ଅନଲାଇନରେ ସାମଗ୍ରୀ କିଣୁଥିବା ଗ୍ରାହକଙ୍କୁ ଝଟକା : ଆଗକୁ ମିଳିନପାରେ ଅଧିକ ଡିସକାଉଂଟ, ଇ-କମର୍ସ ସାଇଟ ଉପରେ ସରକାରଙ୍କ ଆଖି
କନକ ବ୍ୟୁରୋ : ଆଜିକାଲି ସମସ୍ତେ ଅନଲାଇନ ସପିଙ୍ଗ୍ କରିବାକୁ ବେଶ୍ ପସନ୍ଦ କରୁଛନ୍ତି । କାରଣ ଘରେ ବସି ଏହି ସବୁ ସାମଗ୍ରୀ ହାତ ପାହାନ୍ତାରେ ମିଳିଯାଏ । କିନ୍ତୁ ଏବେ ଅନଲାଇନ ସପିଙ୍ଗ୍ କରୁଥିବା ଗ୍ରାହକଙ୍କୁ ଲାଗିବ ଝଟକା । କାରଣ ଅନେକ ସମୟରେ ଏହି ସପିଙ୍ଗ ସାଇଟଗୁଡିକ ଦେଉଥିବା ଅଫର୍ ବା ଡିସକାଉଂଟ ଉପରେ ଲାଗିବ କଟକଣା ।
Kanak News is now on WhatsApp
Join and get latest news updates delivered to you via WhatsApp
ପାଠପଢା ବହି ଠାରୁ ଆରମ୍ଭ କରି ଘରେ ବ୍ୟବହୃତ ଉପକରଣ, କସମେଟିକ୍ସଠାରୁ ନେଇ ଖାଦ୍ୟ ସାମଗ୍ରୀ ଏସବୁ ଗୋଟିଏ କ୍ଲିକରେ ପହଂଚିଯାଉଛି ଆପଣଙ୍କ ହାତମୁଠାରେ । କାରଣ ସବୁକିଛି ମିଳୁଛି ଅନଲାଇନରେ । ଘରେ ବସି ଅର୍ଡର କରିବା ପରେ ଦୁଇ-ଚାରି ଦିନ ଭିତରେ ମିଳିଯାଉଛି ସବୁ ସାମଗ୍ରୀ । କିନ୍ତୁ ଏବେ ଅନଲାଇନ ସପିଙ୍ଗ୍ କରୁଥିବା ଗ୍ରାହକଙ୍କୁ ଲାଗିବ ଝଟକା । ଆଉ ମିଳିବନି ମନମୁତାବକ ରିହାତି । ଅନଲାଇନ ସପିଙ୍ଗ୍ ସାଇଟରେ ମିଳୁଥିବା ରିହାତି ହୁଏତ ଆଗକୁ କମିଯାଇପାରେ ଏବଂ ଏକ ନିର୍ଦ୍ଦିଷ୍ଟ ସମୟ ସୀମା ମଧ୍ୟରେ ଆପଣ ଏହି ସାମଗ୍ରୀ କିଣିବେ । ଏଭଳି କିଛି ସମ୍ଭାବନା ଏବେ ଦେଖାଦେଇଛି । କାରଣ ଇ-କମର୍ସ କମ୍ପାନୀଙ୍କ ରିହାତି ଉପରେ ଏବେ ରହିଛି ସରକାରଙ୍କ ଆଖି ।
ବିଭିନ୍ନ ସମୟରେ ସେଲ୍ ଲାଗୁଥିବା ଅନଲାଇନ୍ ସପିଙ୍ଗ୍ ସାଇଟ୍ଗୁଡିକ ଉପରେ ଲାଗିପାରେ କଟକଣା । ଏକ ନିର୍ଦ୍ଧାରିତ ସମୟସୀମା ଭିତରେ ସାମଗ୍ରୀଗୁଡିକୁୁ ରିହାତି ଦେଇ ବିକ୍ରି କରିବା ପାଇଁ ନିୟମ ଆଣିବେ ସରକାର । ତେବେ ଏହାରି ଭିତରେ କେବଳ ଆମାଜନ୍, ଫ୍ଲିପକାର୍ଟ, ଜବଙ୍ଗ୍ ଭଳି ସପିଙ୍ଗ୍ ସାଇଟ୍ ନୁହେଁ ବରଂ ସ୍ୱିଗି, ଜୋମାଟୋ ଆଦି ଅନଲାଇନ୍ ଫୁଡ୍ ଡେଲିଭେରି ସାଇଟ ଏବଂ ପେଟିଏମ୍, ପଲିସିବଜାର, ଅର୍ବାନକ୍ଲାପ୍ ଆଦି କମ୍ପାନୀ ଦେଉଥିବା ରିହାତି ଓ ଅଫରଗୁଡିକୁ ମଧ୍ୟ ସରକାର ନିୟନ୍ତ୍ରଣକୁ ଆଣିବା ନେଇ କୁହାଯାଉଛି । ଆଉ ଏସବୁର ପ୍ରଭାବ ସାଧାରଣ ଲୋକଙ୍କ ଉପରେ ପ୍ରଭାବ ପଡିବା ନେଇ ଆଲୋଚନା କରାଯାଉଛି ।
ପୂର୍ବରୁ ଏହି ସାଇଟଗୁଡିକ ଦେଉଥିବା କ୍ୟାସ୍ ଅନ୍ ଡେଲିଭରି ସୁବିଧାକୁ ନେଇ ବିବାଦ ଉପୁଜିବା ପରେ ଏବେ ରିହାତିକୁ ହ୍ରାସ କରିବା ସହ ଏଥିପାଇଁ ନିୟାମକ ଗଠନ, ଅଭିଯୋଗ ସମାଧାନ ବ୍ୟବସ୍ଥା ପାଇଁ ମଧ୍ୟ ସରକାର ପ୍ରସ୍ତାବ ଆଣିବେ । ତେବେ ଏସବୁ ଭିତରେ ଭାରତରେ ବର୍ତ୍ତମାନ ଇ-କମର୍ସ ବଜାରର ଆକାର ପ୍ରାୟ ୨୫ବିଲିୟନ ଡଲାର ରହିଥିବା ବେଳେ ଖୁବ୍ ଶୀଘ୍ର ଏହା ୨ଶହ ବିଲିୟନ୍ ଡଲାରରେ ପହଂଚିବା ଅନୁମାନ କରାଯାଉଛି ।