ଚିଲିକାରେ ଧିରେ ଧିରେ ବୁଡୁଛି ମାଲେସିଆ ଜାହାଜ । ତେଲ କାଢିବାକୁ ଚାଲିଛି ପ୍ରୟାସ, ପାଣି ଭିତରେ ଜାହାଜର ସ୍ଥିତି ପରଖିଲା କନକ ନ୍ୟୁଜ୍ ।
କନକ ବ୍ୟୁରୋ : ଚିଲିକା ନିକଟ ସମୁଦ୍ରରେ ଫସିରହିଥିବା ମାଲେସିଆ ଜାହାଜର କଂଟେନର ଧିରେ ଧିରେ ପାଣି ଭିତରେ ବୁଡିବାକୁ ଲାଗିଛି । ସେପଟେ ଜାହାଜ ମଧ୍ୟ ଢେଉ ମାଡରେ ଦୋହଲୁଛି ଏବଂ ଗୋଟିଏ ପାଖକୁ ଢଳି ରହିଛି । ଏହାରି ଭିତରେ ଆଜି ଜାହାଜରୁ ତେଲ ନିଷ୍କାସନ ପ୍ରକ୍ରିୟା ଆରମ୍ଭ ହୋଇଛି । ଦୁଇ ଦିନ ଭିତରେ ଜାହାଜରେ ଥିବା ୩୦ ହଜାର ଲିଟର ଡିଜେଲ ସହ ଅନ୍ୟ ତେଲକୁ ବାହାର କରାଯିବ । ପୁରା ସ୍ଥିତି ଦେଖିବା ପାଇଁ ଚିିଲିକା ରାଜହଂସ ନିକଟରେ ପହଁଚିଥିଲା କନକ ନ୍ୟୁଜ୍ କ୍ୟାମେରା ଟିମ୍ । ଆସନ୍ତୁ ଜାଣିବା କେମିତି ରହିଛି ମାଲେସିଆ ଜାହାଜର ସ୍ଥିତି ।
Kanak News is now on WhatsApp
Join and get latest news updates delivered to you via WhatsApp
ଯାନ୍ତ୍ରିକ ତ୍ରୁଟି ଯୋଗୁଁ ଚିଲିକା ରାଜହଂସରେ ଫସି ରହିଥିବା ମାଲେସିଆ ଜାହାଜର କଂଟେନର ଧିରେ ଧିରେ ବୁଡିବା ଆରମ୍ଭ କଲାଣି । ଢେଉ ମାଡରେ କଂଟେନରର ଗୋଟିଏ ପାଖ ଢଳିପଡିଛି । ଅନ୍ୟପଟେ ଲଗାତର ପାଣି ପଶିବାରେ ଲାଗିଛି । ମୁହାଣ ଠାରୁ ଦୂରକୁ ପଳାଇଛି କଂଟେନରଟି । ଯେଉଁଭଳି ଭାବେ କଂଟେନରରେ ପାଣି ପଶୁଛି, ତାହା ଅତିଶୀଘ୍ର ସମ୍ପୂର୍ଣ୍ଣ ବୁଡିଯିବା ଆଶଙ୍କା ଉପୁଜିଛି ।
କଂଟେନରର ଦେଢକିଲୋମିଟର ଦୂରରେ ରହିଛି ଜାହାଜର ଇଂଜିନ । କୂଳରେ ଲାଗିଥିଲେ ମଧ୍ୟ, ଢେଉ ମାଡରେ ଦୋହଲୁଛି । ତିନିଟି ଦଉଡିରେ ଜାହାଜକୁ ଗଛ ସହ ବାନ୍ଧି ରଖାଯାଇଛି । ଯେଉଁଥିରୁ ଦୁଇଟି ଛିଣ୍ଡିଗଲାଣି । ଆଉ ଗୋଟିଏ ଦଉଡି ଭରସାରେ ରହିଛି ଜାହାଜଟି । ତେବେ ପବନ ଓ ଢେଉ ମାଡରେ ଜାହାଜ ବି ଗୋଟିଏ ପାଖକୁ ଢଳିବାରେ ଲାଗିଛି ।
ତେବେ ବଡ କଥା ହେଉଛି, ଜାହାଜରୁ ତେଲ ବାହାର କରିବା ପ୍ରକ୍ରିୟା ଆରମ୍ଭ ହୋଇସାରିଛି । ମୋଟର ଲଗାଯାଇ ବଡ ବଡ ପାଇପ ଦ୍ୱାରା ଜାହାଜର ତେଲକୁ ଜଙ୍ଗଲରେ ରଖାଯାଇଥିବା କଂଟେନରରେ ଭର୍ତି କରାଯିବ । ୭ ଜଣ କର୍ମଚାରୀ ତେଲ ନିଷ୍କାସନ କାମରେ ଲାଗିଥିବା ବେଳେ ଦୁଇ-ତିନି ଦିନ ଭିତରେ ତେଲ ନିଷ୍କାସନ ପ୍ରକ୍ରିୟା ଶେଷ ହେବ ବୋଲି ଜଣାପଡିଛି ।
ଜାହାଜରେ ପ୍ରାୟ ୩୦ ହଜାର ଲିଟର ଡିଜେଲ୍ ଏବଂ ୨ ହଜାର ଲିଟର ଲ୍ୟୁବ ଅଏଲ ଏବଂ ୧୦୦ ଲିଟର ହାଇଡ୍ରୋଲିକ୍ ଅଏଲ ରହିଛି । ଜାହାଜରୁ ତେଲ ଲିକ୍ ହୋଇ ଚିଲିକାର ଜୈବ ବିବିଧତା ପ୍ରତି ବଡ ଧରଣର ବିପଦ ରହିଥିବା ବେଳେ ତେଲ ନିଷ୍କାସନ ପ୍ରକ୍ରିୟା ଆରମ୍ଭ ହୋଇସାରିଛି । ତେବେ ପ୍ରଶାସନ ପାଇଁ ବଡ ଚ୍ୟାଲେଂଜ୍ ରହିବ, କଂଟେନରକୁ ପାଣିରୁ ବାହାର କରିବା । କାରଣ ସମୁଦ୍ର ପାଣି ପଶିଯିବାରୁ ଧିରେ ଧିରେ ବୁଡିବାକୁ ବସିଲାଣି ଜାହାଜର କଂଟେନର ।