ଏଣିକି ଘରୋଇ ଆମ୍ବୁଲାନ୍ସକୁ ବି ନିୟନ୍ତ୍ରଣ କରିବେ ସରକାର : ଉଭୟ ସରକାରୀ ଓ ଘରୋଇ ଆମ୍ବୁଲାନ୍ସରେ ଲାଗିବ ଜିପିଏସ୍‌ ଟ୍ରାକିଂ ମେସିନ୍,ଦୁର୍ଘଟଣାଗ୍ରସ୍ତଙ୍କୁ ତୁରନ୍ତ ସେବା ଯୋଗାଇବା ପାଇଁ ପ୍ରୟାସ

149

କନକ ବ୍ୟୁରୋ : ଏଣିକି ଘରୋଇ ଆମ୍ବୁଲାନ୍ସକୁ ବି ସରକାର ନିୟନ୍ତ୍ରଣ କରିବେ। ଆମ୍ବୁଲାନ୍ସ ଚଳାଇବା ପାଇଁ ସ୍ବତନ୍ତ୍ର ମାନକ ପ୍ରସ୍ତୁତ ହେବ । ଏହା ସହ ଉଭୟ ସରକାରୀ ଓ ଘରୋଇ ଆମ୍ବୁଲାନ୍ସ ଗୋଟିଏ ‘କଲ୍‌ ସେଣ୍ଟର୍‌’ ଅଧୀନରେ ରହିବେ । ସବୁଥିରେ ଜିପିଏସ୍‌ ଟ୍ରାକିଂ ମେସିନ୍ ଲଗାଯାଇ ଅନ୍‌ଲାଇନ୍ ମନିଟରିଂ ହେବ । ଆଜି ମୁଖ୍ୟ ଶାସନ ସଚିବ ଅସିତ ତ୍ରିପାଠୀଙ୍କ ଅଧ୍ୟକ୍ଷତାରେ ବସିଥିବା ଏକ ଗୁରୁତ୍ବପୂର୍ଣ୍ଣ ବୈଠକରେ ଏହି ନିଷ୍ପତ୍ତି ନିଆଯାଇଛି ।

ଦୁର୍ଘଟଣାର ପ୍ରଥମ ୪୮ ଘଣ୍ଟାରେ କିପରି ମାଗଣା ଉଚ୍ଚମାନର ଚିକିତ୍ସା ସୁବିଧା ଯୋଗାଇ ଦିଆଯିବ, ସେ ସମ୍ପର୍କରେ ଲୋକସେବା ଭବନରେ ସମୀକ୍ଷା ବୈଠକ ଆୟୋଜନ କରାଯାଇଥିଲା । ଏଥିରେ ଆମ୍ବୁଲାନ୍ସ‌ ସେବା ସମ୍ପର୍କରେ ଆଲୋଚନା ହୋଇଥିଲା । ବୈଠକରୁ ମିଳିଥିବା ସୂଚନା ଅନୁଯାୟୀ ରାଜ୍ୟରେ ଏବେ ୫୧୨ଟି ୧୦୮-ଆମ୍ବୁଲାନ୍ସ ଓ ୧୯ଟି ଅଗ୍ନିଶମ ଆମ୍ବୁଲାନ୍ସ ଜରୁରୀକାଳୀନ ସେବା ଯୋଗାଉଛନ୍ତି । ଜାତୀୟ ରାଜପଥ କର୍ତ୍ତୃପକ୍ଷ ପ୍ରତି ୫୦ କିମି ରାସ୍ତା ପାଇଁ ଗୋଟିଏ ଆମ୍ବୁଲାନ୍ସ ବ୍ୟବସ୍ଥା କରିଛନ୍ତି ।

ଆବଶ୍ୟକସ୍ଥଳେ ପୁଲିସ୍‌ ପିସିଆର୍‌ ଓ ଅଗ୍ନିଶମ ସେବା ସଂସ୍ଥା ଗାଡ଼ି ମଧ୍ୟ ଦୁର୍ଘଟଣାଗ୍ରସ୍ତ ବ୍ୟକ୍ତିଙ୍କୁ ଜରୁରୀକାଳୀନ ସେବା ଯୋଗାଉଛନ୍ତି । ଏହା ବାଦ୍ ରାଜ୍ୟରେ ପ୍ରାୟ ୧୫୬୨ ଘରୋଇ ଆମ୍ବୁଲାନ୍ସ କାର୍ଯ୍ୟ କରୁଛି । ଏଗୁଡ଼ିକ ମୁଖ୍ୟତଃ ବିଭିନ୍ନ ହସ୍ପିଟାଲ, ସେବା ସଂସ୍ଥା, ସ୍ବେଚ୍ଛାସେବୀ ସଂସ୍ଥା, ଶିଳ୍ପ ସଂସ୍ଥା ଦ୍ବାରା ଚଳାଯାଉ ଛି। ସମସ୍ତ ଆମ୍ବୁଲାନ୍ସରେ ‘ଜିପିଏସ୍‌ ଟ୍ରାକିଂ’ ମେସିନ୍ ଲଗାଇବା ସହ ଗୋଟିଏ ଅନ୍‌ଲାଇନ୍ ମନିଟରିଂ ବ୍ୟବସ୍ଥା ଅନ୍ତର୍ଭୁକ୍ତ କରାଯିବ । ଫଳରେ ଦୁର୍ଘଟଣା ଘଟିବା‌ ସମୟରେ ତୁରନ୍ତ ଆମ୍ବୁଲାନ୍ସ ମିଳିବାରେ ଏହା ସହାୟକ ହୋଇପାରିବ ।

ଗୋଟିଏ ଆମ୍ବୁଲାନ୍ସ ପଞ୍ଜୀକରଣ ପାଇଁ ‘ନ୍ୟାସ୍‌ନାଲ୍‌ ଆମ୍ବୁଲାନ୍ସ କୋଡ୍‌’ ଭିତ୍ତିରେ ବୈଷୟିକ ଓ ମାନବ ସମ୍ବଳ ମାନକ ନିର୍ଦ୍ଧାରଣ ନିମନ୍ତେ ନିଷ୍ପତ୍ତି ନିଆଯାଇଥିଲା । ଆମ୍ବୁଲାନ୍ସରେ ରହିବାକୁ ଥିବା ଜୀବନରକ୍ଷାକାରୀ ଯନ୍ତ୍ରପାତି, ଔଷଧ, ପାରା ମେଡିକାଲ୍‌ କର୍ମଚାରୀଙ୍କ ସମ୍ପର୍କରେ ନିର୍ଦ୍ଦିଷ୍ଟ ମାନକ ରହିବ । ଦୁର୍ଘଟଣାଗ୍ରସ୍ତ ଲୋକଙ୍କୁ ‘ଟ୍ରମା କେୟାର’ କେନ୍ଦ୍ରକୁ ନେବା ବେଳେ ଆମ୍ବୁଲାନ୍ସ ଭିତରେ ଆବଶ୍ୟକ ସେବା ଯୋଗାଇ ଦେବାକୁ କର୍ମଚାରୀମାନେ ପ୍ରଶିକ୍ଷିତ ହେବେ । ନିର୍ଦ୍ଧାରିତ ମାନକ ପୂରଣ କରୁଥିବା ଆମ୍ବୁଲାନ୍ସଗୁଡ଼ିକୁ ହିଁ ବାଣିଜ୍ୟ ଓ ପରିବହନ ବିଭାଗ ପଞ୍ଜୀକୃତ କରି ସ୍ବୀକୃତି ଦେବେ ।

ଦୁର୍ଘଟଣାଗ୍ରସ୍ତ ବ୍ୟକ୍ତିଙ୍କ ଜୀବନ ରକ୍ଷା ନିମନ୍ତେ ପ୍ରଥମ ୪୮ ଘଣ୍ଟା ସବୁଠାରୁ ଗୁରୁତ୍ବପୂର୍ଣ୍ଣ ସମୟ(ଗୋଲ୍‌ଡେନ୍ ଆୱାର୍)। ‌େତଣୁ ଏହି ସମୟକୁ ଠିକ୍ ଭାବେ ପରିଚାଳନା କରିବା ଉପରେ ମୁଖ୍ୟ ଶାସନ ସଚିବ ଗୁରୁତ୍ବାରୋପ କରିଥିଲେ । ଏହି ସମୟରେ ସମସ୍ତ ସରକାରୀ ଓ ବେସରକାରୀ ହସ୍ପିଟାଲ୍‌ ବିନା ମୂଲ୍ୟରେ ଉଚ୍ଚମାନର ଚିକିତ୍ସା ଯୋଗାଇ ଦେବା ପାଇଁ ଥିବା ସରକାରୀ ନିୟମକୁ କଡ଼ାକଡ଼ି ପାଳନ କରିବା ପାଇଁ ମୁଖ୍ୟ ଶାସନ ସଚିବନିର୍ଦ୍ଦେଶ ଦେଇଥିଲେ । ଏଥି ପାଇଁ ସାଧାରଣ କାର୍ୟ୍ୟାନ୍ବୟନ ପଦ୍ଧତ୍ତି(ଏସ୍‌ଓପି) ପ୍ରସ୍ତୁତ କରି ତୁରନ୍ତ ହସ୍ପିଟାଲ୍‌ଗୁଡ଼ିକୁ ଅବଗତ କରାଇବାକୁ ସେ ସ୍ବାସ୍ଥ୍ୟ ବିଭାଗକୁ ନିର୍ଦ୍ଦେଶ ଦେଇଥିଲେ ।

Comments are closed.