ଆସିଲା ମାଛ ନମୂନାର ଯାଂଚ ରିପୋର୍ଟ: ମତ୍ସ୍ୟ ବିଭାଗ କହିଲା, ରାଜ୍ୟରେ ସୁରକ୍ଷିତ ମାଛ, ମଧୁର ମାଛରେ ଫର୍ମାଲିନ ମିଶିବାର ସମ୍ଭାବନା ନାହିଁ
କନକ ବ୍ୟୁରୋ: ମାଛରେ କୌଣସି ପ୍ରକାର ଫର୍ମାଲିନ ମିଶିନାହିଁ । ପରୀକ୍ଷାଗାରରେ ମାଛର ନମୂନା ପରୀକ୍ଷା ପରେ ଏନେଇ ସ୍ପଷ୍ଟ କରିଛନ୍ତି ମତ୍ସ ଓ ପଶୁସଂପଦ ବିଭାଗ । ମାଛରେ ଫର୍ମାଲିନ ମିଶିବା ନେଇ ଅଭିଯୋଗ ପରେ ମାଛର ନମୂନା ସଂଗ୍ରହ କରି ପରୀକ୍ଷାଗାରକୁ ପରୀକ୍ଷା ପାଇଁ ପଠାଯାଇଥିଲା । ପରୀକ୍ଷାରୁ କୌଣସି ମାଛରେ ଫର୍ମାଲିନ ମିଶିବାର ପ୍ରମାଣ ନାହିଁ ବୋଲି ରିପୋର୍ଟ ଆସିଛି । କେବଳ ଗୋଟିଏ ଚାନ୍ଦି ମାଛରେ ଫର୍ମାଲିନ ମିଶିଥିଲା ।
Kanak News is now on WhatsApp
Join and get latest news updates delivered to you via WhatsApp
ମାଛରେ ଫର୍ମାଲିନ ମିଶିବା ଅଭିଯୋଗ ପରେ ବିଭିନ୍ନ ଜାଗାରୁ ମାଛ ନମୂନା ସଂଗ୍ରହ କରି ଗବେଷଣା ସଂସ୍ଥା ସିଫରୀ,ବାରକୁପୁର ଓ କୋଚି ସ୍ଥିତ ପରୀକ୍ଷାଗାରକକୁ ପଠାଯାଇଥିଲା । ମାଛରେ କୌଣସି ଫର୍ମାଲିନ ମିଶି ନଥିବା ନେଇ ରିପୋର୍ଟ ଆସିଛି । ମଧୁର ମାଛରେ ଫର୍ମାଲିନ ମିଶବାର ସମ୍ଭାବନା ନାହିଁ । ଆଗକୁ ବଜାରକୁ ଯେପରି ଫର୍ମାଲିନ ମିଶା ମାଛ ନଆସେ ସେ ନେଇ ଯାଂଚ ପ୍ରକ୍ରିୟା ଜାରି ରହିବ ବୋଲି ମତ୍ସ ଓ ପଶୁ ସଂପଦ ବିଭାଗ କହିଛି ।ଏହା ବ୍ୟତୀତ ମାଛ ବ୍ୟବସାୟୀଙ୍କ ଭିତରେ ସଚେତନତା ସୃଷ୍ଟି କରିବା ପାଇଁ ବିଭାଗ ପକ୍ଷରୁ ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଉଛି ବୋଲି ବିଭାଗ ପକ୍ଷରୁ କୁହାଯାଇଛି ।
ମାଛରେ ଫର୍ମାଲିନ ମିଶିଥିବା ନେଇ ଅଭିଯୋଗ ଆସିବା ପରେ ଆଜି ରାଉରକେଲା, ବ୍ରହ୍ମପୁର ଓ କଟକରେ ବିଭିନ୍ନ ମାଛ ଦୋକାନ ଉପରେ ଚଢଉ ହୋଇଛି । ରାଉରକେଲା, ବ୍ରହ୍ମପୁରରେ ଏବଂ କଟକରେ ମତ୍ସ୍ୟ ବିଭାଗ ପକ୍ଷରୁ ଏହି ଚଢଉ ହୋଇଛି । ଚଢଉ ସମୟରେ କେତେକ ମାଛକୁ ଜବତ କରାଯାଇଛି । ସେଥିରେ ଫର୍ମାଲିନ ମିଶିଛି କି ନାହିଁ ସେ ନେଇ ପରୀକ୍ଷା ନିରିକ୍ଷା କରାଯାଉଛି । ଆନ୍ଧ୍ର ମାଛରେ ଫର୍ମାଲିନ ମିଶିଥିବା ନେଇ ଅଭିଯୋଗ ଆସିବା ପରେ ରାଜ୍ୟ ସରକାର ସତର୍କତାମୂଳକ ପଦକ୍ଷେପ ସ୍ୱରୁପ ମାଛ ବ୍ୟବସାୟୀଙ୍କ ଉପରେ କଡା ନଜର ରଖିବା ପାଇଁ ନିର୍ଦ୍ଦେଶ ଦେଇଥିଲେ । ପ୍ରତି ଜିଲ୍ଲାରେ ଏକ ଟିମ୍ ଗଠନ କରକି ଯାଂଚ କରିବାକୁ ନିର୍ଦ୍ଦେଶ ଦେଇଥିଲେ ।