ଛତିଶଗଡ ସରକାରଙ୍କ ନିଆରା ଉଦ୍ୟମ । ସମସ୍ତ ୨୭ ଜିଲ୍ଲାରେ ଦିନକ ପାଇଁ ନିଯୁକ୍ତ ହେଲେ ଜିଲ୍ଲାପାଳ । ଉଚ୍ଚ ଅଧିକାରୀଙ୍କ କାମ ବିଷୟରେ ଜାଣିଲେ ଯୁବକଯୁବତୀ
କନକ ବ୍ୟୁରୋ : ଦିନିକିଆ ମୁଖ୍ୟମନ୍ତ୍ରୀ ପଦ ପରି ଚରିତ୍ର ନେଇ ଚର୍ଚାରେ ଆସିଥିଲା ବଲିଉଡ ଅଭିନେତା ଅନିଲ କପୁରଙ୍କ ଫିଲ୍ମ ନାୟକ । ଏହାକୁ ନେଇ ଅତୀତରେ ଅନେକ ଚର୍ଚା ମଧ୍ୟ ହୋଇଥିଲା । ଏବେ ଏପରି କାହାଣୀ ଦେଖିବାକୁ ମିଳିଛି ବାସ୍ତବ ଜୀବନରେ । ଛତିଶଗଡର ସମସ୍ତ ୨୭ ଟି ଜିଲ୍ଲାରେ ୨୭ ଜଣ ଯୁବକ ଯୁବତି ଦିନକ ପାଇଁ ଜିଲ୍ଲାପାଳ ଭାବେ ଦାୟିତ୍ୱ ଗ୍ରହଣ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଛତିଶଗଡ ଧମତରି ଜିଲ୍ଲାର ସତ୍ୟମ ସିହ୍ନା ସୁକୁମା ଜିଲ୍ଲାପାଳ ଭାବେ ଦାୟିତ୍ୱ ନେଇ ଜିଲ୍ଲାପାଳଙ୍କ ସହ ସମସ୍ତ ସରକାରୀ କାମ ତଦାରଖ କରିଥିଲେ । ସତ୍ୟମ ତାଙ୍କ ମାଆଙ୍କ ସହ ଜିଲ୍ଲାପାଳଙ୍କ କାର୍ଯ୍ୟାଳୟକୁ ପହଁଚି ଥିଲେ । ସେଠାରେ ଜିଲ୍ଲାପାଳଙ୍କ ସହ ଆଲୋଚନା କରି କ୍ଷେତ୍ର ପରିଦର୍ଶନ କରି ଥିଲେ । ଶିକ୍ଷା ଦ୍ୱାରା ହିଁ ସୁକୁମା ପରି ମାଓ ଅଧ୍ୟୁଷିତ ଅଂଚଳରେ ମାଓ ସମସ୍ୟାର ମୁଳ ପୋଛ ହୋଇ ପାରିବ ବୋଲି ମତ ରଖିଛନ୍ତି ସତ୍ୟମ ।
ସେହିପରି ବସ୍ତର ଜିଲ୍ଲାରେ ଦୀପ୍ତି ପାଇକରା ଏବଂ ରାୟପୁର ଠାରେ ଶ୍ରୀକ୍ରିତି ଦିଓାନ ଜିଲ୍ଲାପାଳଙ୍କ କାର୍ଯ୍ୟାଳୟ ପହଁଚି ଜିଲ୍ଲାର ବରିଷ୍ଠ ଅଧିକାରୀଙ୍କ ସହ ଆଲୋଚନା କରିଛନ୍ତି । ଏଥି ସହ ଜିଲ୍ଲାପାଳଙ୍କ ଦିନଚର୍ଯ୍ୟା କେମିତି ରହେ, କେମିତି ସେ କ୍ଷେତ୍ର ପରିଦର୍ଶନ କରନ୍ତି । କେମିତି ଲୋକଙ୍କ ଅଭିଯୋଗର ଶୁଣାଣି କରି ନ୍ୟାୟ ନିଶାପ କରନ୍ତି ତାହା ଜାଣିବାକୁ ଚାହିଁ ଥିଲେ ଯୁବ ଜିଲ୍ଲାପାଳମାନେ । ଛତିଶଗଡ ସରକାରଙ୍କ ୧୪ ବର୍ଷ ପୁର୍ତି ଅବସରରେ ଯୁବ ପିଢିଙ୍କୁ ପ୍ରଶାସନିକ ସେବା କ୍ଷେତ୍ରରେ ପ୍ରୋତ୍ସାହନ ଯୋଗାଇବା ଲାଗି ଏଭଳି ପଦକ୍ଷେପ ନିଆଯାଇ ଥିବା ଜଣା ପଡିଛି ।
ୟୁଥ ସ୍ପାର୍କ ନାମକ ଏକ ପ୍ରତିଯୋଗିତା ଜରିଆରେ କଲେଜ ପଢୁଥିବା ପ୍ରାୟ ୫ ଲକ୍ଷ ଛାତ୍ର ଛାତ୍ରୀଙ୍କ ମଧ୍ୟରୁ ଛତିଶଗଡ ସରକାର ୨୭ ଯୁବକଯୁବତୀ ମାନଙ୍କୁ ଚୟନ କରିଥିଲେ । ପରେ ୨୭ ଟି ଜିଲ୍ଲାର ଦିନକ ଜିଲ୍ଲାପାଳ ଭାବେ ନିଯୁକ୍ତି ଦେଇଥିଲେ ସରକାର । ୟୁ.ପି.ଏସ.ସି ଆଶାୟୀ ପ୍ରାର୍ଥୀଙ୍କୁ ଉତ୍ସାହିତ କରିବା ସହ ସେମାନଙ୍କୁ ପ୍ରୋତ୍ସାହନ ଯୋଗାଇବା ଲାଗି ଏପରି ପଦକ୍ଷେପ ନିଆ ଯାଇଥିବା ଜଣାପଡିଛି ।