ପିଆଜ ଚାଷ କରି କାନ୍ଦୁଛି ଚାଷୀ ! ଭଲ ଅମଳ ହୋଇଥିଲେ ମଧ୍ୟ ବିକ୍ରି କରିବା ପାଇଁ ନାହିଁ ବାଟ, ଶସ୍ତାରେ କିଣିନେଉଛି ଆନ୍ଧ୍ର ଓ ପଶ୍ଚିମବଙ୍ଗ ।

4

କନକ ବ୍ୟୁରୋ : ପିଆଜ ଚାଷ କରି ଅଣ୍ଟା ସଳଖାଇବାକୁ ଚେଷ୍ଟା କରୁଥିବା ଓଡିଆ ଚାଷୀ ପୁଣି ମାଡ ଖାଇଯାଇଛି । ଭଲ ପିଆଜ ଅମଳ କରିଛି କିନ୍ତୁ ବିକ୍ରି କରିବା ପାଇଁ ବାଟ ନାହିଁ । ଫଳରେ ବିଲ ମୁଣ୍ଡରୁ ହିଁ ଅତି ଶସ୍ତା ଦରରେ ଆନ୍ଧ୍ର ଓ ପଶ୍ଚିବଙ୍ଗର ଚାଷୀ ପିଆଜ କିଣିନେଉଛନ୍ତି ।

କଳାହାଣ୍ଡି ପରେ ଟିଟିଲାଗଡ଼ର ଏହି ଦୃଶ୍ୟ ବୟାନ କରୁଛି ଓଡ଼ିଶାର ଗ୍ରାମାଞ୍ଚଳରେ ଅର୍ଥକାରୀ ଫସଲ ଚାଷ କରି ବି କେମିତି ଫସି ଯାଉଛି ଚାଷୀ, କେଉଁଠି ରଖିବେ, କ’ଣ କରିବେ ସେହି ଚିନ୍ତା ଅମଳ ପରଠାରୁ ହିଁ ଚାଷୀଙ୍କୁ ଘାରିବାରେ ଲାଗିଛି । ତେଣୁ ଆଉ କିଛି ବାଟ ନପାଇ ବିଲ ମୁଣ୍ଡରୁ ହିଁ ବିକ୍ରି କରିଦେଉଛି ପିଆଜ । । ଆଉ ସେ ଦର ହେଉଛି କିଲୋକୁ ମାତ୍ର ଛଅ ଟଙ୍କା ।

ଭୁବନେଶ୍ୱର କଟକ ପରି ସହରରେ ୧୫ରୁ ୨୦ ଟଙ୍କା ଦରରେ ପିଆଜ ବିକ୍ରି ହେଉଛି । ଆଉ ସମସ୍ତେ ଜାଣିଛନ୍ତି ଏହି ପିଆଜର ଦର ୫୦ରୁ ୬୦ ଟଙ୍କା ମଧ୍ୟ ଛୁଇଁଯାଏ । କିନ୍ତୁ ବିଡମ୍ବନା ହେଉଛି ଯେତେବେଳେ ପିଆଜ ଅମଳ ହୁଏ ତାକୁ ସାଇତା ରଖିବା ପାଇଁ ବ୍ୟବସ୍ଥା ନାହିଁ ।

ଟିଟିଲାଗଡ଼ କିମ୍ବା କଳାହାଣ୍ଡିର ଚାଷୀମାନେ ପିଆଜ ଚାଷ କରିବା ପାଇଁ କେତେ ଟଙ୍କା ଖର୍ଚ୍ଚ କରନ୍ତି ଏବଂ କେତେ ଟଙ୍କା ପାଆନ୍ତି । ପିଆଜ ଚାଷ ପାଇଁ ୧ ଏକର ପିଛା ଖର୍ଚ୍ଚ ହୁଏ ୩୦ରୁ ୩୫ ହଜାର ଟଙ୍କା । ଏଥିରେ ବିହନ, ସାର ଓ ଶ୍ରମିକର ଖର୍ଚ୍ଚ ଅନ୍ତର୍ଭୁକ୍ତ । ଯଦି ସବୁ କିଛି ଠିକ୍ ରୁହେ, ତେବେ ଏକର ପିଛା ୬୫ରୁ ୭୦ କ୍ୱିଣ୍ଟାଲ ପିଆଜ ଅମଳ ହୁଏ । ଯଦି ଏହି ପିଆଜକୁ ୬ ଟଙ୍କା କିଲୋ ବିକ୍ରି କରାଯାଏ, ତେବେ ଚାଷୀକୁ ମିଳିବ ୩୮ ହଜାରରୁ ୪୦ ହଜାର ଟଙ୍କା । ଯଦି ୫ରୁ ୬ ଟଙ୍କା ଦରରେ ଚାଷୀ ତାର ପିଆଜ ବିକ୍ରି କରିଦିଏ, ତେବେ ଯେତିକି ଟଙ୍କା ସେ ଚାଷ ପାଇଁ ଖର୍ଚ୍ଚ କରିଥିଲା ସେତିକି ଟଙ୍କା ହିଁ ଫେରସ୍ତ ପାଇବ । ଯେଉଁଥିରେ କି ଲାଭ କିଛି ରହିବ ନାହିଁ ।

ଓଡ଼ିଶାରେ ବାର୍ଷିକ ପ୍ରାୟ ୩ ଲକ୍ଷ ମେଟ୍ରିକ୍ ଟନ୍ ପିଆଜର ଆବଶ୍ୟକତା ଥିବା ବେଳେ ପ୍ରାୟ ୪ ଲକ୍ଷ ମେଟ୍ରିକ୍ ଟନ୍ ପିଆଜ ଉତ୍ପାଦନ ହୋଇଥାଏ । କିନ୍ତୁ ଅମଳ ବେଳରୁ ହିଁ ଯଦି ୫ରୁ ୬ ଟଙ୍କା ଦରରେ ପିଆଜକୁ ଆନ୍ଧ୍ର, ଛତିଶଗଡ଼ ଓ ମଧ୍ୟପ୍ରଦେଶର ବ୍ୟବସାୟୀ କିଣି ନିଅନ୍ତି, ତେବେ ପିଆଜ ଦର ଓଡ଼ିଶାରେ ୫୦ରୁ ୬୦ ଟଙ୍କା ହେବାରେ କୌଣସି ଅସ୍ୱାଭାବିକତା ନାହିଁ । ଏବଂ ଚାଷୀ ମଧ୍ୟ ଅଭାବୀ ବିକ୍ରିର ଶିକାର ହେବାରେ ବିଶେଷ କିଛି ଆଶ୍ଚର୍ଯ୍ୟ ହେବାର  ନାହିଁ ।

Comments are closed.