ବିଜେପି ବିଧାୟକଙ୍କ ବିବାଦୀୟ ବୟାନ: ବିଷ୍ଣୁ ସେଠୀ କହିଲେ, ଛାଡ଼ପତ୍ର ପରେ ମୁମ୍ବାଇ ଓ କୋଲକାତାରେ ଦେହ ବ୍ୟବସାୟ କରନ୍ତି ମୁସଲିମ୍ ମହିଳା
ନେତାଙ୍କ ବୟାନକୁ ନେଇ ବିଧାନସଭାରେ ଝଡ଼; କଂଗ୍ରେସ ଦାବି କଲା, କ୍ଷମା ମାଗନ୍ତୁ ବିଷ୍ଣୁ
କନକ ବ୍ୟୁରୋ: ବିଜେପି ବିଧାୟକ ତଥା ବିରୋଧ ଦଳ ଉପନେତା ବିଷ୍ଣୁ ସେଠୀଙ୍କ ବୟାନକୁ ନେଇ ଆଜି ବିଧାନସଭାରେ ଝଡ ଉଠିଛି । ତିନି ତଲାକ୍ ବିଲକୁ କଂଗ୍ରେସ ବିରୋଧ କରିବା ପ୍ରସଙ୍ଗରେ ଗୃହରେ ଜବାବ ରଖୁଥିଲେ ବିଷ୍ଣୁ ସେଠୀ । ଆଉ କହିଲେ, ମୁସଲିମ୍ ପରିବାରରେ ଛାଡପତ୍ର ଯୋଗୁଁ ସ୍ତ୍ରୀ ଲୋକମାନେ ରେଡ୍ ଲାଇଟ୍ ଏରିଆରେ ବେଶ୍ୟାବୃତି କରୁଛନ୍ତି । ଏହି ବୟାନକୁ ନେଇ ବିଧାନସଭାରେ ହଙ୍ଗାମା ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସ ଏହାକୁ ଜୋରଦାର ବିରୋଧ କରି କ୍ଷମାପ୍ରାର୍ଥନା ଦାବି କରିଥିଲା ଏବଂ କଂଗ୍ରେସ ସଦସ୍ୟଙ୍କ ସହ ସ୍ୱର ମିଳାଇଥିଲେ ବିଜେଡି ବିଧାୟକ । ଏହାକୁ ନେଇ ଆଜି ଦିନତମାମ ଗୃହ ସୁରୁଖୁରୁରେ ଚାଲିପାରିନଥିଲା । ଏହାପରେ ଗୃହ ବାହାରେ ଆସି ଗଣମାଧ୍ୟମକୁ କହିଥିଲେ, ସେ କୌଣସି ସମ୍ପ୍ରଦାୟକୁ ଆକ୍ଷେପ କରିନିଥିଲେ, ବିଭିନ୍ନ ରିପୋର୍ଟକୁ ଆଧାର କରି ମତ ରଖିଥିଲେ । ତେବେ ବିଧାନସଭାରେ ବିରୋଧୀ ଦଳ ଉପନେତାଙ୍କ ଏଭଳି ବୟାନ, ବଡ ଧରଣର ବିବାଦ ସୃଷ୍ଟି କରିଛି । ତିନି ତଲାକ ଓ କେନ୍ଦ୍ର ସରକାରଙ୍କ ଆଭିମୁଖ୍ୟ ନେଇ ବିଧାୟକ ବିଷ୍ଣୁ ସେଠୀ, ମୁସଲିମ୍ ମହିଳାଙ୍କ ଯେଉଁ ଉଦାହରଣ ରଖିଛନ୍ତି, ତାକୁ ନେଇ ଗୃହରେ ପ୍ରବଳ ପ୍ରତିକ୍ରିୟା ପ୍ରକାଶ ପାଇଛି । ହେଲେ, ଟିଭି, ରେଡିଓ ଓ ମାଗାଜିନର ଉଦାହରଣ ଦେଇ ନିଜ ଯୁକ୍ତି ରଖିଛନ୍ତି ବିଜେପି ବିଧାୟକ ।
ତିନି ଦିନ ତଳେ ରାଜ୍ୟସଭାରେ ପାରିତ ହୋଇଥିଲା ତିନି ତଲାକ୍ ବିଲ୍ । ରାଜ୍ୟସଭାରେ ଏହି ବିଲକୁ ବିଜେଡି ସମର୍ଥନ ଜଣାଇଥିଲା । ବିଜେପି-ବିଜେଡି ମଧ୍ୟରେ ସମର୍ଥନ ସମ୍ପର୍କ ନେଇ ବାରମ୍ବାର ପ୍ରଶ୍ନ ଉଠାଉଛି କଂଗ୍ରେସ । ଏହି ପ୍ରସଙ୍ଗରେ ସ୍ପଷ୍ଟୀକରଣ ରଖିବାକୁ ଯାଇ ଗୃହରେ ନିଜ ମତ ରଖିଥିଲେ ବିରୋଧୀ ଦଳ ଉପନେତା । ତେବେ ବିଜେପି ବିଧାୟକଙ୍କ ବିବାଦୀୟ ବୟାନକୁ ନେଇ ବାରମ୍ବାର ହଟ୍ଟୋଗଳ ପାଇଁ ବାରମ୍ବାର ଗୃହ ମୁଲତବୀ ରହିଥିଲା ।