ପରମ୍ପରାରେ ପରବର୍ତ୍ତନ! ଜୟପୁରରେ ଗ୍ୟାସ ଟାଙ୍କି ଓଲଟିବା ଯୋଗୁଁ ମଲା ମଣିଷକୁ ମିଳିଲାନି ମୁଖାଗ୍ନି
କନକ ବ୍ୟୁରୋ : ଗଦଲାବାଡି ଗାଁରେ ଗ୍ୟାସ ଆତଙ୍କ । କୋରାପୁଟ ଘାଟିରେ ଟ୍ୟାଙ୍କର ଓଲଟିବା ପରେ ନିଆଁ ଜାଳିବାକୁ ବାରଣ କରିଛି ପ୍ରଶାସନ । ସେଥିପାଇଁ ଚିତାଠାରୁ ଆରମ୍ଭ କରି ଚୁଲି ମଧ୍ୟ ଜଳିନାହିଁ । ୨୪ ଘଂଟା ହେଲା ଭୋକ, ଓପାସରେ ଆଉଟୁପାଉଟୁ ହେଉଛନ୍ତି ଗାଁଲୋକେ । ଆଉ ୫ କିଲୋମିଟର ଅଂଚଳରେ କଡା ପହରା ଭିତରେ ଗ୍ୟାସକୁ ଖାଲି କରିବା ପାଇଁ ଉଦ୍ୟମ ଚଳାଇଛି ପ୍ରଶାସନ ।
Kanak News is now on WhatsApp
Join and get latest news updates delivered to you via WhatsApp
ଓଲଟି ପଡିଥିବା ଟାଙ୍କିରୁ ଗ୍ୟାସ ନିର୍ଗତ ହେଉଥିବାରୁ ଶ୍ୱାସରୁଦ୍ଧ ହୋଇ ଜଣେ ୫୫ ବର୍ଷୀୟ ମହିଳାଙ୍କ ମୃତ୍ୟୁ ହୋଇଥିଲା । ପ୍ରଶାସନର କଟକଣା ଯୋଗୁଁ ତାଙ୍କ ମର ଶରୀରକୁ ମାଟିରେ ପୋତି ଦେଇଛନ୍ତି ଗାଁ ଲୋକ । ସେପଟେ ଗ୍ୟାସ ଟାଙ୍କି ଓଲଟିବାର ୨୪ ଘଂଟା ବିତିଗଲାଣି । ଗ୍ୟାସକୁ ସଂପୂର୍ଣ୍ଣ ଖାଲି କରାଯାଇ ପାରିନଥିବାରୁ ପୁରା ଅଂଚଳରେ ବିଜୁଳି କାଟି ଦିଆଯାଇଛି ।
ଏପଟେ ଚୁଲି ଜଳୁନଥିବାରୁ ଗତକାଲିଠାରୁ ଓପାସରେ ୨୦ଟି ପରିବାରର ପ୍ରାୟ ୨୦୦ ଲୋକ । ମୁଢି ନହେଲେ କାଲିର ଶୁଖିଲା ଭାତ ଖାଉଛନ୍ତି ଗଦଲାବାଡି ଗ୍ରାମବାସୀ । ଦୁର୍ଘଟଣାକୁ ୨୪ ଘଂଟାରୁ ଅଧିକ ସମୟ ବିତିଯାଇଥିଲେ ମଧ୍ୟ ଗ୍ୟାସ ସଂପୂର୍ଣ୍ଣ ଖାଲି କରାଯାଇ ପାରିନଥିବାରୁ ଲୋକଙ୍କ ଭିତରେ ଅସନ୍ତୋଷ ଦେଖାଦେଇଛି ।
ବିଶାଖାପାଟଣାରୁ ସ୍ୱତନ୍ତ୍ର ଟିମ୍ ଆସି ଟ୍ୟାଙ୍କରରୁ ଗ୍ୟାସ୍ ଖାଲି କରୁଛନ୍ତି । ୫ କିଲୋମିଟର ପର୍ଯ୍ୟନ୍ତ ରାସ୍ତାକୁ ସଂପୂର୍ଣ୍ଣ ବନ୍ଦ କରିଦିଆଯାଇଛି । ଫଳରେ ରାସ୍ତାର ଉଭୟ ପାଶ୍ୱର୍ରେ ଶହଶହ ଗାଡି ମୋଟର ଅଟକି ରହିଛି । ଗୋଟିଏ ପ୍ଲାଟୁନ ପୋଲିସ ଫୋର୍ସ ଓ ଅଗ୍ନିଶମ ବିଭାଗ କର୍ମଚାରୀ ସତର୍କ ନଜର ରଖିଛନ୍ତି ।