ଯନ୍ତ୍ରଣା କୋଳରେ ଜୀବନ : ରଙ୍ଗମଂଚରେ ଅଭିନୟ କରି ଦର୍ଶକଙ୍କୁ ହସାଉଥିହା ଯାତ୍ରା କଳାକାର ପ୍ରତାପ ଏବେ ରୋଗ ଶଯ୍ୟାରେ,ଚିକିତ୍ସା ପାଇଁ ଅର୍ଥ ସାଜିଛି ବାଧକ
କନକ ବ୍ୟୁରୋ : ପରିବାର ମୁହଁରେ ଆହାର ଦେଉଥିବା ମଣିଷ ଏବେ ପରିବାର ପାଇଁ ବୋଝ । ଅନ୍ଧାର ରାତିର ରଙ୍ଗମଂଚରେ ଲୋକଙ୍କୁ ହସାଉଥିବା କଳାକାର ଆଖିରେ ଭରି ଯାଇଛି ଲୁହ । ୩୦ ବର୍ଷ ଧରି ଅଭିନୟରେ ମଜି ରହିଥିବା ମଣିଷ ଏବେ ରୋଗଶଯ୍ୟାରେ । ଶିବାନୀ, ଧରିତ୍ରୀ, ନୀୟତି ଭଳି ନାମିଦାମୀ
ଯାତ୍ରା ପାର୍ଟିରେ ଅଭିନୟ କରିଥିବା ଜଗତସିଂହପୁରର ପ୍ରତାପ ମହାନ୍ତି ଏବେ କର୍କଟ ରୋଗରେ ପୀଡିତ ହୋଇ ଜୀବନ ଯୁଦ୍ଧରେ ସଂଗ୍ରାମ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ରଙ୍ଗମଂଚରେ ଅଭିନୟ କରି ଦର୍ଶକଙ୍କ ଆଖିରେ ଲୁହ, ମୁହଁରେ ହସ ଫୁଟାଉଥିବା କଳାକାରଙ୍କ ଆଖିରେ ଧାର ଧାର ଲୁହ । ଏ ଲୁହ ଅଭିନୟର ନୁହେଁ, ଯନ୍ତ୍ରଣା ଆଉ ଅଭାବ ଅନାଟନର । ଜଗତସିଂହପୁର ରଘୁନାଥପୁର ବ୍ଲକ ପିତାମ୍ବାରପୁର ଗାଁର ଯାତ୍ରା କଳାକାର ପ୍ରତାପ ଚନ୍ଦ୍ର ମହାନ୍ତି । ୩୦ ବର୍ଷର କଳାକାର ଜୀବନରେ ବହୁ ନାମିଦାମି ଯାତ୍ରା ପର୍ଟିରେ ହିରୋ, ଭିଲିଆନ ଓ ବିଭିନ୍ନ ଚିରିତ୍ରରେ ଅଭିନୟ କରିଥିବା ମଣିଷ ଏବେ ଜୀବନ ଯୁଦ୍ଧରେ ଲଢେଇ କରିବା ପାଇଁ ଅସମର୍ଥ । କର୍କଟ ରୋଗରେ ପୀଡିତ ହୋଇ ବିଛଣାରେ ପଡିଛନ୍ତି ପ୍ରତାପ ।
ଗୋଡରେ ହୋଇଥିବା ଛୋଟିଆ ଖଣ୍ଡିଆ ଏବେ କ୍ୟାନସର୍ ପରିଣତ ହୋଇଛି । ଚିକିତ୍ସା ପାଇଁ ଡାକ୍ତର କହୁଛନ୍ତି ବହୁତ ପଇସା ଦରକାର । ହେଲେ ଅର୍ଥ ଅଭାବରୁ ଚିକିତ୍ସା କରିନପାରି ବର୍ଷେ ହେବ ବିଛଣାରେ ଛଟପଟ ହେଉଛନ୍ତି ପ୍ରତାପ । ସ୍ତ୍ରୀ ମିନତୀ ପର ଘରେ ମୂଲ ଲାଗି ପରିବାର ମୁହଁରେ ଆହାର ଦେବା ସହ ସ୍ୱାମୀଙ୍କ ପାଇଁ ଔଷଧ କିଣୁଛନ୍ତି । ଏଭଳି ସ୍ଥିତିରେ ଦୁଇ ପୁଅଝିଅଙ୍କ ପାଠପଢାରେ ଡୋରି ବନ୍ଧା ହୋଇଛି । ପରିବାର ଅବସ୍ଥା ଦେଖି ପୁଅ ଏବେ ଗୋଟିଏ ଦୋକାନରେ କାମ କରୁଛି । ଏ ବାବଦରେ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରାଯିବାରୁ ଚିକିତ୍ସା ପାଇଁ ମୁଖ୍ୟମନ୍ତ୍ରୀଙ୍କ ରଲିଫ୍ ପାଣ୍ଠିରୁ ପ୍ରତାପଙ୍କୁ ସାହାଯ୍ୟ କରାଯିବ ବୋଲି ସେ କହିଛନ୍ତି । ଯାତ୍ରା କଳାକାରଙ୍କ ଏଭଳି ପରିସ୍ଥତିରେ ଚିକିତ୍ସା ପାଇଁ ସରକାର ସହାୟତା ଯୋଗାଇ ଦେବା ଜରୁରୀ ହୋଇପଡିଛି ।