀ ହେଉନି
କନକ ବ୍ୟୁରୋ : ବିଧାନସଭା ଶୀତ ଅଧିବେସନ ଆରମ୍ଭ ହେବାର ୫ ଦିନ ପରେ ଗୃହରେ ଚାଷ ଓ ଚାଷୀ ପ୍ରସଙ୍ଗରେ ହେଲା ଆଲୋଚନା । ଚାଷୀଙ୍କୁ କ୍ଷତିପୂରଣ ସହ ଚାଷୀ ଆତ୍ମହତ୍ୟା ପ୍ରସଙ୍ଗରେ କୃଷିମନ୍ତ୍ରୀଙ୍କୁ ଘେରିଲେ ବିରୋଧୀ । ସବୁଠାରୁ ରୋଚକ ଥିଲା ବିରୋଧୀ ଦଳ ନେତା ନରସିଂହ ମିଶ୍ରଙ୍କ ପ୍ରଶ୍ନ ଓ କୃଷିମନ୍ତ୍ରୀ ଦାମୋଦର ରାଉତଙ୍କ ଉତର । ଗୃହରେ ଉତର ଆଳରେ ନିଜ ସରକାରଙ୍କୁ ବି କାଠଗଡାକୁ ଟାଣିଥିଲେ ଦାମ ରାଉତ ।
Kanak News is now on WhatsApp
Join and get latest news updates delivered to you via WhatsApp
ଚାଷୀଙ୍କ ପାଇଁ କାହାର ଦରଦ କେତେ? ଆଜି ବିଧାନସଭା ଆରମ୍ଭ ହେଉ ହେଉ ଗୃହରେ ଦେଖିବାକୁ ମିଳିଥିଲା ଏକ ଭିନ୍ନ ଦୃଶ୍ୟ । ଚାଷୀଙ୍କୁ ନେଇ ଗୃହରେ ମୁହାଁମୁହିଁ ପରିସ୍ଥିତି ଦେଖିବାକୁ ମିଳିଥିଲା ।ଚାଷୀ ଓ ଚାଷ ପ୍ରସଙ୍ଗରେ ବିରୋଧୀ ଆଣିଥିବା ମୁଲତବୀ ପ୍ରସ୍ତାବ ଆଲୋଚନା ସମୟରେ କୃଷିମନ୍ତ୍ରୀ ଦାମୋଦର ରାଉତ ଓ ବିରୋଧୀ ଦଳ ନେତାଙ୍କ ମଧ୍ୟରେ କଥା କଟାକଟି ହୋଇଥିଲା । ନରସିଂହଙ୍କ ଅଭିଯୋଗ ଥିଲା କୃଷିମନ୍ତ୍ରୀ ତାଙ୍କ ପ୍ରଶ୍ନର ଉତ୍ତର ନ ଦେଇ କଥା ବୁଲାଉଛନ୍ତି ।
୧-ନରସିଂହଙ୍କ ପ୍ରଶ୍ନ- ରାଜ୍ୟରେ ୯୦ ପ୍ରତିଶତ ଭାଗଚାଷୀ ବେଆଇନ ଭାବେ ଚାଷ କରୁଛନ୍ତି
-ଦାମଙ୍କ ଉତ୍ତର- ମୁଁ ଭାଗଚାଷୀଙ୍କୁ ସ୍ୱୀକୃତି ଦେବାକୁ ଲେଖିଛି କିନ୍ତୁ କାର୍ଯ୍ୟକାରୀ ହେଉନି ।
୨-ନରସିଂହଙ୍କ ପ୍ରଶ୍ନ- ଜମି ଅଧିକାର ଆଇନ ଅନୁସାରେ ଭାଗଚାଷୀ ଚାଷ କରେନି, ନିୟମ ଉଲ୍ଲଂଘନ କରି ସରକାର କ୍ଷତିପୂରଣ କେମିତି ଦେବେ?
-ଦାମଙ୍କ ଉତ୍ତର- ମରୁଡି, ଚକଡା ପୋକ ଆକ୍ରମଣ, ବର୍ଷା ଯୋଗୁ ଫସଲ ନଷ୍ଟ ପରେ ମଧ୍ୟ ଗତବର୍ଷଠାରୁ ଅଧିକ ଧାନ ହେବ
୩-ନରସିଂହଙ୍କ ପ୍ରଶ୍ନ- ସରକାର କହୁଛନ୍ତି ଧାନର କ୍ୱିଂଟାଲ ପିଛା ଉତ୍ପାଦନ ଖର୍ଚ୍ଚ ୨୩୪୪ ଟଙ୍କା, କ୍ଷତିପୂରଣ ମିଳୁଛି ଏକର ପିଛା ୨୦୦୦ ଟଙ୍କା । ଚାଷୀ ଆତ୍ମହତ୍ୟା କରିବନି କେମିତି?
-ଦାମଙ୍କ ଉତ୍ତର- ୨୦୦୩ରୁ ୨୦୧୩ ଭିତରେ ଚାଷୀର ଆୟ ଦ୍ୱିଗୁଣିତ ହୋଇଛି । ୭୭ ମସିହାରୁ ଏମିତି କେନ୍ଦ୍ର ସରକାର ଦେଖିନି । ଦୟାକରି ଚାଷୀଙ୍କୁ ଆତ୍ମହତ୍ୟା କରିବାକୁ ଉସୁକାନ୍ତୁନି
୪-ନରସିଂହଙ୍କ ପ୍ରଶ୍ନ- ଜଳସେଚିତ ଓ ଅଣଜଳସେଚିତ ଜମିରେ ଉତ୍ପାଦନ ଖର୍ଚ୍ଚ ଅଲଗା କି?
-ଦାମଙ୍କ ଉତ୍ତର- ହାରାକୁଦକୁ ପାଣି ନଆସିବାରୁ ମରୁଡି ହେଲା । ୭୦ ଭାଗ ପାଣି ସମୁଦ୍ରକୁ ପଳାଉଛି ଦାୟୀ କିଏ? ପୋଲାଭରମ, ଛତିଶଗଡରେ ବ୍ୟାରେଜ କଂଗ୍ରେସ ସମୟରେ ଆରମ୍ଭ ହୋଇଥିଲା ।
ତେବେ ବିରୋଧୀ ଦଳ ନେତାଙ୍କ ଶାଣିତ ଆକ୍ରମଣ କୃଷିମନ୍ତ୍ରୀଙ୍କୁ ହରଡଘଣାରେ ପକାଇବା ଆଶଙ୍କାରେ ରାଜସ୍ୱମନ୍ତ୍ରୀ ମହେଶ୍ୱର ମହାନ୍ତି କିଛି ପ୍ରଶ୍ନର ଦେଇଥିଲେ । ତେବେ କୃଷି ମନ୍ତ୍ରୀଙ୍କ ଅବାନ୍ତର ଉତ୍ତର ଶୁଣି ଅସନ୍ତୁଷ୍ଟ ହୋଇ ଗୃହତ୍ୟାଗ କରିଥିଲେ ଉଭୟ ବିଜେପି ଓ କଂଗ୍ରେସ । ତେବେ ଏତିକିରେ ସରିନଥିଲା ଦାମଙ୍କ ସୋ’ । ନରସିଂହ ଚାଷ ସମସ୍ୟା ବିଷୟରେ କିଛି ନ ଜାଣି ଅଯଥା ପ୍ରଶ୍ନ କରୁଛନ୍ତି ଏବଂ ସେ କଣ ଚାଷ ବିଷୟରେ ଜାଣିଛନ୍ତି ବୋଲି ଓଲଟା ପ୍ରଶ୍ନ କରିଥିଲେ ଦାମ । ତୁ ତୁ ମେଁ ମେଁ ଭିତରେ ଦାମ ଭାଗଚାଷୀ ଓ ମହାନଦୀକୁ ନେଇ ନିଜ ଦଳକୁ କାଠଗଡାକୁ ଟାଣିଥିଲେ । ମହାନଦୀର ୭୦ ଭାଗ ପାଣି ବ୍ୟବହାର ନ ହୋଇ ସମୁଦ୍ରକୁ ଯିବା ଓ ଭାଗଚାଷୀ ଚିହ୍ନଟ ନହେବାକୁ ନେଇ ଗୃହରେ ନିଜ ଅସନ୍ତୋଷ ଜାହିର କରିଥିଲେ ଦାମ ।