ବୈଜୟନ୍ତଙ୍କୁ ଡାକିଲା ପୁଲିସ ! ଚିଲିକା ଉପରେ ବେଆଇନ ହେଲିକପ୍ଟର ଉଡାଣକୁ ନେଇ ନୋଟିସ, ବ୍ଲାକ୍ ବକ୍ସରୁ ଜଣାପଡ଼ିବ କେତେ ଉଚ୍ଚରେ ଉଡିଥିଲା ହେଲିକପ୍ଟର ।
କନକ ବ୍ୟୁରୋ : ପୂର୍ବତନ ସାଂସଦ ବୈଜୟନ୍ତ ପଣ୍ଡାଙ୍କୁ ଡାକିଲା ପୋଲିସ । ଚିଲିକା ଉପରେ ବେଆଇନ ଭାବେ ହେଲିକପ୍ଟର ଉଡାଇବା ମାମଲାରେ ପୂର୍ବତନ ସାଂସଦଙ୍କ ସହ ୨ ଯାତ୍ରୀଙ୍କୁ ମଧ୍ୟ ନୋଟିସ କରିଛି ପୁରୀ ପୋଲିସ । ସିଡିଏ ଅଭିଯୋଗ ଆଧାରରେ ପୋଲିସ ଡିଜିସିଏ ଠାରୁ ତଥ୍ୟ ମାଗିଥିଲା ଏବଂ ୧୫ତାରିଖ ସକାଳ ସାଢେ ୮ଟାରୁ ସାଢେ ଗୋଟାଏ ମଧ୍ୟରେ କେବଳ ବୈଜୟନ୍ତଙ୍କ ହେଲିକପ୍ଟରକୁ ଅନୁମତି ମିଳିଥିବା ଜଣାପଡିଥିଲା । ସେହି ଆଧାରରେ ଇମ୍ଫାର ହେଙ୍ଗର ବା ବିମାନ ପାର୍କିଂ ଏରିଆକୁ ସିଲ୍ କରାଯାଇଛି । ଚିଲିକାର କେତେ ଉଚ୍ଚରେ ହେଲିକପ୍ଟରଟି ଉଡୁଥିଲା ତାହା ବିମାନର ବ୍ଲାକ୍ ବକ୍ସରୁ ଜଣାପଡିବ । ତେଣୁ ଏନେଇ ଡିଜିସିଏ ଠାରୁ ତଥ୍ୟ ମଗାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଚିଲିକାର ଖୁବ କମ୍ ଉଚ୍ଚତାରେ ଚପର ବା ହେଲିକପ୍ଟର ଉଡିବା ନେଇ ଚିଲିକା ଉନ୍ନୟନ କର୍ତୃପକ୍ଷ କରିଥିବା ଅଭିଯୋଗର ତଦନ୍ତ ଆରମ୍ଭ ହୋଇଛି । ଭୁବନେଶ୍ୱରସ୍ଥିତ ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନବନ୍ଦରର ନିର୍ଦ୍ଦେଶକ କହିଛନ୍ତି ଯେ, ହୋଇଥିବା ଅଭିଯୋଗର ତଦନ୍ତ କରୁଛନ୍ତି ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ । ପୂର୍ବତନ ସାଂସଦ ବୈଜୟନ୍ତ ପଣ୍ଡାଙ୍କ ହେଲିକପ୍ଟର ଚିଲିକାର ନୋ ଫ୍ଲାଇଙ୍ଗ ଇକୋ ସେନସିଟିଭ ଜୋନରେ ଉଡିବା ନେଇ ଯେଉଁ ଅଭିଯୋଗ ସାମ୍ନାକୁ ଆସିଥିଲା, ସେ ପ୍ରସଙ୍ଗରେ ସ୍ପଷ୍ଟ କରିଛନ୍ତି ବିମାନବନ୍ଦର ନିର୍ଦ୍ଦେଶକ । ସେ କହିଛନ୍ତି ବୈଜୟନ୍ତଙ୍କ ହେଲିକପ୍ଟର ଉଡାଣ ପାଇଁ ଅନୁମତି ନେଇ ସକାଳ ୮ଟା ୪୬ରୁ ବାହାରିଥିଲା ଓ ୧ଟା ୨୬ରେ ଫେରିଆସିଥିଲା । ଭୁବନେଶ୍ୱରରୁ ରାଜହଂସ, ପୁରୀ, କୋଣାର୍କ, ଗରଦପୁର, ଜଗନ୍ନାଥପୁର ଦେଇ ପୁଣି ଭୁବନେଶ୍ୱର ଫେରିଥିଲା ।
ସେପଟେ ସିଡିଏର ଏତଲା ଆଧାରରେ ପୋଲିସ ନିକଟରେ ହାଜର ହେବାଲାଗି ପୂର୍ବତନ ସାଂସଦ ବୈଜୟନ୍ତ ପଣ୍ଡା ଓ ତାଙ୍କ ସହଯାତ୍ରୀଙ୍କୁ ନୋଟିସ କରିଛି ପୁରୀ ପୋଲିସ । ଅନୁମତି ନଥାଇ ଚିଲିକାର ଅଳ୍ପ ଉଚ୍ଚତାରେ ଚୋପର ଉଡାଇବା ଅଭିଯୋଗରେ ହାଜର ହେବାକୁ ନୋଟିସ କରାଯାଇଛି । ସେପଟେ ଅଭିଯୋଗ ପାଇବା ପରେ ବିମାନବନ୍ଦର ପରିସରରେ ଥିବା ଇମ୍ଫାର ହ୍ୟାଙ୍ଗର ବା ପାର୍କିଂ ଅଂଚଳକୁ ସିଲ୍ କରିଛି ପୋଲିସ୍ । ବ୍ଲାକ ବକ୍ସରୁ ଉଡାଣ ସୂଚନା ପାଇଁ ଡିଜିସିଏକୁ ତଥ୍ୟ ମାଗିଛି ।
ଚିଲିକା ଉପରେ ବେଆଇନ ଭାବେ ହେଲିକପଟର ଉଡିବା ନେଇ ମେରାଇନ ଥାନାରେ ଅଭିଯୋଗ କରିଥିଲେ ଚିଲିକା ଉନ୍ନୟନ କର୍ତ୍ତୃପକ୍ଷ ଏସିଏଫ ବିନୋଦ ଆଚାର୍ଯ୍ୟ । ଏତଲାରେ କୁହାଯାଇଥିଲା, ଗତ ୧୫ ତାରିଖ ଅପରାହ୍ନ ସାଢେ ଗୋଟାଏ ସମୟରେ ଧଳା ରଙ୍ଗର ଏକ ହେଲିକପଟର ଚିଲିକା ଉପରେ ଉଡିଥିଲା । ବେଆଇନ ଭାବେ ପାଇଲଟ ହେଲିକପଟରକୁ ଚିଲିକାର ଇକୋ ସେନସିଟିଭ ଜୋନ ଉପରେ ଉଡାଇଥିଲେ, ତେଣୁ ଆଇନତଃ କାର୍ଯ୍ୟନୁଷ୍ଠାନ ଗ୍ରହଣ କରିବାକୁ ଏତଲାରେ କୁହାଯାଇଥିଲା ।
ସେପଟେ ଚିଲିକାରେ ବୈଜୟନ୍ତ ପଣ୍ଡାଙ୍କ ହେଲିକପ୍ଟର ଉଡିବା ପ୍ରସଙ୍ଗରେ ଆଉ ଏକ ମାମଲା ରୁଜୁ କରିଛି ପୋଲିସ । ଚିଲିକା ପରିବେଶ ଓ ପର୍ଯ୍ୟଟନ ମହାଂସଘର ଏତଲା ଆଧାରରେ ଏହି ମାମଲା ହୋଇଛି । ବନ୍ୟପ୍ରାଣୀ ସଂରକ୍ଷଣ ଆଇନ ଅନ୍ତର୍ଗତ ଭାରତୀୟ ପିଙ୍ଗଳ କୋର୍ଡର ଦଫା ୨୭୭, ୨୭୮, ୩୩୬. ୪୩୧ ଓ ଏୟାରକ୍ରାଫ୍ଟ ଆଇନ ୧୧ରେ ବୈଜୟନ୍ତ ପଣ୍ଡାଙ୍କ ବିରୋଧରେ ମାମଲା ରୁଜୁ ହୋଇଛି ।