କନକ ବ୍ୟୁରୋ : ନବୀନ ସରକାରଙ୍କ ସ୍ୱାସ୍ଥ୍ୟ ପରାମର୍ଶଦାତା ଡାକ୍ତର ଶ୍ରୀନାଥ ରେଡ୍ଡି ଓ ଡକ୍ଟର ଅଚ୍ୟୁତ ସାମନ୍ତଙ୍କ ଦ୍ୱାରା ପ୍ରତିଷ୍ଠିତ କିଟର ବିଦେଶୀ ଅନୁଦାନ ଉପରେ କଟକଣା ଲଗାଇଛି ଭାରତର ସରକାରଙ୍କ ଗୃହ ମନ୍ତ୍ରାଳୟ । ଡକ୍ଟର ଶ୍ରୀନାଥ ରେଡ୍ଡି ଓ ଡକ୍ଟର ଅଚ୍ୟୁତ ସାମନ୍ତଙ୍କ ଅନୁଷ୍ଠାନ ଉପରେ ଫରେନ୍ କଂଟ୍ରିବ୍ୟୁସନ ରେଗୁଲେସନ୍ ଆକ୍ଟ ଅନୁସାରେ ପ୍ରତିବନ୍ଧକ ଲଗାଯାଇଛି । ଫଳରେ ସେମାନଙ୍କର ବିଦେଶରୁ ଆସୁଥିବା ଟଂକା ବନ୍ଦ ହୋଇଯାଇଛି । ବିଦେଶରୁ ସହାୟତା ଆଣି ଏମାନେ ତାର ଠିକ୍ ହିସାବ ଦେଉନଥିବା ପରିପ୍ରେକ୍ଷୀରେ ଲାଗିଛି ଏଭଳି ପ୍ରତିବନ୍ଧକ ।
Kanak News is now on WhatsApp
Join and get latest news updates delivered to you via WhatsApp
ଡାକ୍ତର ଶ୍ରୀନାଥ ରେଡ୍ଡୀ ଦିଲ୍ଲୀ ଏମ୍ସର ପୂର୍ବତନ ହୃଦରୋଗ ବିଶେଷଜ୍ଞ ତଥା ପବ୍ଲିକ୍ ହେଲ୍ଥ ଫାଉଣ୍ଡେସନ୍ ଅଫ୍ ଇଣ୍ଡିଆର ସଭାପତି । ସ୍ୱାସ୍ଥ୍ୟ କ୍ଷେତ୍ରରେ ବିଶେଷକରି ଚିକିତ୍ସକମାନଙ୍କୁ ତାଲିମ ଦେବା କ୍ଷେତ୍ରରେ କାମ କରୁଥିବା ଏହି ପିଏଚଏଫଆଇର ସଭାପତିଙ୍କୁ ନିକଟରେ ନବୀନ ପଟ୍ଟନାୟକ ସ୍ୱାସ୍ଥ୍ୟ କ୍ଷେତ୍ରରେ ଉପଦେଶ ଦେବା ପାଇଁ ଉପଦେଷ୍ଟା ଭାବେ ନିଯୁକ୍ତି ଦେଇଥିଲେ । ଆଉ ତାଙ୍କୁ ଦେଇଥିଲେ କ୍ୟାବିନେଟ୍ ମନ୍ତ୍ରୀ ପାହ୍ୟାର ମର୍ଯ୍ୟାଦା ।
ନିକଟରେ ସେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟି ସ୍ୱାସ୍ଥ୍ୟ ବିଭାଗ ଅଧିକାରୀଙ୍କ ସହ ଆଲୋଚନା କରିଥିଲେ । ମାତ୍ର ତାଙ୍କ ଏନଜିଓ ବିଦେଶୀ ଆର୍ଥିକ ସହାୟତାର ଦୁରୁପଯୋଗ କରୁଥିବା ଅଭିଯୋଗରେ ବିଶେଷକରି ବିଲ୍ ଆଣ୍ଡ୍ ମିଲିଣ୍ଡା ଗେଟସ ଫାଉଣ୍ଡେସନରୁ ଟଙ୍କା ପାଇବାର ବାଟକୁ ବନ୍ଦ କରିଦେଇଛି କେନ୍ଦ୍ର ଗୃହ ମନ୍ତ୍ରଣାଳୟ । ଯଦିଓ ସେ କିଛି ଭୁଲ୍ କରିନାହାନ୍ତି ବୋଲି ସଫେଇ ଦେଇଛନ୍ତି ରେଡ୍ଡି ।
ଅନ୍ୟଜଣେ ହେଲେ କିଟର ପ୍ରତିଷ୍ଠାତା ଅଚ୍ୟୁତ ସାମନ୍ତ । କଳିଙ୍ଗ ଇନଷ୍ଟିଚୁଟ୍ ଅଫ୍ ଇଣ୍ଡଷ୍ଟ୍ରିଆଲ୍ ଟେକ୍ନୋଲୋଜି ବା କିଟର ପ୍ରତିଷ୍ଠାତା । ନଭେମ୍ବର ମାସରୁ କିଟର ଏଫସିଆରଏ ଲାଇସେନସକୁ ଆପାତତଃ ରଦ୍ଦ କରିଦେଇଛି ଗୃହ ମନ୍ତ୍ରଣାଳୟ । ବିଦେଶରୁ ମିଳୁଥିବା ଆର୍ଥିକ ସହାୟତାର ବାର୍ଷିକ ରିଟର୍ନ ଦେବାରେ ବିଫଳ ହୋଇଛି କିଟ୍ ।
୪ ମାସ ମଧ୍ୟରେ ରିଟର୍ନ ଫାଇଲ୍ ନକଲେ ଏଫସିଆରଏ ଆକାଉଂଟ୍ ରଦ୍ଦ ରହିବ ବୋଲି ଗୃହ ମନ୍ତ୍ରଣାଳୟ ଚେତାବନୀ ଦେଇଥିଲେ ସୁଦ୍ଧା ଅର୍ଥ କାରବାର ସଂପର୍କରେ ଏପର୍ଯ୍ୟନ୍ତ ବିସ୍ତୃତ ତଥ୍ୟ ଦେଇପାରୁନି କିଟ୍ । ଏ ନେଇ ଆମେ କିଟ୍ ସହ ଯୋଗାଯୋଗ କରିିଥିଲୁ । କିଟ୍ ମୁଖପାତ୍ରଙ୍କ କହିବା ଅନୁସାରେ ଲାଇସେନ୍ସକୁ ପୁଣି ନବୀକରଣ କରିବା ପାଇଁ ଉଦ୍ୟମ କରାଯାଉଛି । ଉଲ୍ଳେଖଯୋଗ୍ୟ, ମୋଦି ସରକାର କ୍ଷମତାକୁ ଆସିବା ପରେ ୧୧ ହଜାର ଏନଜିଓର ବିଦେଶରୁ ଆର୍ଥିକ ସହାୟତା ଆଣିବାର ଲାଇସେନ୍ସ ବାତିଲ କଲେଣି ।