ନାଥୁରାମ ଗଡସେଙ୍କୁ ଦେଶଭକ୍ତ କହିବା ପ୍ରସଙ୍ଗରେ ନିନ୍ଦା କଲେ ନୀତିଶ କୁମାର । କହିଲେ, ପ୍ରଜ୍ଞାଙ୍କୁ କରାଯାଉ ବିଜେପରୁ ବିଦା
ସେପଟେ ଲମ୍ବା ନିର୍ବାଚନୀ ପ୍ରକ୍ରିୟାକୁ ନେଇ ବି ଉଠାଇଲେ ପ୍ରଶ୍ନ
କନକ ବ୍ୟୁରୋ: ଭୋପାଳରୁ ବିଜେପି ପ୍ରାର୍ଥୀ ସାଧ୍ୱୀ ପ୍ରଜ୍ଞାକୁ ନେଇ ଏନଡିଏରେ ମତଭେଦ ଦେଖାଦେଇଛି । ନାଥୁରାମ ଗଡସେଙ୍କ ସମ୍ପର୍କରେ ପ୍ରଜ୍ଞାଙ୍କ ବୟାନକୁ ନେଇ ଆଜି ମୁହଁ ଖୋଲିଛନ୍ତି ବିହାରର ମୁଖ୍ୟମନ୍ତ୍ରୀ ନୀତିଶ କୁମାର । ସେ କହିଛନ୍ତି, ପ୍ରଜ୍ଞାଙ୍କ ବୟାନ ଆଦୌ ଗ୍ରହଣୀୟ ନୁହେଁ । ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବା ବିଜେପିର କାମ । ଏହା ଉପରେ ଦଳ ବିଚାର କରିବା ଦରକାର । ତେବେ ପ୍ରଜ୍ଞାଙ୍କ ଉପରେ କାର୍ଯ୍ୟାନୁଷ୍ଠାନ ନେବା ବିଜେପିର ଆଭ୍ୟନ୍ତରୀୟ ବ୍ୟାପାର ବୋଲି ପ୍ରଜ୍ଞା କହିଛନ୍ତି । ନାଥୁରାମ ଗଡେଶଙ୍କୁ ଦେଶଭକ୍ତ ବୋଲି କହି ବିବାଦରେ ଆସିଥିଲେ ସାଧ୍ୱୀ ପ୍ରଜ୍ଞା ।
Kanak News is now on WhatsApp
Join and get latest news updates delivered to you via WhatsApp
ସେପଟେ, ଦେଶର ଲମ୍ୱା ମତଦାନ ପ୍ରକ୍ରିୟାକୁ ନେଇ ପ୍ରଶ୍ନ ଉଠାଇଛନ୍ତି ବିହାର ମୁଖ୍ୟମନ୍ତ୍ରୀ ତଥା ଜେଡିୟୁ ମୁଖ୍ୟ ନୀତିଶ କୁମାର । ଦେଶରେ ଅପ୍ରେଲ ଓ ମେ ମାସରେ ୭ ଟି ପର୍ଯ୍ୟାୟରେ ଭୋଟ୍ କରାଯିବାକୁ ନେଇ ଖାସ କରି ସେ ପ୍ରଶ୍ନ କରିଛନ୍ତି । ପ୍ରବଳ ଖରାରେ ଏପରି ମତଦାନ ପ୍ରକ୍ରିୟା ଭୋଟରଙ୍କୁ ଅନେକ ସମସ୍ୟାରେ ପକାଉଛି । ଯେତେବେଳେ ପ୍ରବଳ ଖରାରେ ବାହାରିବା ମୁସ୍କିଲ୍ ହୋଇଯାଉଛି, ଲୋକେ କେମିତି ପଦାକୁ ଆସି ଭୋଟ୍ ଦେବେ ବୋଲି ସେ ପ୍ରଶ୍ନ କରିଛନ୍ତି । ଏହାକୁ ନେଇ ଦେଶର ନିର୍ବାଚନ କମିଶନଙ୍କୁ ପରାମର୍ଶ ଦେଇଛନ୍ତି ନୀତିଶ ।
କହିଛନ୍ତି ଏତେ ଲମ୍ୱା ନିର୍ବାଚନ ଅବଧି ନକରି ଏହାକୁ ଛୋଟିଆ କରାଗଲେ ଭଲ ହୁଅନ୍ତା । ଦେଶର ସମସ୍ତ ରାଜନୈତିକ ଦଳ ଏନେଇ ଏକାଠି ବସି ବିଚାର କରିବା ଆବଶ୍ୟକ । ଭୋଟକୁ ଫେବ୍ରୁଆରୀରୁ ମାର୍ଚ କିମ୍ୱା ଅକ୍ଟୋବର – ନଭେମ୍ୱର ମାସରେ କରାଇଲେ ଏହା ସାଧାରଣ ଲୋକଙ୍କ ପାଇଁ ସୁବିଧା ଜନକ ହେବ ବୋଲି ସେ କହିଛନ୍ତି । ଏହା ସହିତ ସେ କହିଛନ୍ତି ନିର୍ବାଚନ ସରିବା ପରେ ପରେ ସେ ଦେଶର ସମସ୍ତ ରାଜନୈତିକ ଦଳ ଗୁଡିକୁ ଏହା ଉପରେ ବିଚାର କରିବାକୁ ଚିଠି ଲେଖିବେ ବୋଲି କହିଛନ୍ତି । ପୁରା ନିର୍ବାଚନକୁ ୩ରୁ ୪ ଟି ପର୍ଯ୍ୟାୟରେ ଶେଷ କରିବାକୁ ପ୍ରସ୍ତାବ ରଖିଛନ୍ତି ନୀତିଶ କୁମାର । ସବୁଠାରୁ ରୋଚକ କଥା ହେଉଛି ଚଳିତ ଥର ବିରୋଧୀ ଦଳ ଗୁଡିକ ମଧ୍ୟ ନିର୍ବାଚନ ପ୍ରକ୍ରିୟାକୁ ନେଇ ବିଭିନ୍ନ ପ୍ରଶ୍ନ ଉଠାଇଛନ୍ତି । କିଛି ଦଳ ମଧ୍ୟ ରମଜାନ୍ ମାସରେ ଭୋଟ୍ ରଖାଯିବାକୁ ନେଇ ପ୍ରଶ୍ନ ଉଠାଇଥିଲେ । ତେବେ ଏହା ପ୍ରଥମ ଥର ଯେ ବିଜେପିର ସହଯୋଗୀ ଦଳ ଦେଶର ନିର୍ବାଚନ ପ୍ରକ୍ରିୟାକୁ ନେଇ ପ୍ରଶ୍ନ ଉଠାଇଛି ।