ପୁଣି ଭାରତକୁ ଧମକାଇଲା ଚୀନ୍ ! ଚେତାବନୀକୁ ବେଖାତିର କଲେ ଯୁଦ୍ଧ
କନକ ବ୍ୟୁରୋ : ଭାରତ-ଚୀନ୍-ଭୁଟାନ ସୀମାର ବିବାଦୀୟ ଡୋକଲାମ ଅଂଚଳକୁ ବଳପୂର୍ବକ ଅକ୍ତିଆର କରିବାକୁ ପ୍ରୟାସ କରୁଥିବା ଚୀନ୍ ତୁହାକୁ ତୁହା ଯୁଦ୍ଧ ଧମକ ଦେଇଚାଲିଛି । ବିଗତ ୨୪ ଘଣ୍ଟା ମଧ୍ୟରେ ଦ୍ୱିତୀୟ ଥର ପାଇଁ ଭାରତକୁ ପୁଣି ଧମକାଇଛି ଚୀନ୍ । ଚୀନ୍ର ଚେତାବନୀକୁ ଭାରତ ଗମ୍ଭୀରତାର ସହ ନେବା ଆବଶ୍ୟକ, ଅନ୍ୟଥା ଏହା ଯୁଦ୍ଧର ସମ୍ମୁଖୀନ ହେବ ବୋଲି ଚୀନ୍ ସରକାରୀ ଖବରକାଗଜ ଗ୍ଲୋବାଲ୍ ଟାଇମ୍ସ ସଂପାଦକୀୟରେ କୁହାଯାଇଛି । ୧୯୬୨ରେ ଜବାହରଲାଲ ନେହରୁ ପ୍ରଧାନମନ୍ତ୍ରୀ ଥିବା ସମୟରେ ଚୀନ୍, ଭାରତକୁ ସୀମା ବିବାଦ ନେଇ ଅନେକ ବାର ଚେତାବନୀ ଦିଆଯାଇଥିଲା, କିନ୍ତୁ ସେ ତାଙ୍କର ଆଭିମୁଖ୍ୟରେ ପରିବର୍ତ୍ତନ ଆଣିନଥିଲେ ଓ ଭାରତ ଏହାର ପରିଣାମ ଭୋଗିଥିଲା ।
Kanak News is now on WhatsApp
Join and get latest news updates delivered to you via WhatsApp
ଯଦି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଚୀନ୍ର ଚେତାବନୀକୁ ବେଖାତିର କରିଚାଲିବେ ତା’ହେଲେ ଯୁଦ୍ଧ ସୁନିଶ୍ଚିତ ବୋଲି ଗ୍ଲୋବାଲ ଟାଇମ୍ସ ମାଧ୍ୟମରେ ଚୀନ୍ ଚେତାବନୀ ଦେଇଛି । ଗ୍ଲୋବାଲ ଟାଇମ୍ସ ମାଧ୍ୟମରେ ମାସକ ମଧ୍ୟରେ ଭାରତକୁ ୮ ଥର ଯୁଦ୍ଧ ଧମକ ଦିଆଯାଇଛି । ଭାରତ ଏକ ଅନଭିଜ୍ଞ ଓ ଦୁର୍ବଳ ରାଷ୍ଟ୍ର ବୋଲି ଗ୍ଲୋଗାଲ ଟାଇମ୍ସ ସଂପାଦକୀୟରେ କୁହାଯାଇଛି । ୧୯୬୨ ଯୁଦ୍ଧରୁ ଭାରତ କିଛି ବି ଶିକ୍ଷାଲାଭ କରିନାହିଁ ଏବଂ ଏହାର ଭୁଲ୍ ନୀତି ଭାରତ ପାଇଁ ବହୁତ ମହଙ୍ଗା ପଡ଼ିବ ବୋଲି ଚୀନ୍ ଚେତାଇ ଦେଇଛି ।
ତେବେ ଚୀନ୍ର ଏଭଳି ଯୁଦ୍ଧ ବୟାନ ଭାରତକୁ ତା’ର ନୀତିରୁ ବିଚ୍ୟୁତ କରିପାରିବ ନାହିଁ ବୋଲି ବିଦେଶ ମନ୍ତ୍ରାଳୟ ସ୍ପଷ୍ଟ କରିଦେଇଛି । ଡୋକଲାମରେ ସ୍ଥିତାବସ୍ଥା ବଜାୟ ରଖିବାକୁ ଭାରତ ବଦ୍ଧପରିକର ବୋଲି ଜଣାଇଦେଇଛି । ବିଶ୍ୱ ସମୁଦାୟକୁ ଭୁଲ୍ ତଥ୍ୟ ଦେଇ ଭାରତକୁ ଏକ ଅନୁପ୍ରବେଶକାରୀ ରାଷ୍ଟ୍ର ଭାବେ ଚିତ୍ରଣ କରିବାକୁ ଚୀନ୍ ସରକାର ଲଗାତାର ପ୍ରୟାସ ରଖିବା ସହ ଭାରତର ମନୋବଳ ଭାଙ୍ଗିବାକୁ ଭୟ ଦେଖାଇ ଚାଲିଛି । ଗତକାଲି ଚୀନ୍ ପିପୁଲସ୍ ଲିବରେସନ ଆର୍ମିର ବରିଷ୍ଠ କର୍ଣ୍ଣେଲ ଲି ଲି କହିଥିଲେ ଯେ ଯଦି ଭାରତ ଯୁଦ୍ଧରୁ ବର୍ତ୍ତିବାକୁ ଚାହୁଛି ତା’ହେଲେ ଡୋକଲାମ ଅଂଚଳରୁ ତୁରନ୍ତ ସୈନ୍ୟ ପ୍ରତ୍ୟାହାର କରିବା ଉଚିତ । ନିକଟରେ ଚୀନ୍ ସେନା ତିବ୍ଦତରେ କରିଥିବା ଯୁଦ୍ଧାଭ୍ୟାସର ଭିଡିଓ ଜାରି କରି ଭାରତକୁ ଡରାଇବାକୁ ଚେଷ୍ଟା କରିଥିଲା ।
ତେବେ ଚୀନର ବିଭ୍ରାନ୍ତି ଏବଂ ଅପପ୍ରଚାରକୁ ଭାରତ କର୍ଣ୍ଣପାତ ନକରିବାରୁ ହତାଶ ଚୀନ୍ ଏବେ ଭାରତର ମନୋବଳ ଭାଙ୍ଗିବାକୁ ନୂଆନୂଆ ବାହାନା ଖୋଜୁଛି । ଚୀନ୍ ସରକାରୀ ଗଣମାଧ୍ୟମ ପ୍ରତିଦିନ ଭାରତ ବିରୋଧରେ ବିଷୋଦଗାର ଜାରି ରଖିଛି ଏବଂ ଭାରତକୁ ଉଭୟ ସାମରିକ ଏବଂ ଆର୍ଥିକ ଦୃଷ୍ଟିରୁ ଏକ ଦୁର୍ବଳ ରାଷ୍ଟ୍ରଭାବେ ଚିତ୍ରଣ କରାଯାଉଛି । ଦୁଇ ସପ୍ତାହ ମଧ୍ୟରେ ଡୋକଲାମରେ ଛୋଟ ଧରଣର ସାମରିକ କାର୍ଯ୍ୟାନୁଷ୍ଠାନ ଦ୍ୱାରା ଭାରତୀୟ ସେନାକୁ ହଟାଇବାକୁ ଚୀନ୍ ପ୍ରସ୍ତୁତ ରହିଥିବା ଏହାର ଗଣମାଧ୍ୟମ ଗ୍ଲୋବାଲ ଟାଇମ୍ସରେ ଦୁଇଦିନ ତଳେ ପ୍ରକାଶ ପାଇଥିଲା । ତେବେ ଗତକାଲି ଚୀନ୍ ସରକାର ଏହାକୁ ଖଣ୍ଡନ କରି ଏହା ସରକାରଙ୍କ ଆଭିମୁଖ୍ୟ ନୁହେଁ, ସଂପୃକ୍ତ ଗଣମାଧ୍ୟମର ମତ ବୋଲି କହିଥିଲେ। ଚୀନ୍ ଏବେ ଗୋଟିଏ ପଟେ ଭାରତ ବିରୋଧରେ ନେପାଳ ଓ ପାକିସ୍ତାନକୁ ଉସୁକାଇଉଥିବା ବେଳେ ଅନ୍ୟପଟେ ନିଜକୁ ବିଶ୍ୱର ମହାଶକ୍ତିଶାଳୀ ରାଷ୍ଟ୍ରଭାବେ ଉପସ୍ଥାପନ କରି ଭାରତକୁ ଗୌଣ ଦେଖାଇବାକୁ ଚାହୁଛି ।