କଙ୍ଗାରୁ ପରେ ହେବ କି କିୱି ଶିକାର ? ଅକଲାଣ୍ଡର ଇଡେନ ପାର୍କରେ ହେବ ଭାରତ-ନ୍ୟୁଜିଲାଣ୍ଡ ଟି-୨୦ ଟକ୍କର, ବିଶ୍ୱକପ୍ ପ୍ରତିଶୋଧ ନେବାକୁ ବିରାଟ ବାହିନୀର ରଣନୀତି ।
କନକ ବ୍ୟୁରୋ: କଙ୍ଗାରୁ ପରେ କିୱି ଦଳର ଶିକାର କରିବାକୁ ପ୍ରସ୍ତୁତ ବିରାଟ ବାହିନୀ । ଆଜି ଠାରୁ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ଟି-୨୦ ସିରିଜ୍ ଲଢ଼େଇ । ୫ଟି ମ୍ୟାଚ୍ ବିଶିଷ୍ଟ ଟି-୨୦ ସିରିଜର ପ୍ରଥମ ମ୍ୟାଚ୍ ଆଜି ଅକଲାଣ୍ଡର ଇଡେନ ପାର୍କରେ ଖେଳାଯିବ । ତେବେ ଘରୋଇ ମାଟିରେ କ୍ରମାଗତ ସିରିଜ୍ ଜିତିବା ପରେ ବିରାଟ ବାହିନୀ ନ୍ୟୁଜିଲାଣ୍ଡରେ ପହଂଚିଛି ।
Kanak News is now on WhatsApp
Join and get latest news updates delivered to you via WhatsApp
ସବୁଠାରୁ ବଡ଼ କଥା ହେଲା କି, ଗତବର୍ଷ ବିଶ୍ୱକପ୍ ସେମିଫାଇନାଲରେ ନ୍ୟୁଜିଲାଣ୍ଡ ଠାରୁ ହାରି ବିଶ୍ୱକପରୁ ବିଦାୟ ନେଇଥିଲା ଟିମ୍ ଇଣ୍ଡିଆ । ତେଣୁ ଏହି ଗସ୍ତବେଳେ ସିରିଜ୍ ଜିତି ପ୍ରତିଶୋଧ ନେବାକୁ ଚେଷ୍ଟା କରି ଭାରତୀୟ ଦଳ । ତେବେ ନ୍ୟୁଜିଲାଣ୍ଡକୁ ନିଜ ମାଟିରେ ହରାଇବା କୋହଲି ବାହିନୀ ପାଇଁ କଷ୍ଟକର ହେବ । ଟି-୨୦ ବିଶ୍ୱକପ୍ ପାଇଁ ଟିମ୍ ଇଣ୍ଡିଆ ଜୋରଦାର ପ୍ରସ୍ତୁତି ଚଳାଇଛି । ତେଣୁ ଏହି ୫ଟିକିଆ ସିରିଜ୍ ଉପରେ ନଜର ଅଟକିଛି ।
ତେବେ ଟି-୨୦ ସିରିଜ୍ ସରିବା ପରେ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ ଖେଳାଯିବ । ଏହାସହ ଉଭୟ ଦେଶ ୨ଟି ଟେଷ୍ଟ ମ୍ୟାଚ୍ ମଧ୍ୟ ଖେଳିବେ । ଚଳିତ ବର୍ଷର ଫର୍ମ ଏବଂ ବିଜୟ ଧାରାରେ ଅବଶ୍ୟ ଭାରତୀୟ ଟିମ୍ ନ୍ୟୁଜିଲାଣ୍ଡଠାରୁ ଢେର ଆଗରେ ରହିଛି । ଭାରତ ଏହି ଶୃଙ୍ଖଳା ଶିଖର ଧାୱନ, ହାର୍ଦିକ ପାଣ୍ଡ୍ୟା, ଭୁବନେଶ୍ୱର କୁମାର ଓ ଦୀପକ ଚହରଙ୍କ ଭଳି ଖେଳାଳିଙ୍କ ବିନା ଖେଳିବ । ସେପଟେ ନ୍ୟୁଜିଲାଣ୍ଡର ଯୁବ ତାରକା ହାମିସ ବେନେଟ୍ ଶୁକ୍ରବାର ନିଜ ଟି-୨୦ ଡେବ୍ୟୁ କରିପାରନ୍ତି । ଭାରତ ଭଳି ନ୍ୟୁଜିଲାଣ୍ଡ ମଧ୍ୟ ଆଘାତ ଜନିତ ସମସ୍ୟା ଦେଇ ଗତିକରୁଛି । ତେବେ ଭ୍ରମଣକାରୀ ଦଳଭାବେ ସିରିଜର ପ୍ରଥମ ମ୍ୟାଚ୍ ଜିତିବାକୁ କ’ଣ ରଣନୀତି ଆପଣାଉଛି ଭାରତୀୟ ଟିମ୍ ତାହା ଉପରେ ନଜର ।