ଜେଡିୟୁ କାହାର ? ବିହାରରେ ଆରମ୍ଭ ହେଲା ନୀତିଶ- ଶରଦ ଲଢେଇ
କନକ ବ୍ୟୁରୋ : ଜେଡିୟୁ ଦଳର ପ୍ରକୃତ ଉତ୍ତରାଧିକାରୀ ପାଇଁ ଆରମ୍ଭ ହେଲା ଲଢେଇ । ଦୁଇ ବନ୍ଧୁ ଥିବା ନେତା ଏବେ ରାଜନୀତିର ପଶାପାଲିରେ ପାଲଟିଯାଇଛନ୍ତି ପରସ୍ପରର ପରମ ଶତ୍ରୁ । ବିହାର ରାଜନୀତିର ରଙ୍ଗମଞ୍ଚରେ ଏବେ ପ୍ରତିଦିନ ଜେଡିୟୁ ଦଳର ନୂଆ ନୂଆ ନାଟକ ଦେଖିବାକୁ ମିଳୁଛି । ଲାଗୁଛି ଉତ୍ତରପ୍ରଦେଶରେ ସମାଜବାଦୀ ପାର୍ଟିର ଅବସ୍ଥା ଯେପରି ହୋଇଥିଲା ତାହାର ପୁନରାବୃତ୍ତି ବିହାରରେ ଜେଡିୟୁ ଦଳ ସହ ହେବାକୁ ଯାଉଛି । ଗତକିଛି ଦିନ ପୂର୍ବେ ମହାଗଠବନ୍ଧନକୁ ବାୟ ବାୟ କରି ବିଜେପି ସହ ମିଶି ରାଜ୍ୟରେ ସରକାର ଗଠନ କରିଥିଲା ଜେଡିୟୁ ।ଦୀର୍ଘ ୪ ବର୍ଷ ପରେ ପୁଣିଥରେ ଘରବାହୁଡା କରିଥିଲେ ନୀତିଶ ।
Kanak News is now on WhatsApp
Join and get latest news updates delivered to you via WhatsApp
ତେବେ ଆଜି ମୁଖ୍ୟମନ୍ତ୍ରୀ ନିବାସରେ ଜେଡିୟୁର ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକରେ ଦଳ କେନ୍ଦ୍ରରେ ଥିବା ଏନଡିଏ ସରକାର ସହ ସାମିଲ ହେବାକୁ ସର୍ବସମତ୍ତିରେ ପ୍ରସ୍ତାବ ପାରିତ ହୋଇଛି । କିନ୍ତୁ ନୀତିଶଙ୍କ ଏହି ନିଷ୍ପତିକୁ ସହଜରେ ଗ୍ରହଣ କରିପାରିନାହାନ୍ତି ଜେଡିୟୁର ପୂର୍ବତନ ରାଷ୍ଟ୍ରୀୟ ଅଧ୍ୟକ୍ଷ ଶରଦ ଯାଦବ । ସେ ଖୋଲାଖୋଲି ଭାବେ ରାଷ୍ଟ୍ରୀୟ କାର୍ଯ୍ୟକାରିଣୀରେ ନିଆଯାଇଥିବା ନିଷ୍ପତିକୁ ବିରୋଧ କରିବା ସହ ନିଜ ସମର୍ଥକ ଓ ଆରଜେଡି କର୍ମୀଙ୍କ ସହ ମିଶି ମୁଖ୍ୟମନ୍ତ୍ରୀ ବାସଭବନ ନିକଟରେ ନୀତିଶ ବିରୋଧୀ ନାରା ଦେଇଛନ୍ତି ।
ସେହିପରି ଶରଦ ଯାଦବଙ୍କୁ ସମର୍ଥନ କରି ଲାଲୁ କହିଛନ୍ତି, ‘ ଆଜି ହୋଇଥିବା ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକ ଜେଡିୟରୁ ନଥିଲା ବରଂ ବିଜେପିର ଥିଲା । ଦୁର୍ନୀତିରେ ଉଭୟ ନୀତିଶ ଓ ସୁଶୀଲ ମୋଦି ନାଁ ସାମ୍ନାକୁ ଆସିବା ପରେ ଉଭୟ ଏଥିରୁ ବଞ୍ଚିବା ପାଇଁ ହାତ ମିଳାଇଛନ୍ତି ।
ଗୋଟିଏ ପଟେ ମୁଖ୍ୟମନ୍ତ୍ରୀଙ୍କ ବାସଭବନରେ ରାଷ୍ଟ୍ରୀୟ କାର୍ଯ୍ୟକାରିଣୀ ଚାଲୁଥିବା ବେଳେ ଅନ୍ୟପଟେ ଶରଦ ଯାଦବ ମଧ୍ୟ ସମାନ୍ତରଳ ଭାବେ ନିଜ ସମର୍ଥକଙ୍କୁ ନେଇ ଅନ୍ୟ ଏକ ବୈଠକ କରିଥିଲେ । ତେବେ ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକ ପରେ ଜେଡିୟୁ ନେତା କେସି ତ୍ୟାଗୀ କହିଛନ୍ତି, ନୀତିଶ କୁମାରଙ୍କୁ ୧୫ଟି ରାଜ୍ୟର ସଭାପତିଙ୍କ ସମର୍ଥନ ରହିଛି । ପୂରା ଦଳ ଏବେ ନୀତିଶଙ୍କ ସହ ଅଛି । ତା ଛଡା ଦୁର୍ନୀତିରେ ବୁଡି ରହିଥିବା କଂଗ୍ରେସ ଓ ଆରଜେଡି ଦଳ ଶରଦ ଯାଦବଙ୍କ ମତିଭ୍ରମ କରିଛନ୍ତି । ତେଣୁ ସେ ଏପରି କରୁଛନ୍ତି । ରାଷ୍ଟ୍ରୀୟ କାର୍ଯ୍ୟକାରିଣୀରେ ଶରଦ ଯାଦବଙ୍କୁ ନେଇ କୌଣସି ନିଷ୍ପତି ନିଆଯାଇନାହିଁ । ଅଗଷ୍ଟ ୨୭ ପରେ ଶରଦଙ୍କୁ ନେଇ ଯାହା କିଛି ନିଷ୍ପତି ନିଆଯିବ । ଯଦି ଅଗଷ୍ଟ ୨୭ରେ ଲାଲୁଙ୍କ ଆରଜେଡି ର୍ୟାଲିରେ ଶରଦ ଯୋଗ ଦିଅନ୍ତି ତେବେ ତାଙ୍କ ଉପରେ ଦଳ କାର୍ଯ୍ୟାନୁଷ୍ଠାନ ନେବ ।
ତେବେ ଶରଦଙ୍କ ସମର୍ଥକଙ୍କ କହିବା ଅନୁଯାୟୀ, ଜେଡିୟୁ ଦଳର ପ୍ରକୃତ ଉତ୍ତରାଧିକାରୀ ହେଉଛନ୍ତି ଶରଦ । କାରଣ ୧୯୯୯ ମସିହାରେ ନୀତିଶ ଓ ଜର୍ଜ ଫର୍ଣ୍ଣାଣ୍ଡିଜ ରାଜନୈତିକ ଫାଇଦା ପାଇଁ ନିଜର ସମତା ପାର୍ଟିକୁ ଶରଦ ଯାଦବଙ୍କ ଜେଡିୟୁ ଦଳରେ ବିଲୟ କରିଥିଲେ । କିନ୍ତୁ ସମୟ ବିତିବା ସଙ୍ଗେ ସଙ୍ଗେ ଦଳ ଭିତରେ ନୀତିଶ ଏକଚାଟିଆ ଶାସନ କରିଥିଲେ । ଯାହାକୁ ସହଜରେ ଗ୍ରହଣ କରି ପାରିନଥିଲେ ଶରଦ । ତେବେ କିଛିଦିନ ପୂର୍ବେ ନାଟକୀୟ ଘଟଣା କ୍ରମେ ନୀତିଶ ମହାମେଣ୍ଟର ହାତଛାଡି ବିଜେପି ସହ ମିଶି ରାଜ୍ୟରେ ସରକାର ଗଠନ କରିବା ପରେ ଦଳ ଭିତରେ ଦେଖା ଦେଇଥିଲା କନ୍ଦଳ । ନୀତିଶଙ୍କ ନିଷ୍ପତିକୁ ଖୋଲାଖୋଲି ବିରୋଧ କରିଥିଲେ ଶରଦ । ଏସବୁ ଭିତରେ ଦଳ ଭିତରେ ଶରଦଙ୍କୁ କୋଣଠେସା କରିବା ପାଇଁ ପ୍ରସ୍ତୁତ ହୋଇଥିଲା ବ୍ଲୁ ପ୍ରିଣ୍ଟ । ପୂର୍ବରୁ ତାଙ୍କୁ ରାଷ୍ଟ୍ରୀୟ ସଭାପତି ପଦରୁ ବହିଷ୍କାର କରାଯାଇଥିଲା । ଏବେ ତାଙ୍କୁ ରାଜ୍ୟସଭାରେ ସଂସଦୀୟ ଦଳ ସଭାପତି ପଦରୁ ବିତାଡିତ କରିବା ପରେ ଲଢେଇ ଉଗ୍ର ରୂପ ଧରିଛି ।
ଏହାଭିତରେ ନୀତିଶ ଗୋଷ୍ଠୀ ତାଙ୍କୁ ଦଳରୁ ବହିଷ୍କାର କରିବାକୁ ଯୋଜନା ପ୍ରସ୍ତୁତ କରୁଥିବା କଥା ସାମ୍ନାକୁ ଆସୁଛି । ଏନେଇ ଶରଦ କହିଛନ୍ତି, ଜେଡିୟୁ ହେଉଛି ତାଙ୍କ ନିଜ ଦଳ । ଯଦି କାହାର ସାହସ ଅଛି ତେବେ ତାଙ୍କୁ ଦଳରୁ ବାହାର କରି ଦେଖୁ । ତେବେ ଶରଦଙ୍କ ସମର୍ଥକଙ୍କ କହିବା ଅନୁଯାୟୀ, ଜେଡିୟୁର ପ୍ରକୃତ ଉତ୍ତରାଧିକାରୀ କିଏ ତାହା ନିର୍ବାଚନ ଆୟୋଗ ସ୍ପଷ୍ଟ କରିବେ । ଏଥିପାଇଁ ଯଦି ଆଇନଗତ ଲଢେଇ ଲଢିବାକୁ ପଡେ ତେବେ ଆମେ ସେଥିପାଇଁ ପ୍ରସ୍ତୁତ । ଏହି ଘଟଣା ପରେ ବିହାର ରାଜନୀତିର ପାଣିପାଗ କେଉଁ ଆଡକୁ ଗତି କରୁଛି ତାହା ଦେଖିବାକୁ ବାକି ରହିଲା ।