ମହାରଥୀଙ୍କ ସମ୍ବିଧାନ ଜ୍ଞାନ ! ବିଧାନସଭାରେ ସମ୍ବିଧାନର ଧାରା ଭୁଲ କହି ହଟହଟା ହେଲେ ମନ୍ତ୍ରୀ ପ୍ରଦୀପ ମହାରଥୀ
କନକ ବ୍ୟୁରୋ : ସମ୍ବିଧାନର ଧାରାକୁ ଭୁଲ ଭାବରେ ବଖାଣି ଆଜି ବିଧାନସଭାରେ ହଟହଟା ହୋଇଛନ୍ତି ପଂଚାୟତିରାଜ ମନ୍ତ୍ରୀ ପ୍ରଦୀପ ମହାରଥୀ । ଆଦିବାସୀ ଓ ଗ୍ରାମସଭା ସମ୍ପର୍କୀତ ଏକ ପ୍ରଶ୍ନର ଉତରରେ ମନ୍ତ୍ରୀ ମହାରଥୀ ଯେଉଁ ଆଇନ ଓ ବିଧି ବ୍ୟବସ୍ଥାର କଥା କହିଲେ ସେଭଳି କିଛି ଆଇନ୍ ଭାରତୀୟ ସମ୍ବିଧାନରେ ହିଁ ନାହିଁ । ଯାହାକୁ ନେଇ ପ୍ରଶ୍ନ ପଚାରିଥିବା କଂଗ୍ରେସ ବିଧାୟକ ପ୍ରଫୁଲ୍ଲ ମାଝୀ ଓ ପଂଚାୟତିରାଜ ମନ୍ତ୍ରୀ ପ୍ରଦୀପ ମହାରଥୀ ମୁହାଁମୁହିଁ ହୋଇଥିଲେ ।
Kanak News is now on WhatsApp
Join and get latest news updates delivered to you via WhatsApp
ଆଦିବାସୀ ଅଧୁଷିତ ଅଂଚଳରେ ଗ୍ରାମସଭାର ନିୟମରେ ସଂଶୋଧନକୁ ନେଇ ପ୍ରଦୀପ ମହାରଥୀ କହୁଛନ୍ତି ସମ୍ବିଧାନର ଧାରା ୪୦ ଦଶମିକ ୨୪୩ରେ ଏନେଇ ବ୍ୟବସ୍ଥା ରହିଛି । ବାସ୍ ମହାରଥୀଙ୍କ ଏପଦେ କଥା ମନ୍ତ୍ରୀଙ୍କୁ ଘେରିବାକୁ ବିଧାନସଭାରେ ବିରୋଧୀଙ୍କୁ ଏକ ବଡ ସୁଯୋଗ ଦେଇଦେଲା । କାରଣ ସମ୍ବିଧାନର ୪୦ ଦଶମିକ ୨୪୩ ବୋଲି କୌଣସି ଧାରା ନାହିଁ ।
ତେବେ ଏତିକିରେ କଥା ସରି ନଥିଲା । ମନ୍ତ୍ରୀ ସମ୍ପୂର୍ଣ୍ଣ ପ୍ରସ୍ତୁତ ହୋଇ ଗୃହରେ ଠିକ ଉତ୍ତର ରଖିବାକୁ ଦାବି କରିଥିଲେ କଂଗ୍ରେସ ବିଧାୟକ । ସ୍ଥିତି ଏମିତି ହୋଇଥିଲା ଯେ ମନ୍ତ୍ରୀ ପ୍ରଦୀପ ମହାରଥୀ ଓ କଂଗ୍ରେସ ସଭ୍ୟ ପ୍ରଫୁଲ୍ଲ ମାଝିଙ୍କୁ ଶାନ୍ତ କରିବାକୁ ବାଚସ୍ପତିଙ୍କୁ ହସ୍ତକ୍ଷେପ କରିବାକୁ ପଡିଥିଲା ।
ଆଜିଗୃହରେ ମହାରଥୀଙ୍କ ପାଇଁ ସମସ୍ୟା ଏତିକିରେ ସରିନଥିଲା । ଆଦିବାସୀ ଅଂଚଳ ବିଜେପି ବିଧାୟକଙ୍କ ବେଶପୋଷାକକୁ ନେଇ କମେଂଟ କରିଥିଲେ ମହାରଥୀ । ଆଉ ଏହାପରେ ମନ୍ତ୍ରୀ ଠିକ ଭାବେ ଉତ୍ତର ରଖୁନଥିବା ଅଭିଯୋଗରେ ବିରୋଧୀ ସଭ୍ୟମାନେ ଜୋରଦାର ହଙ୍ଗାମା କରିଥିଲେ ।ଯେଉଁଥିପାଇଁ ଅଧାରୁ ପ୍ରଶ୍ନକାଳ ବନ୍ଦ ହୋଇଯାଇଥିଲା ।ଆଉ ବାଚସ୍ପତି ୧୨ଟା ପାଇଁ ବିଧାନସଭା କାର୍ଯ୍ୟକାଳକୁ ମୁଲତବୀ ଘୋଷଣା କରିଥିଲେ ।