ରାମ ମନ୍ଦିର ନିର୍ମାଣ ନହେଲେ ୨୦୧୯ରେ ସରକାରକୁ ଫେରି ପାରିବେନି ମୋଦି ! ଜାଣନ୍ତୁ କାହିଁକି ଏଭଳି କହିଲେ ସାଧୁସନ୍ଥ
୨୦୧୯ ସାଧାରଣ ନିର୍ବାଚନ ପୂର୍ବରୁ ପ୍ରୟାଗରାଜରେ ହେବାକୁ ଥିବା କୁମ୍ଭମେଳା ବେଶ ଗୁରୁତ୍ୱ ବହନ କରୁଛି । କୁମ୍ଭମେଳାରେ ସାମିଲ ହେବା ପାଇଁ ଅଧିକାଂଶ ସନ୍ଥ ଏବେଠୁ ପ୍ରୟାଗରାଜରେ ଡେରା ପକାଇ ସାରିଲେଣି । ତେବେ ଏହି ମେଳାରେ ସାମିଲ ହେବାକୁ ଆସିଥିବା ସନ୍ଥ ମାନେ ମୋଦି ସରକାର ଉପରେ ପ୍ରବଳ ବର୍ଷିଛନ୍ତି । ଓ ଚେତାବନୀ ଦେବା ସହ କହିଛନ୍ତି, ଯଦି ମନ୍ଦିର ନିର୍ମାଣ ନାହିଁ ତେବେ ୨୦୧୯ରେ ମୋଦି ମଧ୍ୟ କ୍ଷମତାକୁ ଫେରିପାରିବେନି ।
Kanak News is now on WhatsApp
Join and get latest news updates delivered to you via WhatsApp
ଏହି କୁମ୍ଭ ମେଳା ସମୟରେ ବିଶ୍ୱ ହିନ୍ଦୁ ପରିଷଦ ପ୍ରୟାଗରାଜରେ ଧର୍ମ ସଂସଦ ଡାକି ପାରନ୍ତି ବୋଲି ଚର୍ଚ୍ଚା ହେଉଛି । ତେବେ ଅଖିଳ ଭାରତୀୟ ଆଖଡା ପରିଷଦର ଅଧ୍ୟକ୍ଷ ମହନ୍ତ ନରେନ୍ଦ୍ର ଗିରି ମହାରାଜଙ୍କ କହିବା ଅନୁଯାୟୀ, ଧର୍ମ ସଂସଦ ଡାକିବା କୌଣସି ରାଜନୈତିକ ଦଳ କିମ୍ବା ବିଶ୍ୱ ହିନ୍ଦୁ ପରିଷଦର ନାହିଁ । ଧର୍ମ ସଂସଦ କେବଳ ଚାରି ପୀଠର ଶଙ୍କରାଚାର୍ଯ୍ୟ ଡାକିପାରିବେ ।
ନରେନ୍ଦ୍ର ଗିରି ମହାରାଜଙ୍କ କହିବା ଅନୁଯାୟୀ, ମୋଦି ଓ ବିଜେପିକୁ ବିକାଶ ନାଁରେ ଭୋଟ ମିଳିନାହିଁ । ଯଦି ବିକାଶ ନାଁରେ ଭୋଟ ମିଳିଥାନ୍ତା ତେବେ ଉତ୍ତରପ୍ରଦେଶର ମୁଖ୍ୟମନ୍ତ୍ରୀ ବୋଧହୁଏ ଆଉ କେହି ହୋଇଥାନ୍ତେ କିମ୍ବା ଅଖିଳେଶ ଯାଦବ ପୁଣିଥରେ ହୋଇଥାନ୍ତେ । ମୋଦି ସରକାରରେ ବିକାଶ ହେଉଛି । କିନ୍ତୁ ଲୋକ ରାମ ମନ୍ଦିର ନାଁରେ ହିଁ ଭୋଟ ଦେବେ । ଯଦି ରାମ ମନ୍ଦିର ନିର୍ମାଣ ନେଇ କୌଣସି ନିଷ୍ପତି ନ ନିଆଯାଏ ତେବେ ଆଗାମୀ ଦିନରେ ସରକାର ଗଢିବା କଷ୍ଟକର ହୋଇଯିବ । କାରଣ ଲୋକ ବହୁତ ଦିନ ହେଲା ଅପେକ୍ଷା କଲେଣି ।
ସେହିଭଳି ନିରଞ୍ଜନୀ ଆଖଡାର ପ୍ରମୁଖ ମହନ୍ତ କେଶବ ପୁରୀଙ୍କ କହିବା ଅନୁଯାୟୀ, ସାଧୁ ସନ୍ଥ ମାନେ ବିଜେପିକୁ ଏଥିପାଇଁ ସମର୍ଥନ ଦେଇଛନ୍ତି କାରଣ ରାମ ମନ୍ଦିର ନିର୍ମାଣ ସହ ଏକ ବଡ ସମସ୍ୟାର ସମାଧାନ ହେବ ବୋଲି ସମସ୍ତେ ଆଶାବାଦୀ ଥିଲେ । କିନ୍ତୁ ମୋଦି ସରକାରର ସାଢେ ୪ ବର୍ଷ ପରେ ସରକାର ରାମ ମନ୍ଦିର ନିର୍ମାଣ ନେଇ କୌଣସି ପଦକ୍ଷେପ ଉଠାଉନାହାନ୍ତି । ଏହାସହ ସେ କହିଛନ୍ତି, ଯଦି ରାମ ମନ୍ଦିର ନିର୍ମାଣ ହେବ ତେବେ ପୁଣିଥରେ ବିଜେପିକୁ ସରକାର ଗଢିବାକୁ ସୁଯୋଗ ମିଳିବ କିନ୍ତୁ ଯଦି ଏପରି ନ ହୁଏ ତେବେ ପୁଣିଥରେ ସରକାରକୁ ଫେରିବା ସ୍ୱପ୍ନରେ ରହିଯିବ । କାରଣ ଏଭଳି ହେଲେ ଲୋକଙ୍କର ବିଶ୍ୱାସ ଉଠିଯିବ ।
ଅଖିଳ ଭାରତୀୟ ଆଖଡା ପରିଷଦର ଅଧ୍ୟକ୍ଷଙ୍କ କହିବା ଅନୁଯାୟୀ, ହିନ୍ଦୁ ଧର୍ମଗୁରୁ ଓ ମୁସଲିମ ଧର୍ମଗୁରୁ ଏକାସାଥୀରେ ବସି ଆଲୋଚନା କଲେ ରାମ ମନ୍ଦିର ନିର୍ମାଣ ନେଇ ରାସ୍ତା ବାହାରିବ । କିନ୍ତୁ ସେମାନେ ଏକାସାଥୀରେ ଏଥିପାଇଁ ବସି ପାରୁନାହାନ୍ତି କାରଣ ରାଜନେତା ମାନେ ସେମାନଙ୍କୁ ବସିବାକୁ ସୁଯୋଗ ଦେଉନାହାନ୍ତି ।