କନକ ବ୍ୟୁରୋ : ବିହାର ମୁଖ୍ୟମନ୍ତ୍ରୀ ପଦରୁ ଇସ୍ତଫା ଦେବାର ମାତ୍ର ୧୪ ଘଂଟା ଭିତରେ ପୁଣି ଥରେ ମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି ନୀତିଶ କୁମାର । ବିଜେପିର ସମର୍ଥନ ନେଇ ୧୩୨ ବିଧାୟକଙ୍କ ଲିଖିତ ସମର୍ଥନରେ ଆଜି ସକାଳ ୧୦ଟାରେ ଶପଥ ନେଇଛନ୍ତି ନୀତିଶ । ବିଜେପି ନେତା ସୁଶୀଲ ମୋଦି ଉପମୁଖ୍ୟମନ୍ତ୍ରୀ ଭାବେ ଶପଥ ନେଇଛନ୍ତି । ବିହାର ରାଜନୀତିରେ ଏହି ବିରାଟ ଡ୍ରାମା ପରେ ରଷ୍ଟ୍ରୀୟ ଜନତା ଦଳ ଅଧ୍ୟକ୍ଷ ଲାଲୁ କହିଛନ୍ତି, ପୂର୍ବରୁ ପ୍ଲାନ ହୋଇଥିଲା, ତେଣୁ ମ୍ୟାଚ୍ ଫିକ୍ସିଂ ହୋଇଛି । ନୀତିଶ୍ କୁମାରଙ୍କ ଏହି ରାଜନୈତିକ ଗୋଟି ଚାଳନା କେବଳ ବିହାର ନୁହେଁ ସାରା ଦେଶରେ ହଇଚଇ ସୃଷ୍ଟି କରିଛି ।
Kanak News is now on WhatsApp
Join and get latest news updates delivered to you via WhatsApp
ସେପଟେ କେଇ ଘଂଟା ଭିତରେ ୨୦ ମାସର ମହାମେଂଟକୁ ଭାଙ୍ଗି ବିହାର ରାଜନୀତିରେ ଓଲଟ ପାଲଟ ପରେ ଚିହିଁକି ଉଠିଛନ୍ତି ଲାଲୁ । କହିଛନ୍ତି ବିଶ୍ୱାସ ଘାତକତା କରିଛନ୍ତି ନୀତିଶ୍ କୁମାର୍ ।
ଲାଲୁଙ୍କ ସହ ମିଶି ୨୦୧୫ ବିହାର ବିଧାନସଭା ନିର୍ବାଚନରେ ମୋଦିଙ୍କ ମାତ୍ ଦେଇ ପ୍ରଥମ ଥର ପାଇଁ ମୋଦି ହୱାର ଦିଗ ବଦଳାଇ ଦେଇଥିଲେ ନୀତିଶ୍ । ଏବେ କିନ୍ତୁ ସବୁ କିଛି ବଦଳି ଯାଇଛି । କାଲିର ବନ୍ଧୁ ନମ୍ବର ୱାନ୍ ଆଜିର ଶତ୍ରୁ ନମ୍ବର ୱାନ୍ ବନି ଯାଇଛନ୍ତି । ନୀତିଶ୍ କହିଛନ୍ତି ଲାଲୁଙ୍କ ଅଭିଯୋଗର ଠିକ୍ ସମୟରେ ଜବାବ୍ ଦେବେ ।
ସେପଟେ ବିହାର ମହାମେଂଟର ତୃତୀୟ ଦଳ କଂଗ୍ରେସ୍ ନୀତିଶଙ୍କ ଏଭଳି ଗୋଟି ଚାଳନାରେ ଆଶ୍ଚର୍ଯ୍ୟ ହୋଇଯାଇଛି । କଂଗ୍ରେସ୍ ଉପାଧ୍ୟକ୍ଷ ରାହୁଲ ଗାନ୍ଧି କହିଛନ୍ତି, କ୍ଷମତା ପାଇଁ ଲୋକ କିଛି ବି କରିବାକୁ ପ୍ରସ୍ତୁତ ହୋଇଯାଉଛନ୍ତି ।
ବିହାରର ଏହି ବିରାଟ ପଲିଟିକାଲ୍ ଡ୍ରାମାର ପ୍ରଭାବ କେବଳ ବିହାରରେ ସୀମିତ ରହିବ ନାହିଁ । କାରଣ ୨୦୧୯ରେ ମୋଦିଙ୍କ ବିରୋଧରେ ନୀତିଶଙ୍କୁ ନେଇ ଯେଉଁ ମେଂଟର ପରିକଳ୍ପନା କରାଯାଇଥିଲା ତାହା ଆଉ ସମ୍ଭବ ହେବ ନାହିଁ । ତେଣୁ ବିହାର ଘଟଣାକ୍ରମରୁ ମୋଦି ସବୁଠାରୁ ବେଶୀ ଲାଭବାନ୍ ହୋଇଥିବା କୁହାଯାଉଛି ।