କନକ ବ୍ୟୁରୋ : ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲଙ୍କ ପାଇଁ ମାଗଣାରେ କେସ୍ ଲଢିବେ ରାମ ଜେଠମଲାନୀ । ଗଣମାଧ୍ୟମକୁ ପ୍ରତିକ୍ରିୟା ଦେଇ ଏହି ବରିଷ୍ଠ ଓକିଲ କହିଛନ୍ତି, କେଜ୍ରିୱାଲ ତାଙ୍କର ଜଣେ ଗରିବ ମହକିଲ । ତେଣୁ ତାଙ୍କ ପାଇଁ ସେ ମାଗଣାରେ କେସ୍ ଲଢିବେ ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ର ଅର୍ଥମନ୍ତ୍ରୀ ଅରୁଣ ଜେଟଲୀ ଦିଲ୍ଲୀ ମୁଖ୍ୟମନ୍ତ୍ରୀଙ୍କ ବିରୋଧରେ କରିଥିବା ମାନହାନୀ ମାମଲାରେ କେଜ୍ରିୱାଲଙ୍କ ଓକିଲ ଅଛନ୍ତି ରାମ ଜେଠମଲାନୀ । ଏବଂ ଏଥିପାଇଁ ପ୍ରାୟ ସାଢେ ତିନି କୋଟି ଟଙ୍କାର ବିଲ୍ କରିଛନ୍ତି ଜେଠମଲାନୀ । ଏହା ସହ କହିଛନ୍ତି ଟଙ୍କା ନଦେଲେ ମାଗଣାରେ ଲଢିବେ କେସ୍ ।
କୋର୍ଟରେ ଥରେ ହାଜର ହେବା ପାଇଁ ଜେଠମଲାନୀ ୨୨ଲକ୍ଷ ଟଙ୍କା ନିଅନ୍ତି । ତେବେ କେଜ୍ରିୱାଲଙ୍କ ମାମଲା ଲଢିବା ପାଇଁ ୧କୋଟି ଓ ୧୧ଥର କୋର୍ଟ ଆସିଥିବାରୁ ଜେଠମଲାନୀ ୩କୋଟି ୪୨ଲକ୍ଷ ଟଙ୍କା ବିଲ୍ କରିଛନ୍ତି । ଏହି ମାମଲାରେ ଦିଲ୍ଲୀ ସରକାର ରାଜ୍ୟପାଳ ଅନିଲ ବୈଜଲଙ୍କୁ ଚିଠି ଲେଖି ରାମ ଜେଠମଲାନୀଙ୍କୁ ଫି’ ବାବଦ ଟଙ୍କା ଦେବାକୁ କହିଥିଲେ । ଏନେଇ ବିଜେପି ମଧ୍ୟ ଅଭିଯୋଗ କରିଛି ଯେ, ଅରବିନ୍ଦ କେଜ୍ରିୱାଲ ବ୍ୟକ୍ତିଗତ ମାମଲା ପାଇଁ ସରକାରୀ ଟଙ୍କାର ଉପଯୋଗ କରୁଛନ୍ତି ।
୨୦୧୫ରେ ଅରୁଣୀ ଜେଟଲୀ ଦିଲ୍ଲୀ ଡିଷ୍ଟ୍ରିକ କ୍ରିକେଟ ଆସୋସିଏସନରେ ଦୁର୍ନୀତି କରିଥିବା ନେଇ ଅଭିଯୋଗ କରିଥିଲେ କେଜ୍ରିୱାଲ । ୨୦୧୩ ପର୍ଯ୍ୟନ୍ତ ୧୩ବର୍ଷ ଧରି ଡିଡିସିଏର ଅଧ୍ୟକ୍ଷ ଥିଲେ ଅରୁଣ ଜେଟଲୀ । ଏହି ଅଭିଯୋଗକୁ ନେଇ ଅରୁଣ ଜେଟଲୀ, କେଜ୍ରିୱାଲଙ୍କ ବିରୋଧରେ ୧୦କୋଟି ଟଙ୍କାର ମାନହାନୀ ମକଦ୍ଦମା ସହ ପଟିଆଲା ହାଉସ କୋର୍ଟରେ ଅପରାଧିକ ମାମଲା ମଧ୍ୟ ରୁଜୁ କରିଥିଲେ ।