କନକ ବ୍ୟୁରୋ : ଆପଣ କିମ୍ବା ଆପଣଙ୍କ କୌଣସି ସମ୍ପର୍କୀୟ ନିଆଁରେ ପୋଡି ହୋଇଗଲେ କଣ କରିବେ । ସଙ୍ଗେ ସଙ୍ଗେ ଘର ପାଖରେ ଥିବା ବଡ ବଡ ହସ୍ପିଟାଲକୁ ଯିବେ । ହେଲେ ଆପଣ ଜାଣିଛନ୍ତି, ସେହି ହସ୍ପିଟାଲରେ ପୋଡା ରୋଗୀଙ୍କ ପାଇଁ ସମ୍ପୂର୍ଣ୍ଣ ଚିକିତ୍ସା ବ୍ୟବସ୍ଥା ଅଛି କି । ଆପଣ ଜାଣିଲେ ଆଶ୍ଚର୍ଯ୍ୟ ହେବେ ରାଜ୍ୟର ସାଢେ ୪ କୋଟି ଲୋକଙ୍କ ପାଇଁ ରହିଛି ମାତ୍ର ୪ଟି ହସ୍ପିଟାଲ୍ । ଯେଉଁଠି ପୋଡି ହୋଇଯାଇଥିବା ରୋଗୀଙ୍କ ପାଇଁ ସଂପୂର୍ଣ୍ଣ ଚିକିତ୍ସା ବ୍ୟବସ୍ଥା ରହିଛି । ଆଉ, ଯେକୌଣସି ରୋଗର ୨୪ ଘଂଟିଆ ସ୍ୱାସ୍ଥ୍ୟସେବାର ପ୍ରତିଶ୍ରୁତି ଦେଉଥିବା ହସ୍ପିଟାଲ୍ ଗୁଡିକରେ ନାହି ସ୍ୱତନ୍ତ୍ର ବର୍ଣ୍ଣ ୟୁନିଟ୍ । ଦେଖନ୍ତୁ ଏହି ରିପୋର୍ଟ ।
Kanak News is now on WhatsApp
Join and get latest news updates delivered to you via WhatsApp
ଅଗଷ୍ଟ ୫, ରାତି ପ୍ରାୟ ୮ଟାରେ କ୍ୟାପିଟାଲ୍ ହସପିଟାଲ୍ ଅଣାଯାଇଥିଲା ସିଲିଣ୍ଡର ଫାଟି ଗୁରୁତର ପୋଡି ଯାଇଥିବା ଦମ୍ପତିଙ୍କୁ । ରାଜଧାନୀ ଉପକଂଠ ବାଲିପାଟଣାରେ ଘର ହୋଇଥିବାରୁ ସମ୍ପର୍କୀୟ ବିଳମ୍ବ ନକରି ସରକାରୀ ହସ୍ପିଟାଲ୍ ଆଣିଥିଲେ । ହେଲେ ଏଠି ନଥିଲା ରୋଗୀଙ୍କ ପାଇଁ ସ୍ୱତନ୍ତ୍ର ବର୍ଣ୍ଣ ୟୁନିଟ୍ । ଆଉ ଡାକ୍ତର ତାଙ୍କୁ କଟକ ବଡ ମେଡିକାଲ୍ ରେଫର କରିଦେଲେ । ଆଉ କଟକ ଯିବା ରାସ୍ତାରେ ଅଧିକ ଗୁରୁତର ହୋଇପଡିଲେ ଦମ୍ପତି ।
ସେହିପରି ଅଗଷ୍ଟ ୩ ତାରିଖରେ ସନସାଇନ୍ ହସପିଟାଲ୍ ଆସିଥିଲେ ରାଜଧାନୀର ପ୍ରତିଷ୍ଠିତ ବ୍ୟବସାୟୀ ପାଲ୍ ହାଇଟ୍ସର ମାଲିକ ସତପାଲ ସିଂଙ୍କ ୪ ବର୍ଷର ନାତି ରୁବିର ସିଂଙ୍କୁ । ଅଗ୍ନିକାଣ୍ଡରେ ଶ୍ୱାସରୁଦ୍ଧ ହୋଇ ଗୁରୁତର ହୋଇପଡିଥିବା ରୁବିରଙ୍କୁ ଡାକ୍ତର ଫେରାଇଦେଲେ । କାରଣ, ହସ୍ପିଟାଲରେ ନଥିଲା ବର୍ଣ୍ଣ ୟୁନିଟ୍ । ଅନ୍ୟ ହସପିଟାଲ ଯିବା ରାସ୍ତାରେ ପ୍ରାଣ ହରାଇଥିଲା ରୁବିର ।
ବ୍ରହ୍ମପୁରର ଏମକେସିଜି, କଟକର ଏସ୍ସିବି, ବୁର୍ଲାର ଭିମସାର ଏବଂ ରାଉରକେଲାର ଆଇଜିଏଚରେ ରହିଛି ସ୍ୱତନ୍ତ୍ର ବର୍ଣ୍ଣ ୟୁନିଟ୍ । ହେଲେ ରାଜଧାନୀର ସବୁଠାରୁ ବଡ ସରକାରୀ ହସ୍ପିଟାଲ କ୍ୟାପିଟାଲ୍ ହସ୍ପିଟାଲରେ ବର୍ଣ୍ଣ ୟୁନିଟ୍ ଅଛି ହେଲେ ନାହିଁ ପର୍ଯ୍ୟାପ୍ତ ଚିକିତ୍ସା ବ୍ୟବସ୍ଥା ।
ରାଜ୍ୟର ଏହି ୪ ଟି ହସପିଟାଲକୁ ବାଦ୍ ଦେଲେ ଅନ୍ୟ କିଛି ବଡ ବଡ ପ୍ରାଇଭେଟ୍ ହସପିଟାଲରେ ପୋଡି ଯାଇଥିବା ରୋଗୀଙ୍କ ପାଇଁ ଆଂଶିକ ଚିକିତ୍ସା ବ୍ୟବସ୍ଥା ରହିଛି । ହେଲେ ରୋଗୀ ଗୁରୁତର ହୋଇପଡିଲେ କଥା ସରିଲା । ରାଜଧାନୀର ବଡ ବଡ ହସପିଟାଲ୍ ଗୁଡିକ କିନ୍ତୁ ପ୍ରମୋସନ୍ ପାଇଁ ୨୪ ଘଂଟିଆ ଜରୁରୀକାଳୀନ ଚିକିତ୍ସା ବ୍ୟବସ୍ଥାର ବିଜ୍ଞାପନ ମାଧ୍ୟମରେ ପ୍ରତିଶ୍ରୁତି ଦିଅନ୍ତି । ତେବେ ପ୍ରକୃତରେ ସେହି ହସପିଟାଲରେ ନାହିଁ ବର୍ଣ୍ଣ ୟୁନିଟ୍ ।
ରାଜଧାନୀ ସମେତ ରାଜ୍ୟର ବିଭିନ୍ନ ସ୍ଥାନରେ ବହୁ ଅତ୍ୟାଧୁନିକ ଚିକିତ୍ସା ବ୍ୟବସ୍ଥା ସହ ଆକାଶକୁ ଛୁଇଁବା ଭଳି ବଡ ବଡ ବିଲଡିଂ ଦେଖିଲେ ମନେହୁଏ ସେଗୁଡିକରେ ସବୁ ରୋଗର ଉନ୍ନତ ଚିକିତ୍ସା ସମ୍ଭବ ହେଉଥିବ । କିନ୍ତୁ ବାସ୍ତବତା ପୁରା ଅଲଗା । ଓଡିଶାର ୪ କୋଟି ଲୋକଙ୍କ ପାଇଁ ମାତ୍ର ୪ଟି ହସ୍ପିଟାଲ୍ ।