ପଶ୍ଚିମ ଓଡ଼ିଶାର ସମସ୍ତ ସହରରେ ବୃଦ୍ଧି ପାଉଛି ତାପମାତ୍ରା ! ବଲାଙ୍ଗୀର ରାଜ୍ୟର ସବୁଠୁ ଉତ୍ତପ୍ତ ସହର
କନକ ବ୍ୟୁରୋ : ସାରା ରାଜ୍ୟରେ ଗ୍ରୀଷ୍ମ ଲହରୀ ବହୁ ଥିବାବେଳେ ଗତକାଲି ରାଜ୍ୟର ୧୩ଟି ସହରରେ ପାରଦ ୪୦ଡିଗ୍ରି ଉପରେ ରହିଥିଲା । ଏଥିରେ ୩ଟି ସହରରେ ପାରଦ ୪୩ଡିଗ୍ରି ଅତିକ୍ରମ କରିଛି । ପଶ୍ଚିମ ଓଡ଼ିଶାର ସମସ୍ତ ସହରରେ ତାପମାତ୍ରା ବଢ଼ୁଥିବାବେଳେ ଉପକୂଳ ଓଡ଼ିଶାରେ ପାରଦ ୪୦ଡିଗ୍ରି ତଳକୁ ଖସିଛି । କିନ୍ତୁ ସାରା ରାଜ୍ୟରେ ଗତକାଲି ବି ଅସହ୍ୟ ତାତି ଅନୁଭୂତ ହୋଇଛି । ବଲାଙ୍ଗୀର ଗତକାଲି ରାଜ୍ୟର ସବୁଠୁ ଉତ୍ତପ୍ତ ସହର ପାଲଟିଛି ।
Kanak News is now on WhatsApp
Join and get latest news updates delivered to you via WhatsApp
ଭୁବନେଶ୍ୱର ପାଣିପାଗ କେନ୍ଦ୍ର ସୂଚନା ଅନୁଯାୟୀ, ଗତକାଲି ରାଜ୍ୟରେ ପ୍ରବଳ ଖରା ଅନୁଭୂତ ହୋଇଥିବାବେଳେ ଆସନ୍ତା କିଛି ଦିନ ପର୍ୟ୍ୟନ୍ତ ଏହିଭଳି ପାଗ ଲାଗି ରହିବ । ସେହିପରି ଏବେ ସମୁଦ୍ରରୁ ସ୍ଥଳ ଭାଗକୁ ପବନ ବହୁଥିବାରୁ ଉପକୂଳ ଓଡ଼ିଶାରେ ତାତି ଅପେକ୍ଷାକୃତ କମ୍ ରହିଛି । ପ୍ରାୟ ସମସ୍ତ ସ୍ଥାନରେ ୪୦ଡିଗ୍ରି ତଳେ ପାରଦ ରହିଛି । କିନ୍ତୁ ଦିନବେଳା ଟାଣ ଖରା ହେଉଥିବାରୁ ଅପରାହ୍ନରେ କାଳବୈଶାଖୀର ସମ୍ଭାବନା ଅଛି । ଆସନ୍ତା ୪୮ଘଣ୍ଟା ମଧ୍ୟରେ ରାଜ୍ୟର ବିଭିନ୍ନ ସ୍ଥାନରେ କାଳବୈଶାଖୀ ଜନିତ ବର୍ଷାପବନ ହେବ ବୋଲି ପାଣିପାଗ କେନ୍ଦ୍ର ପୂର୍ବାନୁମାନ କରିଛି । ଗତକାଲି ଅପରାହ୍ନରେ ଚାନ୍ଦବାଲିରେ କାଳବୈଶାଖୀ ଜନିତ ବର୍ଷା ପବନ ହୋଇଛି । ଏଥିରେ ୧୧ମିଲିମିଟର ବର୍ଷା ହୋଇଥିବାବେଳେ ପ୍ରାୟ ୫୦କିମି ବେଗରେ ପବନ ବହିଛି ।
ପାଣିପାଗ କେନ୍ଦ୍ର ସୂଚନା ଅନୁଯାୟୀ, ପଶ୍ଚିମ ଓଡ଼ିଶାର ପ୍ରାୟ ସମସ୍ତ ସ୍ଥାନରେ ପାରଦ ୪୦ଡିଗ୍ରି ଉପରେ ଥିବାବେଳେ ବଲାଙ୍ଗୀର ଏବଂ ଏହା ନିକଟବର୍ତ୍ତୀ ସହରରେ ପାରଦ ୪୩ଡିଗ୍ରି ଉପରେ ରହିଛି ବଲାଙ୍ଗୀର ଓ ସୋନପୁରରେ ରାଜ୍ୟର ସର୍ବାଧିକ ତାପମାତ୍ରା ୪୩.୨ଡିଗ୍ରି ରେକର୍ଡ ହୋଇଥିବାବେଳେ ଟିଟିଲାଗଡ଼ରେ ୪୩ଡିଗ୍ରି ରେକର୍ଡ ହୋଇଛି । ସେହିପରି ଅନୁଗୁଳରେ ୪୧.୭, ଝାରସୁଗୁଡ଼ାରେ ୪୧.୨, ସମ୍ବଲପୁରରେ ୪୨, ସୁନ୍ଦରଗଡ଼ରେ ୪୦, ହୀରାକୁଦରେ ୪୨.୧, ତାଳଚେରରେ ୪୦.୭, ଭବାନିପାଟଣାରେ ୪୧.୨, ଫୁଲବାଣୀରେ ୪୦.୨, ମାଲକାନଗିରିରେ ୪୦.୬, ଢେଙ୍କାନାଳରେ ୪୦.୩ ଡିଗ୍ରି ରେକର୍ଡ ହୋଇଛି । ସେହିପରି ଭୁବନେଶ୍ୱରରେ ୩୯.୪, କଟକରେ ୩୮.୪, ଚାନ୍ଦବାଲିରେ ୩୮.୭, ବାଲେଶ୍ୱରରେ ୩୫.୧, ପାରାଦୀପରେ ୩୨, ଗୋପାଳପୁରରେ ୩୨, ପୁରୀରେ ୩୩.୬ଡିଗ୍ରି ରେକର୍ଡ ହୋଇଛି ।