ଅଠରାଙ୍ଗରେ ଗୁଞ୍ଜରିତ ହେଲା ସହିଦ ଅମର ରହେ । କାଶ୍ମୀରରେ ବଳିଦାନ ଦେଇଥିବା ହେମନ୍ତ ପଣ୍ଡାଙ୍କର ଅନ୍ତିମ ସଂସ୍କାର ସଂପନ୍ନ
ପୈତୃକ ଗାଁରେ ଶୋକାକୁଳ ପରିବେଶ, ଗୁମୁରି ଗୁମୁରି କାନ୍ଦୁଛି ଜନ୍ମମାଟି
କନକ ବ୍ୟୁରୋ: ସହିଦ ଯବାନ ହେମନ୍ତ ପଣ୍ଡାଙ୍କର ଅନ୍ତିମ ସଂସ୍କାର ସଂପନ୍ନ ହୋଇଛି । ପୈତୃକ ଗାଁ ବେଗୁନିଆର ଅଠରାଙ୍ଗରେ ରାଷ୍ଟ୍ରୀୟ ମର୍ଯ୍ୟାଦା ସହ ସହିଦଙ୍କୁ ଅନ୍ତିମ ବିଦାୟ ଦିଆଯାଇଛି । ଶହ ଶହ ଗାଁ ଲୋକଙ୍କ ଉପସ୍ଥିତିରେ ସହିଦ ଯବାନ ପଂଚଭୂତରେ ଲୀନ ହୋଇଛନ୍ତି । ଆଜି ସକାଳୁ ସହିଦ ଯବାନଙ୍କ ଅନ୍ତିମ ଦର୍ଶନ କରିଥିଲେ ଅଂଚଳର ଶହ ଶହ ଲୋକ ।
Kanak News is now on WhatsApp
Join and get latest news updates delivered to you via WhatsApp
ସହିଦ ଯବାନଙ୍କ ପାର୍ଥିବ ଶରୀର ପାଖରେ ତାଙ୍କ ବାପା କାନ୍ଦୁଥିବା ହୃଦୟ ବିଦାରକ ଦୃଶ୍ୟ ସମସ୍ତଙ୍କ ଆଖିରେ ଲୁହ ଆଣିଦେଇଥିଲା । ଅଠରାଙ୍ଗରେ ସହିଦଙ୍କ ମରଶରୀରକୁ ଶୋଭାଯାତ୍ରାରେ ପରିକ୍ରମା କରି ଶ୍ମଶାନକୁ ନେବା ପରେ ସେଠାରେ ଅନ୍ତିମ ସଂସ୍କାର କରାଯାଇଛି । ଗତରାତିରେ ଏୟାର ଇଣ୍ଡିଆର ଏକ ସ୍ୱତନ୍ତ୍ର ବିମାନରେ ସହିଦଙ୍କ ପାର୍ଥିବ ଶରୀର ଭୁବନେଶ୍ୱର ପହିଂଚିଥିଲା ।
ପରେ ହେମନ୍ତ ପଣ୍ଡାଙ୍କ ମରଶରୀରକୁ ପୈତୃକ ଗ୍ରାମ ବେଗୁନିଆର ଅଠରାଙ୍ଗକୁ ନିଆଯାଇଥିଲା । ଗଣତନ୍ତ୍ର ଦିବସରେ ସୀମାରେ ସହିଦ ହୋଇଥିଲେ ବୀର ଯବାନ ହେମନ୍ତ ପଣ୍ଡା । ଜାମ୍ମୁ-କାଶ୍ମୀରର ବାରାମୁଲାରେ ଆତଙ୍କବାଦୀଙ୍କ ସହ ମୁହାଁମୁହିଁ ବେଳେ ପ୍ରାଣ ହରାଇଥିଲେ ଖୋର୍ଦ୍ଧା ବେଗୁନିଆ ଅଂଚଳର ହେମନ୍ତ କୁମାର ପଣ୍ଡା ।