କନକ ବ୍ୟୁରୋ: ଶାନ୍ତି ପାଇଁ ଶୁଭର ନାଁ । ଶାନ୍ତି ପୁରସ୍କାର ପାଇଁ ଶୁଭସ୍ମିତାର ନାଁ । ଆନ୍ତର୍ଜାତୀୟ ଶିଶୁ ଶାନ୍ତି ପୁରସ୍କାର ପାଇଁ ମନୋନୀତ ହୋଇଛନ୍ତି ଓଡିଶାର ଝିଅ ଶୁଭସ୍ମିତା ତ୍ରିପାଠୀ । ଆଉ ପୁରସ୍କାର ପାଇଁ ମନୋନୀତ ହେବା ପରେ ଏବେ କେନ୍ଦ୍ରାପଡାର କୁନି ଝିଅ ଶୁଭସ୍ମିତାକୁ ନେଇ ସାରା ବିଶ୍ୱରେ ଚର୍ଚ୍ଚା ।
Kanak News is now on WhatsApp
Join and get latest news updates delivered to you via WhatsApp
ରାଜନଗର ବ୍ଲକ ପେଣ୍ଠ ଗାଁର ୧୩ ବର୍ଷ ବୟସର ଶୁଭସ୍ମିତା ପିଲାବେଳୁ ପାଠରେ ଯେମିତି ସାଠରେ ବି ସେମିତି । ଅଷ୍ଟମ ଶ୍ରେଣୀରେ ପଢୁଥିବା ଶୁଭ ସ୍କୁଲରେ ଭଲ ପଢୁଥିଲେ ବି ତାର କୌଣସି ସାଙ୍ଗ ନଥିଲେ । ଅଭାବ, ଅନଟନ ପାଇଁ ଗାଁର ଅନେକ ସାଙ୍ଗ ପାଠ ପଢାରେ ଡୋରୀ ବାନ୍ଧିଥିଲେ । ଆଉ ସ୍କୁଲ ନଯାଇ ବିଲବାଡିରେ କାମ କରୁଥିଲେ, ଛେଳିମେଣ୍ଢା ଚରାଇ ଦିନ ବିତାଉ ଥିଲେ । ଯାହା ଶୁଭସ୍ମିତାକୁ ବ୍ୟଥିତ କରିଥିଲା ଆଉ ସେ ସେମାନଙ୍କୁ ପୁଣି ସ୍କୁଲକୁ ଫେରାଇ ଆଣିବାକୁ ସଙ୍କଳ୍ପ ନେଇଥିଲା ।
ପାଠ ପଢା ଛାଡିଦେଇଥିବା ପିଲାଙ୍କୁ ଓ ତାଙ୍କ ବାପାମାଆଙ୍କୁ ଶିକ୍ଷାର ଆବଶ୍ୟକତା ସଂମ୍ପର୍କରେ ଅବଗତ କରିଥିଲା ଶୁଭ । ଜୀବନରେ ଶିକ୍ଷାର ଆବଶ୍ୟକତା ସମ୍ପର୍କରେ ଅଭିଭାବକଙ୍କୁ ବୁଝାଇ ଅନେକ ପିଲାଙ୍କୁ ପୁଣି ସ୍କୁଲକୁ ଫେରାଇ ଆଣିବାରେ ସଫଳ ହୋଇଛି ଶୁଭ । ଯେଉଁଥିପାଇଁ ତାକୁ ଶାନ୍ତି ପୁରସ୍କାର ପାଇଁ ମନୋନୀତ କରାଯାଇଛି । ଖାଲି ଶିକ୍ଷା କ୍ଷେତ୍ରରେ ନୁହେଁ ବରଂ ପରିବେଶ ସୁରକ୍ଷା ଓ ସ୍ୱଚ୍ଛତା ପାଇଁ ସାରା ପେଣ୍ଠରେ ଏବେ ଚର୍ଚ୍ଚାରେ ଶୁଭସ୍ମିତା । ସାଙ୍ଗସାଥିଙ୍କ ସହ ବିଦ୍ୟାଳୟ ଓ ଗାଁ ପରିବେଶ ସଫା କରୁଥିବାରୁ ଶୁଭକୁ ସମସ୍ତେ ପ୍ରଶଂସା କରିବା ସହ ତାକୁ ଶୁଭେଚ୍ଛା ଜଣାଉଛନ୍ତି ।
ତେବେ ନେଦରଲ୍ୟାଣ୍ଡ ସ୍ଥିତି ଆନ୍ତର୍ଜାତୀୟ ଶିଶୁ ଅଧିକାର ସଂସ୍ଥା ‘କିଡସ ରାଇଟ୍ସ’ ପକ୍ଷରୁ ଏହି ପୁରସ୍କାର ଦିଆଯିବ । ଯେଉଁଥିରେ ୫୬ଟି ଦେଶର ୧୩୭ ଜଣ କୁନି ପ୍ରତିଭାଙ୍କ ନାଁ ଚୟନ କରାଯାଇଛି । ଧୂଳିଖେଳ ବୟସରେ ସମାଜର ଅଶିକ୍ଷାର ଅନ୍ଧାରକୁ ଦୂର କରି ଶିକ୍ଷାର ଆଲୁଅ ଆଡକୁ ଆସିବାକୁ ଆହ୍ୱାନ ଦେଉଥିବା କଅଁଳ କଢିଙ୍କ ଏଭଳି ପ୍ରୟାସ ପାଇଁ ସେମାନଙ୍କୁ ଏହି ପୁରସ୍କାର ଦିଆଯାଏ । ଆଉ ତା ଭିତରେ ତୁଳସୀକ୍ଷେତ୍ର କେନ୍ଦ୍ରାପଡାର କୁନି ଶୁଭର ନାଁ ରହିଛି । ତେବେ ଆସନ୍ତା ୩୦ରେ ଘୋଷଣା ହେବାକୁ ଥିବା ଆନ୍ତର୍ଜାତୀୟ ଶିଶୁ ଶାନ୍ତି ପୁରସ୍କାର ବିତରଣ ଉତ୍ସବରେ ଶୁଭଙ୍କ ନାଁ ଘୋଷଣା ହେଉ ଏହାହିଁ କାମନା ।