କନକ ବ୍ୟୁରୋ : ଏ ଏମିତି ଏକ ଖବର ଯାହା ଜାଣିଲେ ପ୍ରତ୍ୟେକ ଓଡ଼ିଆ ଗର୍ବ ଅନୁଭବ କରିବେ । ଜଣେ ଓଡ଼ିଆ ଡାକ୍ତର କେନିଆର ଏମପି ଭାବେ ନିର୍ବାଚିତ ହୋଇଛନ୍ତି । ଏଭଳି ସଫଳତା ପାଇଛନ୍ତି ଡାକ୍ତର ସ୍ୱରୂପ ରଂଜନ ମିଶ୍ର । ସ୍ୱରୂପ ରଂଜନଙ୍କ ଘର ଜଗତସିଂହପୁର ଜିଲ୍ଲା ଏରସମା ବ୍ଳକର ପଂଚୁପଲ୍ଲୀ ଅଂଚଳରେ । କେନିଆର ‘ୟୁଆସିନ୍ ଗିସୁ କାଉଂଟି’ର କେସେସ୍ ସଂସଦୀୟ ନିର୍ବାଚନ ମଣ୍ଡଳୀରୁ ବିଜୟୀ ହୋଇଛନ୍ତି ସ୍ୱରୂପ ରଂଜନ ମିଶ୍ର । ୫୨ ବର୍ଷୀୟ ଡାକ୍ତର ମିଶ୍ର, ଜୁବୁଲୀ ପାର୍ଟି ଟିକେଟରୁ ନିର୍ବାଚନ ଲଢି ତାଙ୍କର ପ୍ରତିଦ୍ୱନ୍ଦ୍ୱୀଙ୍କୁ ୫ହଜାର ୬୮୧ ଭୋଟରେ ପରାସ୍ତ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
‘ୟୁଆସିନ୍ ଗିସୁ କାଉଂଟି’ ଆସେମ୍ବଲୀର ସ୍ପିକର ତଥା କେନିଆର ପ୍ରତିଷ୍ଠିତ ରାଜନେତା ଆଇଜାକ୍ ଟେରରଙ୍କୁ ସେ ପରାଜିତ କରିଛନ୍ତି । ଡାକ୍ତର ସ୍ୱରୂପ ରଂଜନ ମିଶ୍ର ଓ ତାଙ୍କ ସ୍ତ୍ରୀ ପଲ୍ଲବୀ ମିଶ୍ର ଉଭୟ ସ୍ତ୍ରୀ ରୋଗ ବିଶେଷଜ୍ଞ । ଏହି ଡାକ୍ତର ପତିପତ୍ନୀ ୧୯୯୭ ମସିହାରେ କେନିଆ ଯାଇଥିଲେ । ଅବଶ୍ୟ ଅଷ୍ଟ୍ରେଲିଆ ଯିବା ପାଇଁ ଅର୍ଥ ଯୋଗାଡ ଉଦ୍ଦେଶ୍ୟରେ କେନିଆ ଯାଇଥିଲେ ଡାକ୍ତର ଦମ୍ପତି । ମାତ୍ର କେନିଆବାସୀଙ୍କ ପ୍ରତି ଭଲପାଇବା ସେମାନଙ୍କୁ ସେଇଠି ଅଟକାଇ ଦେଇଥିଲା ।
ଡାକ୍ତର ମିଶ୍ରଙ୍କ ଉର୍ତ୍ସଗୀକୃତ ସେବା ମନୋଭାବ ମଧ୍ୟ କେନିଆବାସୀଙ୍କ ହୃଦୟ ଜୟ କରିଥିଲା । କିଛି ବର୍ଷ ମଧ୍ୟରେ ସେ କେନିଆର ଜଣେ ପ୍ରତିଷ୍ଠିତ ସ୍ତ୍ରୀରୋଗ ବିଶେଷଜ୍ଞ ଭାବେ ନିଜକୁ ପ୍ରତିଷ୍ଠା କରିପାରିଛନ୍ତି । କେନିଆକୁ ନିଜର ଘର ବୋଲି ଭାବନ୍ତି ଡାକ୍ତର ସ୍ୱରୂପ ରଂଜନ ।