କନକ ବ୍ୟୁରୋ : ଶୁକ୍ରବାର ସଂସଦରେ ଶକ୍ତି ପରୀକ୍ଷା । ଗୋଟିଏ ପଟେ ଆସ୍ଥା ଭୋଟ ଜରିଆରେ ଅଗ୍ନି ପରୀକ୍ଷା ଦେବେ ମୋଦି ସରକାର । ଅନ୍ୟପଟେ କଂଗ୍ରେସ ନେତୃତ୍ୱାଧୀନ ବିରୋଧୀ ମେଂଟର ହେବ ଅସଲ ପରୀକ୍ଷା । କାରଣ ମୋଦି ବିରୋଧୀଙ୍କୁ ସାଙ୍ଗରେ ନେଇ ୨୦୧୯ ନିର୍ବାଚନ ପାଇଁ ପ୍ରସ୍ତୁତ ହେଉଥିବା କଂଗ୍ରେସ ଏଠାରୁ ପରବର୍ତି ସମୀକରଣ ତିଆରି କରିବ । ଆଉ ଉଭୟ କଂଗ୍ରେସ ଓ ବିଜେପିଠାରୁ ଦୂରତା ରଖିଆସୁଥିବା ଦଳଗୁଡିକର ଆଭିମୁଖ୍ୟ ମଧ୍ୟ ସ୍ପଷ୍ଟ ହୋଇଯିବ ।
Kanak News is now on WhatsApp
Join and get latest news updates delivered to you via WhatsApp
ସଂସଦରେ ଅଗ୍ନିପରୀକ୍ଷା ଦେବେ ମୋଦି ସରକାର ହେଲେ ଏହା କଂଗ୍ରେସ ନେତୃତ୍ୱାଧୀନ ମୋଦି ବିରୋଧୀ ମେଂଟର ମଧ୍ୟ ବଡ ପରୀକ୍ଷା । ଯେଉଁଥିପାଇଁ ଟିଡିପିର ଅନାସ୍ଥା ପ୍ରସ୍ତାବକୁ ତତକ୍ଷଣାତ ଛିଡାହୋଇ ସମର୍ଥନ ଜଣାଇଥିଲେ କଂଗ୍ରେସ ସଦସ୍ୟ । ଶୁକ୍ରବାର ଆସ୍ଥାଭୋଟ ବେଳେ ଏନଡିଏ ସରକାରଙ୍କ ସଫଳତା ଓ ବିଫଳତାକୁ ନେଇ ବିସ୍ତୃତ ଚର୍ଚ୍ଚା ହେବ । ଯେଉଁଥିରୁ ଫାଇଦା ନେବାକୁ ଚାହୁଁଛି କଂଗ୍ରେସ । ୪ବର୍ଷର ମୋଦି ଶାସନରେ ସରକାରଙ୍କ ବିଶ୍ୱାସଘାତକୁ ଲୋକଙ୍କ ଆଗରେ ରଖିବ କଂଗ୍ରେସ । ସେପଟେ ନିଜ ସରକାରଙ୍କ ଉପଲବ୍ଧିକୁ ଲୋକଙ୍କ ଆଗରେ ରଖିବାକୁ କୌଣସି ମୌକା ଛାଡିବ ନାହିଁ ବିଜେପି ।
ସଂଖ୍ୟା ଦୃଷ୍ଟିରୁ ବେଶ ସହଜ ସ୍ଥିତିରେ ଥିବା ବିଜେପି, ବିରୋଧୀଙ୍କ ଅନାସ୍ଥା ପ୍ରସ୍ତାବକୁ ଗ୍ରହଣ କରିନେବା ପଛରେ ରହିଛି ଏକ ସୁଚିନ୍ତିତ ରଣନୀତି । ୨୦୧୯ ନିର୍ବାଚନ ପୂର୍ବରୁ ମେଂଟ ସହଯୋଗୀଙ୍କ ମୁଡ ଜାଣିବାକୁ ଚାହୁଁଛି ବିଜେପି । ଏଥିସହ ମୋଦି ବିରୋଧୀ ମେଂଟରେ ନଥିବା ରାଜନୈତିକ ଦଳଗୁଡିକର ଆଭିମୁଖ୍ୟ ମଧ୍ୟ ଶୁକ୍ରବାର ସ୍ପଷ୍ଟ ହେବାକୁ ଯାଉଛି ।
କଣ ରହିଛି ସଂଖ୍ୟା ଗଣିତ :
-ଲୋକସଭାର ମୋଟ ସଭ୍ୟ ସଂଖ୍ୟା ୫୪୫
-୧୦ଟି ଖାଲିପଡିଥିବାରୁ ମୋଟ ୫୩୫ ସଭ୍ୟ
-ଆସ୍ଥା ଭୋଟରେ ଭାଗ ନେବେନି ବାଚସ୍ପତି
-ଅର୍ଥାତ ଭୋଟ୍ ଦେବେ ୫୩୪ ଜଣ ସାଂସଦ
-ଆସ୍ଥା ଭୋଟରେ ଜିତିବାକୁ ଦରକାର ୨୬୮
-କେବଳ ବିଜେପି ପାଖରେ ଅଛନ୍ତି ୨୭୨ ସଭ୍ୟ
-ମେଂଟ ସହଯୋଗୀଙ୍କ ପାଖରେ ଅଛନ୍ତି ୪୦ ସଭ୍ୟ
-ଏନଡିଏ ନିକଟରେ ୩୧୨ ସଦସ୍ୟଙ୍କ ସମର୍ଥନ
-ଆସ୍ଥା ଭୋଟ ଜିତିବାକୁ ଏହି ସଂଖ୍ୟା ଢେର ଅଧିକ
-ସେପଟେ କଂଗ୍ରେସ ନିକଟରେ ଅଛନ୍ତି ୪୮ ସଦସ୍ୟ
-ଟିଏମସି, ଟିଡିପି ସମେତ ଅନ୍ୟ ଦଳର ସଭ୍ୟ ୯୯
-କଂଗ୍ରେସ ନେତୃତ୍ୱାଧୀନ ବିରୋଧୀ ମେଂଟରେ ୧୪୭
-ଏଆଇଏଡିଏମକେ, ବିଜେଡି, ଟିଆରଏସ ଓ ଅନ୍ୟାନ୍ୟ ୭୫
ମୋଦି ବିରୋଧୀ ମେଂଟରୁ ଦୂରେଇ ରହିଥିବା ଏଆଇଏଡିଏମକେ, ବିଜେଡି ଓ ଟିଆରଏସ ପରି ଆଂଚଳିକ ଦଳର ଆଭିମୁଖ୍ୟ ବେଶ ଗୁରୁତ୍ୱ ରଖୁଛି । କାରଣ ଏମାନେ କେଉଁଆଡକୁ ଢଳିବେ ତାହା ସ୍ପଷ୍ଟ ନକରି ଝୁଲାଇ ରଖିଛନ୍ତି । ଦିଲ୍ଲୀରେ ବସିଥିବା ବିଜେଡିର ସଂସଦୀୟ କମିଟି ବୈଠକରେ ଦଳ ତାର ନିଷ୍ପତି ଲଟକାଇ ରଖିଛି । ସଂସଦରେ ଉପସ୍ଥିତ ରହିବାକୁ ଦଳୀୟ ସାଂସଦଙ୍କୁ ହ୍ୱିପ ଜାରି କରାଯାଇଛି ହେଲେ ଭୋଟ ବେଳେ କେଉଁ ଷ୍ଟାଣ୍ଡ ନେବେ ଦଳୀୟ ସାଂସଦ, ସେନେଇ ଶୁକ୍ରବାର ଯାଏଁ ଅପେକ୍ଷା କରିବାକୁ ପଡିବ । ହେଲେ ଚର୍ଚ୍ଚା ହେଉଛିି, ଦଳ ବିରତ ରହିପାରେ ଯାହା ବିଜେପିକୁ ସୁହାଇବ ।
ବିଜେପିର ମନୋମୁଖୀ କାରବାରରେ ଅସନ୍ତୁଷ୍ଟ ଏନଡିଏର ସର୍ବପୁରାତନ ମେଂଟ ସହଯୋଗୀ ଶିବସେନାର ଆଭିମୁଖ୍ୟ ଆସ୍ଥା ଭୋଟ ବେଳେ ସ୍ପଷ୍ଟ ହୋଇଯିବ । ୨୦୦୩ ପରେ ସଂଖ୍ୟା ନଥାଇ ମଧ୍ୟ ପୁଣିଥରେ ବିଜେପି ସରକାର ବିରୋଧରେ ଅନାସ୍ଥା ପ୍ରସ୍ତାବକୁ କଂଗ୍ରେସ ଆଖିବୁଜି ସମର୍ଥନ କରିଛି । କାରଣ ଏହା ୨୦୧୯ ସାଧାରଣ ନିର୍ବାଚନ ପାଇଁ ରୋଡମ୍ୟାପ ପ୍ରସ୍ତୁତ କରିବ ବୋଲି ଆକଳନ କରାଯାଉଛି ।