ମେଘାଳୟରେ ୩୭୦ ଫୁଟ୍ ତଳେ କୋଇଲା ଖଣିରେ ୧୫ ଦିନ ହେଲା ଫସିରହିଛନ୍ତି ଶ୍ରମିକ ! ଉଦ୍ଧାର ପାଇଁ ସହାୟତାର ହାତ ବଢାଇଲା ଓଡିଶା ।
କନକ ବ୍ୟୁରୋ : ମେଘାଳୟରେ କୋଇଲାଖଣି ଭିତରେ ଫଶି ଯାଇଥିବା ୧୫ଜଣ ଶ୍ରମିକଙ୍କ ଉଦ୍ଧାର କାର୍ଯ୍ୟରେ ସହଯୋଗର ହାତ ବଢେଇଛି ଓଡିଶା । ଆଜି ଓଡିଶା ଅଗ୍ନିଶମ ବାହିନୀର ବଛା ବଛା ୨୦ଜଣ ଯବାନ ଉଦ୍ଧାରକାର୍ଯ୍ୟରେ ସାମିଲ ହେବା ପାଇଁ ମେଘାଳୟ ଯାଇଛନ୍ତି । ବାୟୁସେନାର ସ୍ୱତନ୍ତ୍ର ବିମାନ ଯୋଗେ ମେଘାଳୟରେ ପହଁଚି ଆଧୁନିକ ଯନ୍ତ୍ରପାତି ସହ ଉଦ୍ଧାରକାର୍ଯ୍ୟରେ ସାମିଲ ହୋଇଛନ୍ତି ଓଡିଶା ଅଗ୍ନିଶମ ବାହିନୀର କର୍ମଚାରୀ ।
Kanak News is now on WhatsApp
Join and get latest news updates delivered to you via WhatsApp
ହିନ୍ଦି ଚଳଚ୍ଚିତ୍ର କାଲାପଥରର ଦୃଶ୍ୟ ଠାରୁ କିଛି କମ ନଥିଲା ମେଘାଳୟ କୋଇଲା ଖଣିରେ ଘଟିଥିବା ଅଘଟଣର ଚିତ୍ର । କୋଇଲାଖଣି ଭିତରକୁ ମାଡି ଆସିଥିଲା ପାଣିର ସ୍ରୋତ । ମେଘାଳୟର ଜୟନ୍ତିଆ ପାହାଡ । ତାରିଖ-୧୩ ଡିସେମ୍ବର ୨୦୧୮ । ବେଆଇନ କୋଇଲା ଖନନ ଚାଲିଥିବା ବେଳେ ହଠାତ ସୁଡଙ୍ଗ ଭିତରକୁ ମାଡି ଆସିଥିଲା ୭୦ ଫୁଟର ପାଣି । ୩୭୦ଫୁଟ ତଳେ ଫଶିଯାଇଥିଲେ ୧୫ଜଣ ଶ୍ରମିକ । ଖଣି ଭିତରେ ଫଶି ରହିଥିବା ଶ୍ରମିକଙ୍କୁ ଉଦ୍ଧାର କରିବା ପାଇଁ ଏନଡିଆରଏଫ, ମେଘାଳୟ ଉଦ୍ଧାରକାରୀ ଟିମ ସହ କୋଲ ଇଣ୍ଡିଆର ଟିମ ଉଦ୍ୟମ କରୁଛନ୍ତି । କିନ୍ତୁ ଖଣି ଭିତରେ ପାଣି ଜମି ରହିଥିବାରୁ ଅଘଟଣର ଦୁଇ ସପ୍ତାହ ପରେ ବି ଉଦ୍ଧାରକାର୍ଯ୍ୟ ସମ୍ଭବ ହୋଇ ନାହିଁ । ଏଭଳି ସ୍ଥିତିରେ ମେଘାଳୟକୁ ସହଯୋଗର ହାତ ବଢାଇଛି ଓଡିଶା ।
ମେଘାଳୟର କୋଇଲାଖଣିରେ ଫଶି ରହିଥିବା ଶ୍ରମିକଙ୍କ ଉଦ୍ଧାରକାର୍ଯ୍ୟରେ ସାମିଲ ହୋଇଛି ଓଡିଶା ଅଗ୍ନିଶମ ବାହିନୀର ବଛା ବଛା ୨୦ଜଣ ଯବାନ । ଆଧୁନିକ ଯନ୍ତ୍ରପାତି ସହ ସେମାନେ ମେଘାଳୟରେ ପହଁଚିଛନ୍ତି । ଆଜି ସକାଳୁ ଓଡିଶାର ଉଦ୍ଧାରକାରୀ ଟିମ ବାୟୁସେନାର ସ୍ୱତନ୍ତ୍ର ବିମାନ ଯୋଗେ ଯାଇ ମେଘାଳୟରେ ପହଁଚିଛନ୍ତି । ସବୁଠାରୁ ବଡ କଥା ହେଉଛି ଓଡିଶାରୁ ଯାଇଥିବା ଏହି ଉଦ୍ଧାରକାରୀ ଟିମଙ୍କ ପାଖରେ ରହିଛି ସ୍ୱତନ୍ତ୍ର ପାୱା ମୋଟର । ଯାହାକି ଖଣି ଭିତରୁ ପାଣି ନିଷ୍କାସନ କରିବାରେ ପ୍ରମୁଖ ଭୂମିକା ଗ୍ରହଣ କରିବ । ଓଡିଶାରୁ ଯାଇଥିବା ଏହି ୨୦ଜଣ ଯବାନ ଉଦ୍ଧାର ପାଇଁ ସ୍ୱତନ୍ତ୍ର ପ୍ରଶିକ୍ଷଣ ପାଇଥିବାରୁ ଉଦ୍ଧାରକାର୍ଯ୍ୟ ଆହୁରୀ ଗତିଶୀଳ ହେବ ବୋଲି ଆଶା କରାଯାଉଛି ।