ଆନ୍ଦୋଳନରେ ଆଇନଜୀବୀ ଜେଲରେ ବିଚାରାଧିନ କଏଦୀ : ଅଧାରେ ଅଟକିଛି ବିଚାର, ଜୟପୁର ଜେଲରେ ବଢୁଛି କଏଦୀଙ୍କ ସଂଖ୍ୟା
କନକ ବ୍ୟୁରୋ : ଆନ୍ଦୋଳନରେ ଓକିଲ । ଜେଲରେ ବିଚାରାଧୀନ କଏଦୀ । ଆଉ ଜେଲ ବାହାରେ ଲାଗୁଛି କଏଦୀଙ୍କ ସଂପର୍କୀୟଙ୍କ ଭିଡ । ଜୟପୁର ଠାରୁ କଟକ ସବୁଠି ଓକିଲ ସଂଘର ଆନ୍ଦୋଳନ । ଆଇନର ବାଟ ଦେଖାଉଥିବା ଆଇନଜୀବୀଙ୍କ ଆନ୍ଦୋଳନ ଯୋଗୁଁ ଜେଲରେ ବିଚାରାଧିନ କଏଦୀଙ୍କ ସଂଖ୍ୟା ଦିନକୁ ଦିନ ବଢୁଛି । ଫଳରେ ଚିନ୍ତାରେ ପଡିଛନ୍ତି ଜୟପୁର ଜେଲ ଅଧିକାରୀ ।
Kanak News is now on WhatsApp
Join and get latest news updates delivered to you via WhatsApp
ଜୟପୁରରେ ସ୍ଥାୟୀ ବେଂଚ ପ୍ରତିଷ୍ଠା ଦାବି ସହ କଟକରେ ଓକିଲଙ୍କୁ ମାଡ଼ ଘଟଣାରେ ଆଇନଜୀବୀଙ୍କ କାର୍ଯ୍ୟବନ୍ଦ ଆନ୍ଦୋଳନ ଚାଲିଛି । ଆଉ ଏହାରି ଭିତରେ ଛନ୍ଦି ହୋଇ ପଡ଼ିଛନ୍ତି ବିଚାରାଧିନ କଏଦୀ । ଜୟପୁର ଜେଲରେ ୧୫୩ ଜଣ କଏଦୀ ରହିବା ପାଇଁ ବ୍ୟବସ୍ଥା ଥିବା ବେଳେ ଏବେ ସେଠାରେ ୩୩୮ ଜଣ ଅଭିଯୁକ୍ତ ରହିଛନ୍ତି । ସେମାନଙ୍କ ମଧ୍ୟରୁ ୬ ଜଣ ପୁରୁଷ କଏଦୀ ରହିଥିବା ବେଳେ ୨ଜଣ ମହିଳା କଏଦୀ ରହିଛନ୍ତି । ବାକି ୩୩୦ ଜଣ ବିଚାରଧିନ କଏଦୀ ଭାବେ ରହିଛନ୍ତି । ତେଣୁ ସେମାନଙ୍କୁ ଦେଖି କରିବା ପାଇଁ ପ୍ରତିଦିନ ସକାଳୁ ଜେଲ ଗେଟ୍ ପାଖରେ ସଂପର୍କୀୟଙ୍କ ଭିଡ ଲାଗୁଛି ।
ଚଳିତ ମାସ ୧୨ ତାରିଖ ଠାରୁ ଅଭିଯୁକ୍ତଙ୍କୁ ବିଚାର ପାଇଁ ଜେଲରୁ କୋର୍ଟକୁ ନିଆଯାଇନାହିଁ । ଫଳରେ ନ୍ୟାୟ ଅପେକ୍ଷାରେ ଥିବା ବିଚାରାଧିନ କଏଦୀ ଓ ସେମାନଙ୍କ ପରିବାର ଲୋକଙ୍କ ଆଖିରୁ ନିଦ ହଜିଯାଇଛି । ଜେଲ ଫାଟକ କଣାରେ ନିଜ ଲୋକଙ୍କୁ ଭେଟିବାକୁ ସମ୍ପର୍କୀୟଙ୍କ ଭିଡ ଲାଗୁଛି । ସେପଟେ କଏଦୀଙ୍କ ସଂଖ୍ୟା ବଢିବାରୁ ଜେଲ କର୍ତ୍ତୃପକ୍ଷ ମଧ୍ୟ ଚିନ୍ତାରେ ପଡିଛନ୍ତି ।
ଲୋକଙ୍କୁ ସୁବିଧାରେ ନ୍ୟାୟ ଦେବା ପାଇଁ ଜୟପୁରରେ ସ୍ଥାୟୀ ବେଂଚ ପ୍ରତିଷ୍ଠା କରିବା ଜରୁରୀ । କିଛି ପାଇବାକୁ ହେଲେ କିଛି ସହିବାକୁ ହେବ ବୋଲି କହିଛନ୍ତି ଜୟପୁର ଓକିଲ ସଂଘ ସଭାପତି ।
କେବଳ ଜୟପୁର ଜେଲ ନୁହେଁ ରାଜ୍ୟର ଅନେକ ସ୍ଥାନରେ ଓକିଲଙ୍କ ଆନ୍ଦୋଳନ ଯୋଗୁଁ ଏଭଳି ସମସ୍ୟା ସୃଷ୍ଟି ହେଉଥିବା ସାମ୍ନାକୁ ଆସିଛି ।